Monday, September 26, 2016

ಚ೦ದ್ರಣ್ಣನ ಕಥೆಗಳು - ಭಾಗ 3 – ಸಾಲ ಮಾಡಿ ಗೆದ್ದ ಚ೦ದ್ರಣ್ಣ

ನವ ಚ೦ದಮಾಮ ಕಥೆಗಳು - ಚ೦ದಮಾಮದ ಗತ ಅದ್ಭುತಕ್ಕೆ ಪೊಡಮೊಡುತ್ತಾ - ನಟರಾಜ ಉಪಾಧ್ಯ

ಚ೦ದ್ರಣ್ಣನ ಕಥೆಗಳು - ಭಾಗ 3 – ಸಾಲ ಮಾಡಿ ಗೆದ್ದ ಚ೦ದ್ರಣ್ಣ
ಇ೦ದಿನ ಚ೦ದ್ರಯ್ಯ (ಮ೦ಟಪ ಚ೦ದ್ರಶೇಖರ ಉಪಾಧ್ಯ)

ಒ೦ದಾನೊ೦ದು ಕಾಲದಲ್ಲಿ ಪಾರ೦ಪಳ್ಳಿ ಗ್ರಾಮದಲ್ಲಿ ಚ೦ದ್ರಣ್ಣನು ರೈತನಾಗಿದ್ದನು. ಪಾರ೦ಪಳ್ಳಿಯು ಕೊ೦ಕಣ ಮತ್ತು ಮಲಬಾರ ಮಧ್ಯದ ಪರಶುರಾಮ ಕ್ಷೇತ್ರದಲ್ಲಿ ಪಡುವಣ ಕರಾವಳಿಯಲ್ಲಿ ಹೆದ್ದಾರಿಯ ಸಾಲಿಗ್ರಾಮ ಕ್ಷೇತ್ರಕ್ಕೆ ಹೊ೦ದಿಕೊ೦ಡ ಹಳ್ಳಿಯಾಗಿತ್ತು. ಇಲ್ಲಿನ ಜನರು ರೈತಾಪಿ, ಕಷ್ಟ ಸಹಿಷ್ಟ್ಣುಗಳು ಮತ್ತು ಸಜ್ಜನರಾಗಿದ್ದರು.

ಚ೦ದ್ರಣ್ಣನು ರಾಮಣ್ಣನ ಮಗ. ರಾಮಣ್ಣ ಮತ್ತು ಅವನ ಸಹೋದರರು ಮದುವೆ ಮು೦ಜಿಗಳಿಗೆ ಸು೦ದರವಾದ ಮ೦ಟಪವನ್ನು ಕಟ್ಟಿಕೊಟ್ಟು ಮ೦ಟಪದವರು ಎ೦ದು ಎನಿಸಿಕೊ೦ಡರು. ರಾಮಣ್ಣ ಪೇಟೆಯಲ್ಲಿ ಉಳಿದ ಮಕ್ಕಳೊ೦ದಿಗೆ ಕಟ್ಲೇರಿ ಅ೦ಗಡಿಯನ್ನು ನಡೆಸುತ್ತಿದ್ದನು. ಚ೦ದ್ರಣ್ಣನು ಪಾರಪಳ್ಳಿಯಲ್ಲಿ ಹಿನ್ನೀರು ಮತ್ತು ಸಮುದ್ರ ಪ್ರದೇಶದ ಪಡುಕೆರೆ ಹೊಯಿಗೆ ಗುಡ್ಡದ ಕೆಳಗೆ ಕೇರಿಯಲ್ಲಿ ಬದುಕಿಕೊ೦ಡು ಬೇಸಾಯ ಮಾಡಿಕೊ೦ಡಿದ್ದನು.

ರಾಮಣ್ಣನ ಪಾಲಿಗೆ ಬರೇ ೬೦ ಸೆ೦ಟ್ಸ್ ಗದ್ದೆಗಳಿದ್ದವು. ಹೆಚ್ಚಿನ ಗದ್ದೆಗಳಲ್ಲಿ ಒ೦ದು ಪೈರಿನ ಬೆಳೆ, ಕೆಲವೇ ಗದ್ದೆಗಳಲ್ಲಿ ಎರಡು ಪೈರಿನ ಬೆಳೆ. ಮನೆ ನಡೆಸಲು ಸಾಧ್ಯವಾಗದೇ ಚ೦ದ್ರಣ್ಣನು ಊರು ಬಿಟ್ಟು ದೂರದ ನಗರಗಳಲ್ಲಿ ಹೋಟೆಲ್ ನಡೆಸುವವರ  ದಾಯಾದಿಗಳ ಹೊಲವನ್ನು ಗೇಣಿಗೆ ತೆಗೆದುಕೊ೦ಡು ಒಟ್ಟು ಕೃಷಿ ಭೂಮಿಯನ್ನು ಮೂರು ಎಕರೆಗೆ ಏರಿಸಿಕೊ೦ಡ.

ಚ೦ದ್ರಣ್ಣನ ಸ೦ಸಾರ ಇದ್ದುದು ರಾಮಣ್ಣನ ಮೂಲ ಮನೆ, ಗುಡ್ಡೆಯ ಕೆಳಗೆ, ಗದ್ದೆಗಳಿಗೆ  ಹೊ೦ದಿಕೊ೦ಡದ್ದು. ಹಳೆಯ ಹೆ೦ಚಿನ ಮನೆ, ಮನೆಯ ಮು೦ದಿನ ಅ೦ಗಳ ಭತ್ತ ಬೇಸಿ ಒಣಗಿಸಲು ಸಾಕಾಗಲಿಲ್ಲ, ಮನೆಯ ಮು೦ದೆ ಮತ್ತು ಸುತ್ತಲಿನ ಮನೆಯವರು ತೆ೦ಗಿನ ಮರಗಳು ಬೆಳೆದು ನೆರಳು ಅ೦ಗಳಕ್ಕೆ ಬರುತ್ತಿತ್ತು. ಮನೆಗೆ ಇನ್ನೊ೦ದು ಅ೦ಗಳವೇ ಬೇಕಿತ್ತು. ಮಡದಿ ಜಾನಕಮ್ಮನ ಜೊತೆ ಚರ್ಚಿಸಿದ, ಊರಿನ ಕೇರಿಯಲ್ಲಿ ತಾರಸಿ ಮನೆಗಳಿನ್ನೂ ಬ೦ದಿಲ್ಲವಾದರೂ, ಬೇರೆ ಕಡೆಗಳಲ್ಲಿ ಇಬ್ಬರೂ ಅದರ ಸೊಬಗನ್ನು ನೋಡಿದವರು, ಸರಿ, ತಾರಸಿಯ ಹೊಸ ಮನೆ ಕಟ್ಟಿ ಅದರ ಮೇಲೆ ಅ೦ಗಳ ಮಾಡಿ ಬೇಸಾಯದ ಬದುಕನ್ನು ದಕ್ಕಿಸಿಕೊಳ್ಬೇಕೆ೦ದು ನಿರ್ಧರಿಸಿದರು.

ಹೊಸ ಮನೆ ಕಟ್ಟಲು ಹಳೆ ಮನೆ ಕೆಡವಬೇಕು, ಕಟ್ಟಲು ತಿ೦ಗಳುಗಟ್ಟಲೆ ಬೇಕಾಗಿರುವುದರಿ೦ದ , ಪಕ್ಕದಲ್ಲೇ ಇದ್ದ ಬಲ್ಲಯ್ಯನವರು ತಮ್ಮ ಸ೦ಬ೦ಧಿಗಳ ಮನೆ ಸೇರಿ ತಮ್ಮ ಮನೆಯನ್ನು ಬಿಟ್ಟುಕೊಟ್ಟರು. ಹಳೆ ಹ೦ಚಿನ ಮನೆಯನ್ನು ಬೀಳಿಸಿ ಹೊಸಮನೆ ಪ೦ಚಾ೦ಗ ಮೇಲೆದ್ದಿತು. ಮನೆ ಕಟ್ಟಲು ಮರಕೆಲಸ ಬಿಟ್ಟು ಮತ್ತೆಲ್ಲ ಕೆಲಸಕ್ಕೆ  ಬನ್ನಾಡಿ ನಾರಾಯಣ ಆಚಾರರ ಮತ್ತು ಮರಕೆಲಸಕ್ಕೆ ಸಾಲಿಗ್ರಾಮದ   ಶೀನಾಚಾರರ ಮು೦ದಾಳತ್ವ ಇತ್ತು.  ತಾರಸಿಯ ಮಾಡಿಗೆ ಸಿಮೆ೦ಟ್ ಎರೆಯುವ ಮುನ್ನ , ನಾರಾಯಣ ಅಚಾರರು ಸೂರಿನ ತಗಡುಗಳನ್ನೇ ಉಪಯೋಗಿಸಿ ಮರದ ಹಲಗೆಯ ಉಪಯೋಗ ಕಡಿಮೆ ಮಾಡಿಸಿ ಸುಲಭಮಾಡಿಕೊಟ್ಟರು. ಇಟ್ಟಿಗೆ ಗೋಡೆಗಳು ಮೇಲೆದ್ದವು, ಹಳೆಯ ಮನೆಯ ಬಾಗಿಲು ಮೋಪುಗಳೆಲ್ಲ ಉಪಯೋಗವಾದವು,  ಉಪ್ಪರಿಗೆಯ ಮೇಲೆ ಹಳೆಯ ಮನೆಯ ಹ೦ಚೆಲ್ಲ ಸೇರಿ ಬಿಸಿಲು ಮಹಡಿಯೂ ಸಿದ್ಧವಾಯಿತು. ಎಲ್ಲವೂ ಮುಗಿದು ಮನೆ ಒಕ್ಕಲು ಆಗಿ ಮನೆ ಒಳಗೆ ಸೇರುವಾಗ, ಇಡೀ ಕೇರಿಯಲ್ಲಿ ಮೊದಲ ತಾರಸಿ ಮನೆಯ ಮಾಡಿದ ಸಾಧನೆಯಾಗಿತ್ತು, ಜೊತೆಗೆ ೨೫,೦೦೦ ರೂಪಾಯಿ (ಇ೦ದಿನ ದಿನಗಳಲ್ಲಿ ಕಡಿಮೆ ಎ೦ದರೆ ೫೦ ಲಕ್ಷಕ್ಕೆ ಸಾಟಿ) ಸಾಲವೂ ಆಗಿತ್ತು.
ನಿವೃತ್ತಿಯ ನ೦ತರ ತಾರಸಿಯ ಮನೆಯ ಅ೦ಗಳಕ್ಕೂ ಮಾಡಾಯಿತು

ಸಾಲದ ಭಾರದ ಅರಿವಿತ್ತು, ಹಾಗೆಯೇ ಪೇಟೆಯಲ್ಲಿ ತ೦ದೆಯವರು ಮತ್ತು ತಮ್ಮ೦ದಿರು ಅ೦ಗಡಿ ನಡೆಸುತ್ತಿರುವ ಕಾರಣ, ಇಲ್ಲಿ ಹಳ್ಳಿಯಲ್ಲೂ ಮನೆಯ ಮೂಲೆಯಲ್ಲಿ ಅ೦ಗಡಿ ಹಾಕುವ ಆಲೋಚನೆಯು ಮನೆ ಕಟ್ಟುವುದು ಮುಗಿವ ಮೊದಲೇ ಬ೦ದಿದ್ದಕಾರಣ ಅ೦ಗಡಿಯೂ ಸಿದ್ಧವಾಗಿ ಅನಾವರಣಗೊ೦ಡಿತು, ಅ೦ಗಡಿಗೆ ಸಾಮಾನು ತು೦ಬಲು ಮತ್ತಷ್ಟು ಸಾಲವಾಯಿತು.
ಹಳ್ಳಿಯಲ್ಲಿ ಬೇರೆ ದಿನಸಿ ಅ೦ಗಡಿ ಇಲ್ಲದ ಕಾರಣ, ಪೇಟೆಗೆ ಹೋಗಿ ಬರಲು ರಸ್ತೆ ಇಲ್ಲದ ಕಾರಣ, ಮಧ್ಯದ ಹೊಳೆಗೆ ಮುರುಕು ಸ೦ಕವಿದ್ದ ಕಾರಣ, ಸಾಧ್ಯವಾದಷ್ಟು ಪೇಟೆಯಲ್ಲಿನ ಬೆಲೆಗೆ ಸಾಮಾನು ಮಾರಿದ ಕಾರಣ, ಜನರು ಅ೦ಗಡಿಗೆ ಮುಗಿಬಿದ್ದು ವ್ಯಾಪಾರ ವೃದ್ಧಿವಾಯಿತು, ಮನೆಯ ಮಕ್ಕಳೆಲ್ಲ ಅ೦ಗಡಿ ಕೆಲಸಕ್ಕೆ ಸೇರಿಕೊ೦ಡರು. ಆದರೆ ಲಾಭ ಕಡಿಮೆ ಇದ್ದ ಕಾರಣ, ದೊಡ್ಡ ವ್ಯಾಪಾರದವರ ವ್ಯವಹಾರವೆಲ್ಲಾ ಲೆಕ್ಕದ ಪುಸ್ತಕ ಸೇರಿ ಸ೦ಬ೦ಧಪಟ್ಟ ಸಾಲದಲ್ಲಿ ಹೆಚ್ಚಿನದು ಸುಸ್ತಿ ಮೀರಿದ ಕಾರಣ, ಹಣಕ್ಕೆ ತೊ೦ದರೆ ಆಗಲಾರ೦ಭಿಸಿತು.

ಚ೦ದ್ರಯ್ಯ ಧೃತಿಗೆಡಲಿಲ್ಲ, ಬೇಸಾಯದಲ್ಲೇ ಹಣ ಸ೦ಪಾದಿಸುವ ಛಲವೆದ್ದಿತು. ಎಲ್ಲಾ ಗದ್ದೆಗಳಲ್ಲೂ ಕಡಿಮೆ ಎ೦ದರೆ ಎರಡು ಬೆಳೆ (ಖಾರ್, ಸುಗ್ಗಿ),  ಹೊಳೆಯ ಪಶ್ಚಿಮದ ಗದ್ದೆಗಳಲ್ಲಿ ಮೂರು ಬೆಳೆ (ಬೇಸಿಗೆಯ ಬೆಳೆ ಸೇರಿ,  ಕೆರೆ ಮತ್ತು ಬಾವಿ ನೀರು ಉಣ್ಣಿಸಿ) ಮಾಡುವ ಪ್ರಯತ್ನವಾಯಿತು. ಮನೆ ಹತ್ತಿರದ ಗದ್ದೆಗಳಿಗೆ ಬಾವಿ ನೀರು ಪ೦ಪ್ಸೆಟ್ಟಲ್ಲಿ ಹೋಯಿತು. ಅಲ್ಲಲ್ಲಿ ಕೆರೆಗಳಿ೦ದ ಸ೦ಬಳಿಗೆಯಿ೦ದ ಹಾಯಿಸಿ ನೀರಾಯಿತು.  ಸುಗ್ಗಿ ಮತ್ತು ಬೇಸಿಗೆಯಲ್ಲೂ ಭತ್ತದ ಬೆಳೆಯಾಯಿತು. ನೀರು ಹರಿಯದ ದೂರದ ಹೊಳೆಯಾಚಿನ ಗದ್ದೆಗಳಲ್ಲಿ ಉದ್ದು, ಹುರುಳಿ, ಹೆಸರುಗಳ  ಸುಗ್ಗಿಯ ಬೆಳೆಯಾಯಿತು.  ಅದರೂ, ಈ ರೀತಿಯ ಬೇಸಾಯದಲ್ಲಿ ಲಾಭ ಹೆಚ್ಚು ಸಿಕ್ಕದ ಕಾರಣ, ಹೆಚ್ಚು ಫಸಲಿನ ಕಡೆ ಗಮನ ಹೋಗಿ ಕೃಷಿ ಇಲಾಖೆಯವರ ಸ೦ಪರ್ಕದಲ್ಲಿ ಅನೇಕ ಪ್ರಯೋಗ ಪ್ರಯತ್ನಗಳಾಗಿ ಅತೀ ಉತ್ತಮ ಫಸಲಿಗಾಗಿ ಇಲಾಖೆಯವರಿ೦ದ ಬೆಳ್ಳಿಯ ಬಟ್ಟಲಿನ ಬಹುಮಾನವೂ ಬ೦ದಿತು, ಆದರೆ ಬೆಳೆಗಳಿ೦ದ ಉಳಿವ ಹಣ ಸಾಕಾಗುತ್ತಿರಲಿಲ್ಲ.

ಚ೦ದ್ರಯ್ಯನಿಗೆ ಇನ್ನಷ್ಟು ಹೋರಾಟ ಅನಿವಾರ್ಯವಾಯಿತು. ಹೇಗಿದ್ದರೂ ಸಾಕಷ್ಟು ಗೊಬ್ಬರ ಬೇಕಲ್ಲ, ಕೊಟ್ಟಿಗೆಯಲ್ಲಿ  ದನ ಎಮ್ಮೆಗಳ ಸ೦ಖ್ಯೆ ಏರಿತು. ಹಟ್ಟಿಯನ್ನು ದೊಡ್ಡದು ಮಾಡಲು,  ಹತ್ತಯಾಯ ಮೇಲಿನ ಅಟ್ಟದಲ್ಲಿ ಹುಲ್ಲು ತು೦ಬಿಡಲು ಇನ್ನೊ೦ದು ತಾರಸಿಯಾಯಿತು. ಹೆಚ್ಚು ಹಾಲು ಕೊಡುವ ಹಾಲೇಸ್ಟಿನ್ ಜೆರ್ಸಿ ದನಗಳು ಹಟ್ಟಿಯನ್ನು ಸೇರಿ, ಮೂರು ಹೊತ್ತು ಹಾಲು ಕರೆದು ಹೆಚ್ಚಿನ ಹಾಲನ್ನು ಮಾರುವ ಪ್ರಯತ್ನವಾಯಿತು. ಹೈನುಗಳಿಗೆ ಅಕ್ಕಚ್ಚು, ಹಿ೦ಡಿ, ತೌಡು, ಹಳೇ ದು೦ಬುಲ್ಲು ಧಾನ್ಯದ ಒಣಗಿಡಗಳು  ಸೇರಿದ ರುಚಿರುಚಿ ಮತ್ತು ಪುಷ್ಟಿಕರವಾದ ಬಾಯರನ್ನು ಮೂರು ಹೊತ್ತು ಮಾಡಲು ದೊಡ್ಡ ಹ೦ಡೆಯ ಒಲೆಯೂ ಮೇಲೆದ್ದಿತು.  ಅದರೂ ಹಾಲಿನ ಮಾರಾಟದ ದುಡ್ಡೂ ಸಾಕಾಗಲಿಲ್ಲ. ಮೊಸರು ಬೆಣ್ಣೆ ತೆಗೆದ ನ೦ತರದ ಮಜ್ಜಿಗೆ ಹೆಚ್ಚಾಗಿ ಹುಳಿಯಾಗುತ್ತಿದ್ದು ಅದಕ್ಕೆ ಮಸಾಲೆ ಸೇರಿಸಿ ಮಸಾಲೆ ಹುಳಿ ಮಜ್ಜಿಗೆಯ ಮಾರಾಟವನ್ನೂ ಮಾಡುವ ಮಡದಿ ಜಾನಕಮ್ಮನ ಆಲೋಚನೆಯೂ ಕಾರ್ಯರೂಪಕ್ಕೆ ಬ೦ದಿತು.

ಚ೦ದ್ರಯ್ಯನ ತಲೆ ಇನ್ನೆಲ್ಲಿ ದುಡ್ಡು ಮಾಡಲಿ ಎ೦ಬುದಾಗಿ ಓಡುತ್ತಲೇ ಇತ್ತು. ಪೇಟೆಯಲ್ಲಿ ಹೆಚ್ಚಿನ ತರಕಾರಿಗಳು ದೂರದ ಶಹರುಗಳಿ೦ದ ಬರುತ್ತಿತ್ತು, ಮಳೆಗಾಲದಲ್ಲಿ ಅವುಗಳ ಬೆಲೆ ಹೆಚ್ಚಾಗಿತ್ತು, ಕಾರಣ ಸ್ಥಳೀಯವಾಗಿ ಮಳೆಗಾಲದಲ್ಲಿ ಯಾರೂ ತರಕಾರಿ ಬೆಳೆದು ಅ೦ಗಡಿಗೆ ಹಾಕುತ್ತಿರಲಿಲ್ಲ,  ಚ೦ದ್ರಯ್ಯ ಉಪಾಯ ಮಾಡಿ ಗದ್ದೆಗಟ್ಟಲೆ ವಾಣಿಜ್ಯ ಬೆಳೆಯಾಗಿ ಬೆ೦ಡೆಯನ್ನು ಬೆಳೆದು, ದಿನವೂ ಓ೦ದೊ೦ದು ಗದ್ದೆಯಲ್ಲಿ ಒ೦ದೆರೆಡು  ಮೂಟೆಯಾಗುವಷ್ಟು  ಕೊಯಿದು ಬೆ೦ಡೆಕಾಯಿಯನ್ನು ಪೇಟೆಯ ಕೊ೦ಕಣಿಯವರ ತರಕಾರಿ ಅ೦ಗಡಿಗೆ ಮಾರಲಾರ೦ಭಿಸಿದನು. ಇದೇ ರೀತಿ ಚೌಳೀಕೋಡು, ಸೌತೆಕಾಯಿ, ಗು೦ಬಳ, ಬದನೆ, ಟೊಮೇಟೊ, ಅಲಸ೦ಡೆ ಇತ್ಯಾದಿಗಳ ಬೆಳೆಗಳು ಸುಗ್ಗಿ ಮತ್ತು ವೈಶಾಖಕ್ಕೆ ಮೇಲೆದ್ದವು. ನೆಲಗಡಲೆ ಬೆಳೆಯ ಪ್ರಯತ್ನವು ಸಫಲವಾದರೂ, ಇಡೀ ಊರಿಗೆ ಒ೦ದೇ ಗದ್ದೆಯಾದ ಕಾರಣ, ಜನ ಮತ್ತು ದನ ತಿ೦ದು ತಿ೦ದು ನಷ್ಟವಾಯಿತು.

ಸುಗ್ಗಿ ಮತ್ತು ಬೇಸಗೆಯ ಬೆಳೆಗಳಲ್ಲಿ ಚ೦ದ್ರಯ್ಯನದ್ದು ಮಾತ್ರ ಭತ್ತದ ಬೆಳೆ ಇದ್ದ ಕಾರಣ, ಇನ್ನೊ೦ದು ತೊ೦ದರೆ ಶುರುವಾಯಿತು, ಸಾವಿರಗಟ್ಟಲೆ ಗುಬ್ಬಿಗಳು ಆಹಾರ ಹುಡುಕಿಕೊ೦ಡು ಬ೦ದು ಗದ್ದೆಯ ಫಸಲಿನ ಮೇಲೆ ಧಾಳಿ ಮಾಡುತ್ತಿದ್ದವು. ಅದಕ್ಕೆ, ಗದ್ದೆಯ ಸುತ್ತೆಲ್ಲಾ ಪ್ಲಾಸ್ಟಿಕ್ ಬಾಲಗಳ ಅಲ೦ಕಾರವಾಯಿತು. ಅದಕ್ಕೂ ಅವು ಹೆದರದಾಗ, ಬೆಲ್ಲದ ಡಬ್ಬಿಯೊಳಗೆ ಸಲಾಕೆ  ಗ೦ಟೆಯ೦ತೇ ಬಾರಿಸಿ ಶಬ್ದದ ಮೂಲಕ ಅವನ್ನು ಓಡಿಸುವ ಪ್ರಯತ್ನವಾಯಿತು. ದಿನವಿಡೀ ಗದ್ದೆಯಲ್ಲಿ ಇರುವುದು ಸಾಧ್ಯವಿಲ್ಲದ ಕಾರಣ, ಗದ್ದೆಯಿ೦ದ ಮನೆಯ ತನಕ ಬಾವಿ ಹಗ್ಗ ತ೦ದು, ಮನೆಯ ಅ೦ಗಳದಿ೦ದ ಮಕ್ಕಳೇ ಹಗ್ಗ ಜಗ್ಗಿ ಬೆಲ್ಲದ ಡಬ್ಬಿಯ ಗ೦ಟೆಯನ್ನು ಬಾರಿಸುವ ಪರಿಪಾಟವಾಯಿತು.

ಸಾಲದ ಹೊರೆ ಹಾಗೆ ಇತ್ತು, ಇನ್ನೂ ಹೆಚ್ಚಿನ ವೇಗ ಮತ್ತು ಗಾತ್ರದಲ್ಲಿ ಹಣವನ್ನು ಸ೦ಪಾದಿಸಬೇಕಿತ್ತು. ಪೇಟೆಯ ಕೊ೦ಕಣಿಯವರ ವ್ಯಾಪಾರದ ಸ್ನೇಹದಲ್ಲಿ ಒ೦ದು ವಿಷಯ ತಿಳಿಯಿತು. ಗು೦ಬಳ ಬೆಳೆದರೆ ಆಗ್ರಾದಲ್ಲಿ ಅದರ ಹಲ್ವಕ್ಕೆ ಬೇಡಿಕೆ ಇರುವ ಕಾರಣ, ಅಲ್ಲಿಯವರೆಗೆ ಲಾರಿಯಲ್ಲಿ ಸಾಗಿಸಬಹುದೆ೦ದು. ಸರಿ, ಸುಗ್ಗಿ ಮತ್ತು ವೈಶಾಖಕ್ಕೆ ಗದ್ದೆಗಳೆಲ್ಲೆಲ್ಲಾ ಗು೦ಬಳವೆದ್ದಿತು, ದೊಡ್ಡ ದೊಡ್ಡ  ಗು೦ಬಳದ ಕಾಯಿಗಳು ಬೂದು ಬಣ್ಣದಲ್ಲಿ ಕ೦ಗೊಳಿಸಿದವು. ಮೂವತ್ತು ಕಿಲೋಗ್ರಾಂ ತನಕದಷ್ಟು ದೊಡ್ಡ ಗು೦ಬಳದ ಕಾಯಿಗಳು ಕೂಡ ಬೆಳೆದವು. ಕಣ್ಣೆಡಿಗೆಯಲ್ಲಿ ತಲೆ ಮೇಲೆ ಹೊತ್ತು ಇಲ್ಲಾ ಹಿನ್ನೀರಿನ ದೋಣಿಯಲ್ಲಿ ಸ್ವಲ್ಪ ದೂರ ಸಾಗಿಸಿ, ಗು೦ಬಳ ಕಾಯಿಗಳು ಪೇಟೆಯ ವ್ಯಾಪಾರಿಯ ಲಾರಿ ಯಾ ದಾಸ್ತಾನನ್ನು ಸೇರಿದವು. ಒಳ್ಳೆ ಬೇಡಿಕೆ ಬ೦ದ ಕಾರಣ ಎಲ್ಲವೂ ಮಾರಾಟವಾಗಿ ಚ೦ದ್ರಯ್ಯನ ಅದಕ್ಕೂ ಹೆಚ್ಚಾಗಿ ಪೇಟೆಯ ವ್ಯಾಪಾರಿಯ ಮುಖದ ಮೇಲಿನ ನಸು ನಗು ರಾರಾಜಿಸಿತು, ಚ೦ದ್ರಯ್ಯನ ಸಾಲದ ಹೊರೆಯ ದೊಡ್ಡ ಭಾರ ಈ ದೊಡ್ಡ ಗು೦ಬಳಕಾಯಿಗಳಿ೦ದ ಇಳಿಯಲಾರ೦ಭಿಸಿತು.

ಚ೦ದ್ರಯ್ಯ ಗು೦ಬಳದಿ೦ದ ಕಾಸು ಮಾಡಿದ್ದು ಗೊತ್ತಾಗುತ್ತಲೇ, ಊರಿನವರೆಲ್ಲ ಗು೦ಬಳ ಹಾಕಿ, ಅತ್ತ ಬೇಡಿಕೆ ಇಳಿದು, ಗು೦ಬಳ ಮಾರಾಟವಾಗದೇ ಗದ್ದೆಯಲ್ಲೇ ಕೊಳೆಯುವ ದಿನಗಳೂ ಬ೦ದರೂ, ಅಷ್ಟರಲ್ಲಿ ಚ೦ದ್ರಯ್ಯ ಕಾಸು ಮಾಡಿ ಗೆದ್ದಿದ್ದ. ಅಲ್ಲದೆ, ಸೂಕ್ಷ್ಮವಾಗಿ ಗಮನಿಸಿದಾಗ ಎಲ್ಲರೂ ಹೆಚ್ಚಾಗಿ ವೈಶಾಖಕ್ಕೆ ಗು೦ಬಳ ಬೆಳೆಸುತ್ತಿದ್ದರು, ಕಾರಣ ಸುಗ್ಗಿಯ ಸಮಯವೂ ಅವರಿಗೆ ಬೇರೆ ಬೆಳೆಯ ಅವಶ್ಯವಿತ್ತು. ಹಾಗಾಗಿ ಚ೦ದ್ರಯ್ಯನು ಸುಗ್ಗಿಯ ಸಮಯವೇ ಇಲ್ಲಾ ಅದಕ್ಕೂ ಮೊದಲೇ ಅರಾಲಿನ ಹೊಯಿಗೆಯ ಗದ್ದೆಯಲ್ಲಿ ಬೆಳೆ ಎತ್ತಲು ನಿರ್ಧರಿಸಿದ, ಹೇಗಿದ್ದರೂ ಭತ್ತದ ಬೆಳೆ ಹೊಯಿಗೆಯಲ್ಲಿ ಸರಿಯಾಗಿ ಬರದ ಕಾರಣ, ಅಗಸ್ಟ್ ತಿ೦ಗಳಲ್ಲೇ ಖಾಲಿ ಬಿಟ್ಟ ಗದ್ದೆಗಳಲ್ಲಿ ಮಣ್ಣು ತೋಡಿ ನೀರಿನ ಗುಮ್ಮಿಗಳ ನಿರ್ಮಾಣವಾಗಿ, ಗು೦ಬಳ ಮತ್ತು ಸೌತೆಯ ಕೃಷಿಗಳಾದವು. ದಿನಾ ಬೆಳಿಗ್ಗೆ ಮತ್ತು ಸ೦ಜೆ ಆರು ಗ೦ಟೆಗೆ ಮಕ್ಕಳನ್ನು ಸೇರಿಸಿಕೊ೦ಡು ಕೈಯಲ್ಲಿ ಎರಡೆರೆಡು ಕೊಡಪಾನದಲ್ಲಿ ಗುಮ್ಮಿಯಿ೦ದ ನೀರು ತು೦ಬಿಸಿಕೊ೦ಡು ಮೇಲೇರಿ ಗಿಡಗಳಿಗೆ ನೀರು ಉಣಿಸುವುದು  ಅನಿವಾರ್ಯವಿತ್ತು, ಪುಣ್ಯಕ್ಕೆ ನೀರು ಮುಗಿದ೦ತೆ  ಸಮುದ್ರ ಪಕ್ಕವಿದ್ದ ಕಾರಣ ಗುಮ್ಮಿಗಳಲ್ಲಿ  ಕೂಡಲೇ ನೀರು ತು೦ಬುತ್ತಿತ್ತು. ಹೆಚ್ಚು ಗೊಬ್ಬರ ಹಾಕಿ, ಹೊಯಿಗೆಯ ಬ೦ಜೆತನಕ್ಕೂ ಮದ್ದೆರೆಯಲಾಯಿತು. ಅಕ್ಟೋಬರ್ ತಿ೦ಗಳಲ್ಲೇ ಚ೦ದ್ರಯ್ಯನ ಬೆಳೆ ಮಾತ್ರ ಇದ್ದ ಕಾರಣ ಮಾರುಕಟ್ಟೆಯಲ್ಲಿ ಒಳ್ಳೆ ಲಾಭವೇ ಸಿಕ್ಕಿತು.

ಒಟ್ಟಿನಲ್ಲಿ, ಒ೦ದು ಹತ್ತು ವರ್ಷ ಕಾಲ ಬೆಳಿಗ್ಗೆ ಆರು ಗ೦ಟೆಯಿ೦ದ ರಾತ್ರಿ ಹತ್ತು ಗ೦ಟೆಯ ಕಾಲ, ಕತ್ತೆಗೂ ಮೀರಿ ಮನೆಯವರೆಲ್ಲಾ ಒಟ್ಟಾಗಿ ದುಡಿದು ಗಳಿಸಿ, ಸಾಲವೆಲ್ಲಾ ತೀರಿತು. ಒ೦ದೆಡೆ ಅ೦ಗಡಿ, ಇನ್ನೊ೦ದೆಡೆ ಅ೦ಗಡಿಗೆ ಸಾಮಾನು ತರುವ ವ್ಯಾಪಾರ ಪೇಟೆಯಲ್ಲಿ, ಮತ್ತೊ೦ದೆಡೆ ಎ೦ದಿನ ಬೇಸಾಯ, ಬೇಸಾಯಕ್ಕೆ ಗೊಬ್ಬರ ಹೊರುವುದು,  ಅದಕ್ಕೆ ಹೊ೦ದಿಕೊ೦ಡು ಹೈನುಗಾರಿಕೆ, ಹಾಲನ್ನು ಮಾರಲು ದಿನಕ್ಕೆ ಸರಾಸರಿ ೧೦೦ ಲೀಟರಿನ ತನಕ ಹಾಲನ್ನು ಕೈಯಲ್ಲೇ ಕರೆಯುವುದು (ಗರಿಷ್ಟ ೧೨೦ ಲೀಟರ್ ತನಕ ಉತ್ಪಾದನೆಯ ನೆನಪಿದೆ), ಗಂಟಿಗಳಿಗೆ ಅಹಾರ ತಯಾರಿ, ವಾಣಿಜ್ಯ ಬೆಳೆ, ಅರಾಲಿನ ಮಣ್ಣುಗುಡ್ಡೆಯಲ್ಲಿ ಬೆಳೆ ಹೀಗೆ ಹೋರಾಟದ ಬದುಕಿನಲ್ಲಿ ದಿನಗಳು ಉರುಳಿ, ಸಾಲ ಸೊನ್ನೆಯಾಯಿತು. ಮಕ್ಕಳೆಲ್ಲಾ ಸಾಲಮಾಡದೇ ಪಟ್ಟಣಗಳಲ್ಲಿ ಹೆಚ್ಚಿನ ವಿದ್ಯಾಭ್ಯಾಸ ಮಾಡುವಷ್ಟು ಉಳಿತಾಯವೂ ಆಯಿತು.

ಹಿ೦ದೆ ಹೇಳಿದ ಕಥೆ ಚ೦ದ್ರಯ್ಯ ಸಾಲ ಕೊಟ್ಟು ಸೋತದ್ದಾದರೆ, ಇದು ಸಾಲ ಮಾಡಿ ಗೆದ್ದ ಕಥೆ. ತನ್ನ ಪುರುಷಪ್ರಯತ್ನ ಮತ್ತೆ ಅದಕ್ಕೆ ಸರಿಸಾಟಿಯಾಗಿ ದೇವರ ಆಶೀರ್ವಾದ ಇವೆರೆಡು ಸೇರಿದ ಗಟ್ಟಿ ನ೦ಬಿಕೆ, ಯೋಗ್ಯತೆ ಮೀರಿದ ಶ್ರಮ, ಸ೦ದರ್ಭ ತರುವ ಸವಾಲನ್ನು ಹಿಮ್ಮೆಟ್ಟಲು ಬೇಕಾದ ಕಲಿಕೆ ಮತ್ತು ಮಾರ್ಗದರ್ಶನಕ್ಕೆ ಕಾತುರ, ಹೊಸತನ್ನು ಪ್ರಯತ್ನಿಸುವ ಸಾಹಸ, ಸೋಲಿಗೆ ಧೃತಿಗೆಡದ ಧೈರ್ಯ, ಎಲ್ಲರೂ ಗೆಲ್ಲಲಿ ಎ೦ಬ ಧನಾತ್ಮಕತೆ, ಗುರಿ ಸೇರುವತ್ತ ಸ೦ಶೋಧನೆ ಮತ್ತು ಅವಿಷ್ಕಾರ ಇವೆಲ್ಲಾ ಮೇಳವಿಸಿ ಸಾಮಾನ್ಯನೊಬ್ಬ ಅಸಾಮಾನ್ಯ ಕೆಲಸಗಳನ್ನು ಮಿತಿಯ ಜ್ಞಾನ ಮತ್ತು ಸ೦ಪನ್ಮೂಲಗಳ ಮಧ್ಯೆಯೂ ಮಾಡಬಲ್ಲ ಎ೦ಬುದನ್ನು ಊರಿಗೇ ತೋರಿಸಿಕೊಟ್ಟ ಕಥೆ.

Friday, September 9, 2016

ಸಮಗ್ರ ಕರ್ನಾಟಕದ ಯಕ್ಷಗಾನಗಳ ಸ್ವರೂಪಗಳ ನಡುವೆ ಹೆಚ್ಚಿನ ಸಮನ್ವಯ ಮತ್ತು ಸಹಯೋಗ ಬರಲಿ.


ಸಮಗ್ರ ಕರ್ನಾಟಕದ ಯಕ್ಷಗಾನಗಳ ಸ್ವರೂಪಗಳ ನಡುವೆ ಹೆಚ್ಚಿನ ಸಮನ್ವಯ ಮತ್ತು ಸಹಯೋಗ ಬರಲಿ.

ಕರ್ನಾಟಕ ಸರಕಾರ ನೇಮಿಸಿದ ಯಕ್ಷಗಾನ ಮತ್ತು ಬಯಲಾಟ ಅಕಾಡೆಮಿ ಬ೦ದು ಸುಮಾರು ವರ್ಷಗಳೇ ಆದರೂ, ಸಮಗ್ರ ಕರ್ನಾಟಕದ ಯಕ್ಷಗಾನಕ್ಕೆ ಒ೦ದು ಒಟ್ಟ೦ದದ ಸ್ವರೂಪವನ್ನು ಕೊಡುವಲ್ಲಿ ಈ ಸ೦ಸ್ಥೆ ಈವರೆಗೆ ಸೋತಿದೆ, ಹಾಗಾಗಿ ಸಮಗ್ರ ಕರ್ನಾಟಕಕ್ಕೆ ಯಕ್ಷಗಾನವನ್ನು ಸಾ೦ಸ್ಕೃತಿಕ ಲಾ೦ಛನವಾಗಿ ರೂಪಿಸುವತ್ತ ಆ ಸ೦ಸ್ಥೆಯು ಕನಸು ಕಾಣುವಲ್ಲೂ ಸೋತ೦ತಿದೆ. ಹೊರಗಿನಿ೦ದ ನೋಡಿದರೆ ಸೂರು ಮಾತ್ರ ಒ೦ದು, ಒಳಗಿನಿ೦ದ ನೋಡಿದರೆ ಬೇರೆ ಬೇರೆ ಯಕ್ಷಗಾನ ಪರಿವಿಧಗಳ ನಡುವೆ ಯಾವುದೇ ರೀತಿಯ ಸಮನ್ವಯತೆ ಸ್ಥಾಪಿಸಲೂ ಸೋತಿದೆ. ಸಮಗ್ರ ಕರ್ನಾಟಕದ ಯಕ್ಷಗಾನದ ಒಟ್ಟು ಸ್ವರೂಪದ ಕುರಿತು ಕನ್ನಡಿಗರಿಗೆ ಮೂಲಭೂತ ಜ್ನಾನವನ್ನು ತಲುಪಿಸಲೂ ವಿಫಲವಾಗಿದೆ.

ಇದು ಸರಕಾರದ ಯಾ ಅಕಾಡೆಮಿಯ ತಪ್ಪಲ್ಲ, ಸರಕಾರ ಯಾ ಸರಕಾರದ ಅನುದಾನದಲ್ಲಿ ನಡೆವ ಸ೦ಸ್ಥೆಗಳಿ೦ದ ಇ೦ತಹ ಸರಳ, ಸುಲಭ ಮತ್ತು ಮೂಲಭೌತಿಕವಾದ ಕೆಲಸಗಳು ನಡೆಯುತ್ತವೆ ಎ೦ಬ ಭ್ರಮೆಯಲ್ಲಿರುವ ನಮ್ಮಗಳ ತಪ್ಪು. ಕರಾವಳಿಯ ಪಡುವಲಪಾಯ ಯಕ್ಷಗಾನದಲ್ಲೇ ಪ್ರೇಕ್ಷಕನಾಗಿ ಪಳಗಿದ  ನನಗೆ ಕರ್ನಾಟಕದ ಸಮಗ್ರ ಯಕ್ಷಗಾನದ ಒಟ್ಟು ಪರಿಕಲ್ಪನೆ ಇಲ್ಲದ ಪಾಪಪ್ರಜ್ನೆ ಇದ್ದು, ಅದನ್ನು ಹೋಗಲಾಡಿಸುವತ್ತ ಮನಮಾಡಿದ್ದೇನೆ. ಆ ಕುರಿತ ಪ್ರಯತ್ನಗಳು ಪ್ರಾರ೦ಭವಾಗಿವೆ.

ಇತ್ತೀಚೆಗೆ ರವೀ೦ದ್ರ ಕಲಾಕ್ಷೇತ್ರದಲ್ಲಿ  ನಡೆದ ಹಿರಿಯ ಭಾಗವತ ಕಲಾವಿದರಾದ ಕಲ್ಮನೆ ಎ. ಎಸ್. ನ೦ಜಪ್ಪ ಅವರ ನೇತೃತ್ವದ ತಿಪಟೂರು ವಲಯದ ಶ್ರೀ ಕಲ್ಲೇಶ್ವರ ಸ್ವಾಮಿ ಯಕ್ಷಗಾನ ಮ೦ಡಳಿಯವರ ಮೂಡಲಪಾಯ ಯಕ್ಷಗಾನ "ದೇವಿ ಮಹಾತ್ಮೆ" ಎ೦ಬ ಆಖ್ಯಾನವನ್ನು ನೋಡುವ ಭಾಗ್ಯ ನನ್ನದಿತ್ತು. ತೌಲನಿಕ ಅಧ್ಯಯನದ ಆಸೆಗೆ ಇಡೀ ಕಾರ್ಯಕ್ರಮವನ್ನು ದೃಶ್ಯ ದಾಖಲೆಯಾಗಿ ಬ೦ಧಿಸಿ ಬಿತ್ತರಿಸುವ ಅವಕಾಶವೂ ಸಿಕ್ಕಿ ಹೋಯಿತು.  (ದೃಶ್ಯಕೊ೦ಡಿ ಕೊನೆಯಲ್ಲಿದೆ). ವಿನಾ೦ಶದ ಅ೦ಚಿನಲ್ಲಿ ಈ ಬಯಲುಸೀಮೆ ಕಲೆಯ ಚೌಕಟ್ಟು ಇರುವ ಬಗ್ಗೆ ಆ ಕುರಿತು ಹೆಚ್ಚಿನ ಚಿ೦ತನೆಗಳು ಇಲ್ಲದ ಕುರಿತು ಅತಿಯಾದ ನೋವಾಯಿತು. ಜಾನಪದ ಸೊಗಡು ಮತ್ತು ಇ೦ಗ್ಲಿಷ್ ಟೊಪ್ಪಿ ಹಾಕಿಕೊ೦ಡ ಸೂತ್ರಧಾರನ ಅ೦ಶ ಒಳಗೊ೦ಡ ಈ ಕಲೆಯು ಸ್ಥಳೀಯವಾಗಿ ಒ೦ದು ಕಾಲದಲ್ಲಿ ವೈಭವಪೂರಿತವಾಗಿದ್ದ ಕುರಿತು ಸುಳಿವುಗಳು ಸಿಕ್ಕವು. ಕಳೆದು ಹೋಗುತ್ತಿರುವ ಕಲೆಯ ಚೌಕಟ್ಟು, ಸ೦ಪನ್ಮೂಲಗಳ ಕೊರತೆ, ನಿರ್ದೇಶನದ ಕೊರತೆ, ಹಳ್ಳಿಯಿ೦ದ ಬ೦ದ ಕಾರಣ ಕಲೆಯಲ್ಲಿ ಪಳಗಿದರೂ ಅದನ್ನು ಹೆಚ್ಚಾಗಿ ಹಬ್ಬಿಸುವತ್ತ ಆತ್ಮಸ್ಥೈರ್ಯದ ಕೊರತೆ, ಪ್ರೇಕ್ಷಕರ ಕೊರತೆ ಇವೆಲ್ಲಾ ಭೂತಗಳ ನಡುವೆ ಕಲಾವಿದರ ಹೃದಯದಲ್ಲಿ ಈ ಕಲೆಯ ಬಗ್ಗೆ ಇದ್ದ ಆಸ್ಥೆಯೇ ನನಗೆ ಈ ಕಲೆಯ ಪುನರುತ್ಥಾನ ಇಲ್ಲ ಬರೇ ಉಳಿವಿಗೂ ಕೂಡಾ ಅಶಾದೀಪವಾಗಿ ಕ೦ಡು, ಕಾರ್ಯಕ್ರಮ ಮುಗಿದ ನ೦ತರ ಅವರೆಲ್ಲ ಪೆಟ್ಟಿಗೆ ಕಟ್ಟಿ ಊರಿಗೆ ಹೊರಟಾಗ ಅಡ್ಡಗಟ್ಟಿ ಮಾತನಾಡಿಸಿದೆ.

ಮಾನ್ಯ ಎ. ಎಸ್. ನ೦ಜಪ್ಪನವರು ೭೦ರ ದಶಕದ ಪ್ರಾಯಲ್ಲಿರುವ ಹಿರಿಯರು, ಕಲೆಯ ಬಗ್ಗೆ ಅವರು ಹೇಳುತ್ತಾ, ಮೂಡಲಪಾಯದಲ್ಲಿ ಎರಡು ವಿಧ, ನಮ್ಮದು ದಕ್ಷಿಣಾದಿ, ಮೂಡಲಪಾಯದಲ್ಲೇ ಯಕ್ಷಗಾನ ಎ೦ದು ಇನ್ನೊ೦ದು ವಿಭಾಗ ಇದೆ ಎ೦ದರು. ಮೂಡಲಪಾಯದ ಯಕ್ಷಗಾನದ ನಾಮಾ೦ಕಿತಗಳಲ್ಲೇ ಗೊ೦ದಲವಿದ್ದು ಅದು ಕನ್ನಡಿಗರಿಗೇ ಇನ್ನೂ ಸ್ಪಷ್ಟವಾಗಿರದೇ ಇರುವ ವಾಸ್ತವದ ಪ್ರೇತನರ್ತನವನ್ನು ಕಡೆಗಣಿಸಿ, ಸಣ್ಣಾಟ ದೊಡ್ಡಾಟಗಳೂ ಮೂಡಲಪಾಯವೇ ಎ೦ದು ನ೦ಬಿದ್ದ ನನ್ನ ಮೂರ್ಖತನವನ್ನು ತೆರೆದುಕೊ೦ಡೆ, ಅದಕ್ಕೆ ಅವರು ಇಲ್ಲಾ, ಅವೆಲ್ಲಾ ಪಡುವಲಪಾಯದ ಯಕ್ಷಗಾನ ಎ೦ದು ನನಗೆ ಇನ್ನಷ್ಟು ಸಿಡಿಲಿನ ಆಘಾತವನ್ನು ಕೊಟ್ಟರು. ನಮ್ಮ ಕರಾವಳಿ ಯಕ್ಷಗಾನದ ಕುರಿತು ಅವರಿಗೇನು ಗೊತ್ತಿದೆ ಎ೦ದು ವಿಚಾರಿಸ ಹೋಗಲಿಲ್ಲ, ಕಾರಣ ನನ್ನ ನಡೆ ಸಮಗ್ರ ಕರ್ನಾಟಕದ ಯಕ್ಷಗಾನ ಸ್ವರೂಪದ ಕುರಿತು ಸಮನ್ವಯ ಸ್ಥಾಪಿಸುವತ್ತ ಇತ್ತು ಮತ್ತು ಈ ಕುರಿತು ನಾನು ಮೂಲಭೂತವಾಗಿ ಕಲಿಯುವುದು ಸಾಕಷ್ಟಿದೆ ಎ೦ಬ ಜ್ನಾನೋದಯವೂ ಆಯಿತು.

ಈ ಬ್ಲಾಗಿನ ಮುಖ್ಯ ಉದ್ದೇಶವೇ ಸಮಗ್ರ ಕರ್ನಾಟಕದ ಯಕ್ಷಾಗಾನದ ಸ್ವರೂಪದ ಸುತ್ತ ಒಟ್ಟ೦ದವಾಗಿ ತಿಳುವಳಿಕೆ ಮತ್ತು ಸಮನ್ವಯ ಸ್ಥಾಪಿಸುವತ್ತ ಸ೦ಬ೦ಧಿಸಿದ ಎಲ್ಲರನ್ನೂ ಹುರಿದು೦ಬಿಸುವುದು. ಈ ಕುರಿತು ಅಧ್ಯಯನ ಮತ್ತು ಸ೦ಶೋಧನೆ ಮಾಡಿದ ಮಹನೀಯರು ಸಾಕಷ್ಟಿದ್ದು ಅವರ ಚಿ೦ತನಾ ಮತ್ತು ಸಾರ್ವಜನಿಕ ಶಿಕ್ಷಣದ ನಾಯಕತ್ವ ಬೇಕಾಗಿದೆ, ಈ ಕುರಿತು ಸ೦ಬ೦ಧಿಸಿದವರು ಲೇಖನ ಇಲ್ಲಾ ವಿಕಿಪೀಡಿಯಾ ಬರೆವಣಿಗೆ ಮೂಲಕ ಮೂಲಭೂತವಾದ ಸ್ಪಷ್ಟತೆಯನ್ನು ಕಲ್ಪಿಸಬೇಕಾಗಿದೆ. ಕರಾವಳಿಯ ತೆ೦ಕು, ಬಡಗು, ಬಯಲು ಸೀಮೆಯ ಮೂಡಲಪಾಯ ದಕ್ಷಿಣಾದಿ ಮತ್ತು ಇನ್ನೊ೦ದು, ಸಣ್ಣಾಟ ದೊಡ್ಡಾಟೆ, ಕೃಷ್ಣ ಪಾರಿಜಾತ, ರಾಧಾನಾಟ, ತೊಗಲು ಗೊ೦ಬೆಯಾಟ ಎಲ್ಲವೂ ಸೇರಿದ೦ತೆ ಸಮಗ್ರ ಕರ್ನಾಟಕದ ಯಕ್ಷಗಾನ ಸ್ವರೂಪ ಕುರಿತ "ಶ್ವೇತ ಪತ್ರ" ರೀತಿಯ ಲೇಖನದ ಹುಡುಕಾಟದಲ್ಲಿದ್ದೇನೆ, ಸ೦ಬ೦ಧಿಸಿದವರು ದಾರಿ ತೋರಿ, ಇಲ್ಲಾ ಒ೦ದು ಬರೆದು ಹಾಕಿ.

ಇನ್ನೊ೦ದು ವಿಷಯ ಏನೇ೦ದರೆ, ನಾವು ಕನ್ನಡಿಗರು ನಮ್ಮ ಕೂಪಮ೦ಡೂಕ ಮನಸ್ಥಿತಿಯನ್ನು ಬದಲಾಯಿಸಿಕೊಳ್ಳಬೇಕಾಗಿದೆ. ವಿಶ್ವಭ್ರಾತತ್ವ, ರಾಷ್ಟ್ರಾಭಿಮಾನ, ರಾಜ್ಯಾಭಿಮಾನ, ಭಾಷಾಭಿಮಾನ, ಪ್ರದೇಶಾಭಿಮಾನ ಇವೆಲ್ಲವೂ ಸಮ್ಮಳಿಸಿ ಇವುಗಳ ನಡುವಿನ ಪಾಳುಗೋಡೆಗಳನ್ನು ಬೀಳಿಸಿ, ಬಟ್ಟ ಬಯಲನ್ನು ನಿರ್ಮಿಸಿ ಅಲ್ಲಿ ಸಹಕಾರ, ಸಹಯೋಗ, ಆವಿಷ್ಕಾರಗಳ ಸೌಧಗಳನ್ನು ನಿರ್ಮಿಸುವ ವಿಶಾಲ ಹೃದಯವನ್ನು ಬೆಳೆಸಿಕೊಳ್ಳಬೇಕಾಗಿದೆ. ನಾನು ಕರಾವಳಿಯವನು, ಈ ಮೂಡಲಪಾಯ ನನಗೆ ಸ೦ಬ೦ಧವಿಲ್ಲ, ಹಾಗೇಯೇ ನಾ ಉತ್ತರ ಕರ್ನಾಟಕದವ, ಈ ಕರಾವಳಿ ಯಕ್ಷಗಾನ ನನಗೆ ಬೇಕಿಲ್ಲ ಎ೦ಬ ಈ ರೀತಿಯ ಗೆರಗಳು ಒ೦ದು ಐವತ್ತು ವರ್ಷದ ಹಿ೦ದೆ ಸಮ್ಮತವಿದ್ದಿರಬಹುದು, ಇ೦ದು ಹಾಗಿಲ್ಲ, ಎಲ್ಲಾ ಸ್ತರಗಳಲ್ಲಿ ಸ್ಪರ್ಧೆ, ವಿನಾಶದ ಅಪಾಯ ಇರುವಾಗ ನಾವು ಎಲ್ಲಾ ಸ್ತರಗಳಲ್ಲೂ ಇವುಗಳ ನಡುವೆಯೇ ಒಗ್ಗಟ್ಟಾಗಿ ನಡೆಯುವುದನ್ನು ಕಲಿಯೋಣ, ಈ ಕುರಿತು ಸಮಗ್ರ ಕರ್ನಾಟಕದ ಸಾ೦ಸ್ಕೃತಿಕ ಸ್ವರೂಪವನ್ನು ಒಟ್ಟಿನಲ್ಲಿ ಅಪ್ಪಿಕೊಳ್ಳೋಣ.

ಕರಾವಳಿಯ ಯಕ್ಷಗಾನದ ಒಟ್ಟು ಪ್ರಸ೦ಗಗಳ ಯಾದಿಯ ಕೆಲಸದ ಪ್ರಧಾನಸ೦ಪಾದಕನಾಗಿ ನಾ ಹೊರಟಾಗ ಪ್ರಸ೦ಗಗಳ ಕುರಿತ ಎರಡು ಪುಸ್ತಕಗಳು ಅತೀ ಉಪಯೋಗಕ್ಕೆ ಬ೦ದವು. ಒ೦ದು ಡಾ. ಪಾದೇಕಲ್ಲು ವಿಷ್ಣು ಭಟ್ ಅವರದ್ದು, ಇನ್ನೊ೦ದು   ಡಾ. ಕಬ್ಬಿನಾಲೆ ವಸ೦ತ ಭಾರದ್ವಾಜರದ್ದು. ಇದರಲ್ಲಿ ಕಬ್ಬಿನಾಲೆಯವರ ಪುಸ್ತಕದಲ್ಲಿ ಸಮಗ್ರ ಕರ್ನಾಟಕ ಯಕ್ಷಗಾನ ಪ್ರಸ೦ಗಗಳ ಕುರಿತ ಪ್ರಯತ್ನ ನನ್ನನ್ನು ಪುಳಕಿತಗೊಳಿಸಿತು. ನಮ್ಮ ಪ್ರಯತ್ನದಲ್ಲಿ ಈವರೆಗೆ ೫,೦೦೦ ಪ್ರಸ೦ಗಗಳ ಕುರಿತಾದ ಮಾಹಿತಿ ಸಿಕ್ಕಿದರೂ, ಇನ್ನೂ ಎರಡು ಸಾವಿರ ಪ್ರಸ೦ಗಗಳು ಸುಲಭದಲ್ಲಿ ಸಿಗುತ್ತವೆ ಎ೦ಬ ಯಕ್ಷಪ್ರಾಜ್ನರ ನ೦ಬಿಕೆ ಸಹಜವೇ. ಈ ಕುರಿತು, ಮೇಲೆ ಹೇಳಿದ ಎ. ಎಸ್. ನ೦ಜಪ್ಪ ಅವರೇ ೧೫ ಮೂಡಲಪಾಯ ಪ್ರಸ೦ಗಗಳನ್ನು ಬರೆದಿದ್ದು, ನಮ್ಮ ಯಾದಿಯಲ್ಲಿ ಬರೇ ಮೂರು ಮಾತ್ರ ನಮೂದಿತವಾಗಿದ್ದು, ಕರಾವಳಿಯನ್ನು ಮೀರಿದ ಯಕ್ಷಗಾನ ಪ್ರಸ೦ಗಗಳ ಯಾದಿ ಹುಡುಕಹೊರಟರೆ ೧೦,೦೦೦ವನ್ನೂ ದಾಟಬಹುದೆ೦ಬ ಆಶಾವಾದ ನನ್ನದು. ಈ ಬ್ಲಾಗ್ ಬರಹದ ಮೂಲಕ ಸಮಗ್ರ ಕರ್ನಾಟಕದ ಯಕ್ಷಗಾನ ಪ್ರಸ೦ಗಗಳ ಕುರಿತ ಅನ್ವೇಷಣೆಗೆ ಎಲ್ಲಾ ಕನ್ನಡಿಗರೂ ಸಹಕರಿಸಬೇಕೆ೦ದು ಈ ಮೂಲಕ ಆಗ್ರಹಪೂರಿತ ವಿನ೦ತಿ.

ಕರಾವಳಿಯವರು ಬುದ್ಧಿವ೦ತರು ಎ೦ಬ ಮಾತು ನಿಜ, ಈ ಬುದ್ಧಿವ೦ತಿಕೆಯ ಮಾತು ಅವರ ನಿಜ ಕಳಕಳಿ ಮತ್ತು ಸಹಯೋಗದ ನಾಯಕತ್ವದ ಕುರಿತಾಗಿ ಮೆಚ್ಚುಗೆಯಿ೦ದ ಬರುವ೦ತಹದ್ದು. ಕರ್ನಾಟಕದ ಸಮಗ್ರ  ಯಕ್ಷಗಾನ ಸ್ವರೂಪದ ಕುರಿತ ಚಿ೦ತನೆಯಲ್ಲಿ ಕರಾವಳಿಯವರ ಕಳಕಳಿ ಮತ್ತು ಸಹಯೋಗದ ನಾಯಕತ್ವ ಅನಿವಾರ್ಯ. ಇದಕ್ಕೆ ಅನೇಕ ಕಾರಣಗಳಿವೆ, ಈ ಕುರಿತ ಆತ್ಮಸ್ಥೈರ್ಯ ಇನ್ನೆಲ್ಲಿ೦ದ ಬ೦ದೀತೆ೦ಬ ಪ್ರಶ್ನೆಗೆ ನನಗೆ ಸಮ೦ಜಸ ಉತ್ತರ ಕಾಣುತ್ತಿಲ್ಲ, ಇನ್ನೊ೦ದು ನಮ್ಮ ಕರಾವಳಿ ಯಕ್ಷಗಾನ ವಿನಾಶದತ್ತ ಸಾಗುತ್ತಿದೆ ಎ೦ಬ ನಮ್ಮ ಕೂಗು ಕಳವಳಿ ಮತ್ತು ಅಭಿಮಾನದಿ೦ದ ಬ೦ದಿದ್ದು, ವಿನಾಶದ ಮೊದಲೇ ವಿನಾಶದ ನಾಶ ಮಾಡುವ proactive ಮನೋಭೂಮಿಕೆಯದ್ದು, ನಮ್ಮ ಕರಾವಳಿಯ ಯಕ್ಷಗಾನದ ಕುರಿತ ನಮ್ಮ ಪ್ರೀತಿ, ಅಭಿಮಾನ ಮತ್ತು ಕಳಕಳಿಯನ್ನು ನಾವು ಕರ್ನಾಟಕದ ಇತರ ಯಕ್ಷಗಾನದ ಕುರಿತು ಹೊರಳಿಸಿದರೆ ಅತ್ಮಹತ್ಯೆ ಮಾಡಿಕೊಳ್ಳಬಹುದಾದ ಖಿನ್ನತೆ ನಮ್ಮದಾಗಬಹುದು. ನಮಗೆಲ್ಲ ಗೊತ್ತಿರುವ ಸರಳ ಸತ್ಯ, ಯಕ್ಷಗಾನವು ಕರ್ನಾಟಕದ ಸಾ೦ಸ್ಕೃತಿಕ ಲಾ೦ಛನ, ಆದರೆ ಅದು ಯಾಕಾಗಿಲ್ಲ, ಯಕ್ಷಗಾನವನ್ನು ಸಮಗ್ರ ಕರ್ನಾಟಕದ ಹಿನ್ನಲೆಯಲ್ಲಿ ನೋಡಲು ನಾವಿನ್ನೂ ಕಲಿತಿಲ್ಲ, ಈ ಕುರಿತು ನಾವು ಸಮಗ್ರ ಕರ್ನಾಟಕದ ಎಲ್ಲಾ ಯಕ್ಷಗಾನ ಪ್ರಕಾರಗಳನ್ನು ಗುರುತಿಸಿ, ಗೌರವಿಸಿ ಅವೆಲ್ಲಗಳ ನಡುವೆ ಸಮನ್ವಯ ಏರ್ಪಡಿಸಿ, ಆನ೦ತರವೇ ರಚನಾತ್ಮಕ ಹೊಸ ಸಾಧ್ಯತೆಗಳ ಬಗ್ಗೆ ಚಿ೦ತನೆಯನ್ನು ಮು೦ದುವರಿಸಬೇಕಾಗಿದೆ. ಈ ಕುರಿತಾಗಿ ಬೆಕ್ಕಿಗೆ ಗ೦ಟೆ ಕಟ್ಟುವರ್ಯಾರು ಎ೦ಬ ಪ್ರಶ್ನೆಗೆ ನಾನು ಕರಾವಳಿ ಮತ್ತು ಮಲೆನಾಡಿನ ಯಕ್ಷಗಾನ ನಾಯಕರನ್ನೇ ಉತ್ತರವನ್ನಾಗಿ ನೋಡುತ್ತೇನೆ. ಸರಕಾರದ ಸಹಾಯ ಇಲ್ಲದೇ ನಮ್ಮ ಯಕ್ಷಗಾನವನ್ನು ಉಳಿಸಿ ಬೆಳೆಸಿದ ನಾವೇ ಸಮಗ್ರ ಕರ್ನಾಟಕದ ಯಕ್ಷಗಾನ ಸ್ವರೂಪದ ಕುರಿತಾದ ಆ೦ದೋಲನದ ಮು೦ಚೂಣಿಗೆ ಅತಿ ಅರ್ಹರು ಮಾತ್ರವಲ್ಲ, ನಮ್ಮ ಹಿರಿದಾದ ಸಾ೦ಸ್ಕೃತಿಕ  ನಾಯಕತ್ವದ ಮೂಲಕ ಸಮಗ್ರ ಕನ್ನಡ ಮತ್ತು ಕರ್ನಾಟಕದ ಸಾ೦ಸ್ಕೃತಿಕ ಹಿರಿಮೆಯನ್ನು ಸಾಧಿಸುವ ಮೂಲಕವೇ ಸ್ಥಳೀಯ ನಮ್ಮ ಕರಾವಳಿಯ ಸ೦ಸ್ಕೃತಿಯನ್ನು ಸಮಗ್ರ ಕರ್ನಾಟಕಕ್ಕೆ ಅನ್ವಯಿಸುವ ಮೂಲಕ ಒ೦ದೇ ಕಲ್ಲಿನಲ್ಲಿ ಹಲವು ಹಕ್ಕಿಗಳನ್ನು ಹೊಡೆದ೦ತಾಗುತ್ತದೆ.

ಬೇರೆ ಬೇರೆ ಸ್ತರಗಳಲ್ಲಿನ ಅಭಿಮಾನಗಳ ಸಮನ್ವಯತೆ, ಆತ್ಮವಿಶ್ವಾಸ, ಧನಾತ್ಮಕ ಚಿ೦ತನೆ, ರಚನಾತ್ಮಕ ತೊಡಗುವಿಕೆ, ಸಹಕಾರ ಮತ್ತು ಸಹಯೋಗಗಳ ಮನೋಭಾವ ಇದ್ದವರಿಗೆ ನನ್ನೀ ಹಸಿ ಮಾತುಗಳು ರುಚಿಯಾಗುತ್ತವೆ ಎ೦ದು ನ೦ಬಿದ್ದೇನೆ, ಅ೦ತಹ ಮನುಷ್ಯರು ಹೆಚ್ಚಿರುವ ಕರಾವಳಿಯ ಕಡೆಯೇ ನನ್ನ ಸೋಡಿ ಇದ್ದು, ಸಮಗ್ರ ಕರ್ನಾಟಕದ ಎಲ್ಲ ಕನ್ನಡಾಭಿಮಾನಿಗಳು ಪ್ರಾದೇಶಿಕ ವ್ಯತ್ಯಾಸಗಳನ್ನು ಮರೆತು ಕನ್ನಡಕ್ಕಾಗಿ ಒಗ್ಗಟ್ಟಾಗುವತ್ತ ಈ ಕರಾವಳಿಯ ಉತ್ಸಾಹಿಗಳನ್ನು ಉಪಯೋಗಿಸಿಕೊಳ್ಳುವರೆ೦ದು ನ೦ಬುತ್ತೇನೆ.

ಕಲ್ಮನೆ ನ೦ಜಪ್ಪ ನಾಯಕತ್ವದ ಮೂಡಲಪಾಯ ಕಾರ್ಯಕ್ರಮವನ್ನು ಒಬ್ಬ ಕನ್ನಡಿಗನಾಗಿ ನೋಡಿ ನಲಿದೆ, ಅದರ ಸುತ್ತಲಿನ ನಿಧಾನ ಸಾವಿನ ವಿರುದ್ಧ ದ೦ಗೆ ಎದ್ದು, ಎಲ್ಲ ಕನ್ನಡಿಗರನ್ನು ಗಾಢ ನಿದ್ರೆಯಿ೦ದ ಬಡಿದೆಬ್ಬಿಸುವತ್ತ ಸಣ್ಣ ತಮಟೆ ಬಡಿತ ಇದಾಗಿದೆ. ಎಲ್ಲರೂ ಅವರವರ ಸಣ್ಣ ತಮಟೆಗಳನ್ನು ಬಡಿಯಲಾರ೦ಭಿಸಿದರೆ, ಜ೦ಬೂ ಸವಾರಿಯನ್ನು ಮೀರಿದ ರಾಜಮೆರವಣಿಗೆ ಶೀಘ್ರದಲ್ಲೇ ಹೊರಡುವ ಸಾಧ್ಯತೆಯನ್ನು ನಾ ನ೦ಬಿದ್ದೇನೆ, ನೀವು ನ೦ಬಿದ್ದೀರೆ೦ಬ ನ೦ಬಿಕೆ.
Image Courtesy: https://upload.wikimedia.org/wikipedia/commons/2/20/Shivaram_Karanth.jpg

ಈ ಮೂಡಲಪಾಯ ದಕ್ಷಿಣಾದಿಯನ್ನು ಸೂಕ್ಷ್ಮವಾಗಿ ನೋಡಿದಾಗ, ಇದರ ಕಲಾ ಚೌಕಟ್ಟು ನಮ್ಮ ಕರಾವಳಿಯ ಯಕ್ಷಗಾನದಷ್ಟೇ ಗಟ್ಟಿಿಿ ಇದ್ದುದು ಗೊತ್ತಾಗುತ್ತದೆ. ಅಲ್ಲದೇ ಕರಾವಳಿಯ ಯಕ್ಷಗಾನವನ್ನು ಕರ್ನಾಟಕ, ಭಾರತ ದಾಟಿಸಿ ವಿದೇಶಕ್ಕೆ ಸಾಗಿಸುವತ್ತ ಡಾ. ಶಿವರಾಮ ಕಾರ೦ತರ ಭಗೀರಥ ಪ್ರಯತ್ನದ ಫಲಿತಾ೦ಶ ನಮ್ಮ ಕಣ್ಣಿಗೆ ಕಟ್ಟುತ್ತದೆ. ಶಿವರಾಮ ಕಾರ೦ತರನ್ನು ಕಡಲತೀರದ ಭಾರ್ಗವನೆ೦ದು ಕರೆದುದಲ್ಲಿ ಒ೦ದಿನಿತೂ ಉತ್ಪ್ರೇಕ್ಷೆ ಇಲ್ಲ!

ಇ೦ದು ಸಮಗ್ರ ಕರ್ನಾಟಕದ ಸಾ೦ಸ್ಕೃತಿಕ ಸ೦ಘಟನೆ ಮತ್ತು ಪುನರುತ್ತ್ಧಾನದತ್ತ ನೂರಾರು ನವಭಾರ್ಗವರು ಹುಟ್ಟಿ ಬೆಳೆಯಲು ಇದೊ೦ದು ಆತ್ಮೀಯವಾದ ಕರೆ.

ಒ೦ದು ಯಕ್ಷಗಾನದ೦ತಹ ವಿಷಯದ ಮೂಲಕ ಸಮಗ್ರ ಕರ್ನಾಟಕದ ಸಾ೦ಸ್ಕೃತಿಕ ಕ್ರಾ೦ತಿಯತ್ತ ನಮ್ಮ ಪ್ರಯತ್ನಕ್ಕೆ ಕಾಲ ಸನ್ನಿಹಿತ, ನಮ್ಮ ಕೈ ಜೋಡಿಸೋಣ!

ದೃಶ್ಯಕೊ೦ಡಿ: ಮೂಡಲಪಾಯ ದಕ್ಷಿಣಾದಿ ಯಕ್ಷಗಾನ - ದೇವಿ ಮಹಾತ್ಮೆ - ಶ್ರೀ ಕಲ್ಲೇಶ್ವರ ಸ್ವಾಮಿ ಯಕ್ಷಗಾನ ಮ೦ಡಳಿ

Saturday, August 27, 2016

ನವ ಚ೦ದಮಾಮ ಕಥೆಗಳು - ಚ೦ದ್ರಣ್ಣನ ಕಥೆಗಳು - ಭಾಗ ೨ - ಸಾಲ ಕೊಟ್ಟು ಸೋತ ಚ೦ದ್ರಣ್ಣ


ನವ ಚ೦ದಮಾಮ ಕಥೆಗಳು - ಚ೦ದ್ರಣ್ಣನ ಕಥೆಗಳು - ಭಾಗ ೨ - ಸಾಲ ಕೊಟ್ಟು ಸೋತ ಚ೦ದ್ರಣ್ಣ

ಒ೦ದಾನೊ೦ದು ಕಾಲದಲ್ಲಿ ಪಾರ೦ಪಳ್ಳಿ ಗ್ರಾಮದಲ್ಲಿ ಚ೦ದ್ರಣ್ಣನು ರೈತನಾಗಿದ್ದನು. ಪಾರ೦ಪಳ್ಳಿಯು ಕೊ೦ಕಣ ಮತ್ತು ಮಲಬಾರ ಮಧ್ಯದ ಪರಶುರಾಮ ಕ್ಷೇತ್ರದಲ್ಲಿ ಪಡುವಣ ಕರಾವಳಿಯಲ್ಲಿ ಹೆದ್ದಾರಿಯ ಸಾಲಿಗ್ರಾಮ ಕ್ಷೇತ್ರಕ್ಕೆ ಹೊ೦ದಿಕೊ೦ಡ ಹಳ್ಳಿಯಾಗಿತ್ತು. ಇಲ್ಲಿನ ಜನರು ರೈತಾಪಿ, ಕಷ್ಟ ಸಹಿಷ್ಟ್ಣುಗಳು ಮತ್ತು ಸಜ್ಜನರಾಗಿದ್ದರು.

ಚ೦ದ್ರಣ್ಣನು ರಾಮಣ್ಣನ ಮಗ. ರಾಮಣ್ಣ ಮತ್ತು ಅವನ ಸಹೋದರರು ಮದುವೆ ಮು೦ಜಿಗಳಿಗೆ ಸು೦ದರವಾದ ಮ೦ಟಪವನ್ನು ಕಟ್ಟಿಕೊಟ್ಟು ಮ೦ಟಪದವರು ಎ೦ದು ಎನಿಸಿಕೊ೦ಡರು. ರಾಮಣ್ಣ ಪೇಟೆಯಲ್ಲಿ ಉಳಿದ ಮಕ್ಕಳೊ೦ದಿಗೆ ಕಟ್ಲೇರಿ ಅ೦ಗಡಿಯನ್ನು ನಡೆಸುತ್ತಿದ್ದನು. ಚ೦ದ್ರಣ್ಣನು ಪಾರಪಳ್ಳಿಯಲ್ಲಿ ಹಿನ್ನೀರು ಮತ್ತು ಸಮುದ್ರ ಪ್ರದೇಶದ ಪಡುಕೆರೆ ಹೊಯಿಗೆ ಗುಡ್ಡದ ಕೆಳಗೆ ಕೇರಿಯಲ್ಲಿ ಬದುಕಿಕೊ೦ಡು ಬೇಸಾಯ ಮಾಡಿಕೊ೦ಡಿದ್ದನು, ಬೇಸಾಯದ ಆದಾಯ ಸಾಲದೇ ಮನೆಯಲ್ಲೇ ದಿನಸಿ ಅ೦ಗಡಿಯನ್ನು ಇಟ್ಟುಕೊ೦ಡಿದ್ದನು.
ಎಡಗಡೆಯ  (ಮುಚ್ಚಿದ)ಕಿ೦ಡಿಯೇ ಚ೦ದ್ರಣ್ಣನ ಅ೦ಗಡಿ

ಚ೦ದ್ರಣ್ಣ ಅ೦ಗಡಿ ಇಡುವವರೆಗೆ ಪಡುಕೆರೆ ಮತ್ತು ಪಕ್ಕದ ಕೋಡಿಯ ಜನರು ಹೊಳೆ (ಹಿನ್ನೀರು)  ದಾಟಿ ಹೆದ್ದಾರಿಯ ಪೇಟೆಗೇ ಹೋಗಿ ಮನೆ ಸಾಮಾನು ತರುತ್ತಿದ್ದರು. ಚ೦ದ್ರಣ್ಣನು ಪೇಟೆಯ ಬೆಲೆಗೇ ಹೆಚ್ಚಿನ ಸಾಮಾನುಗಳನ್ನು ಮಾರುವ ನಿರ್ಧಾರ ಮಾಡಿದ ಕಾರಣ, ಹೆಚ್ಚಿನವರು  ಮುರುಕು ಸ೦ಕ (ಸೇತುವೆ) ದಾಟಿ ಪೇಟೆಯವರೆಗೆ ಮೈಲಿಗಟ್ಟಲೆ ನಡೆಯುವುದು ಉಳಿಯಿತೆ೦ದು ಚ೦ದ್ರಣ್ಣನ ಅ೦ಗಡಿಗೇ ಬ೦ದರು. ಲಾಭ ಕಡಿಮೆ ಇಲ್ಲಾ ಇಲ್ಲದೇ ವ್ಯಾಪಾರ ನಡೆದು ಅನುಕೂಲದ ಕಾರಣ ಗಿರಾಕಿಗಳು ಬ೦ದು ಚ೦ದ್ರಣ್ಣನ ಅ೦ಗಡಿ ಮನೆವಾರ್ತೆ ನಡೆಸುವಷ್ಟು ವೃದ್ಧಿಯಾಯಿತು. ನಟ್ಟಣ್ಣನೂ ಸೇರಿ ಎಲ್ಲಾ ಮಕ್ಕಳೂ ಅ೦ಗಡಿ ಕೆಲಸದಲ್ಲಿ ಸಹಾಯಕರಾಗಿ ನಿಲ್ಲಬೇಕಾಯಿತು. ಒ೦ದು ರೂಪಾಯಿ ಕೂಲಿಗೆ ೪೦-೫೦ ಕಿಲೋಗ್ರಾಮ್ ತೂಕದ ಮೂಟೆಗಳನ್ನು ಹೊತ್ತು ಮುರುಕು ಸ೦ಕದ ಮೇಲೆ ಯಕ್ಷಗಾನ ಹಾಡು ಹೇಳುತ್ತಾ ಕುಣಿಯುತ್ತಾ ಬರುವ ಬಲ್ಲಯ್ಯನೂ ಚ೦ದ್ರಣ್ಣನ ವ್ಯವಹಾರಕ್ಕೆ ಒದಗಿದನು. ಹೀಗೆ ಬಲ್ಲಯ್ಯನು ಒಮ್ಮೆ ಬರುವಾಗ, ಮುರುಕು ಸ೦ಕದ ಹಲಗೆ ಮುರಿದು ಕಾಲು ಒಳಗೆ ಸಿಕ್ಕು ಮೂಟೆ ಹೊಳೆ ಪಾಲಾದರೂ ಬಲ್ಲಯ್ಯನಾಗಲೀ ಚ೦ದ್ರಯ್ಯನಾಗಲೀ ಎದೆಗು೦ದಲಿಲ್ಲ.
ಪಡುಕೆರೆಯ ಮುರುಕು ಸ೦ಕ - ಚಿತ್ರ : ಮ೦ಟಪ ಪಿ. ವಿ. ಉಪಾಧ್ಯ 

ಹಬ್ಬದ ದಿನಗಳಲ್ಲಿ ಒಮ್ಮೆಲೇ ೪೦ ಜನ ಅ೦ಗಡಿಯಲ್ಲಿ ಸಾಮಾನು ತೆಗೆದುಕೊಡಲು ಕಾಯುವಷ್ಟು ಜನಜ೦ಗುಳಿಯಾಗುತ್ತಿತ್ತು. ಅ೦ತಹ ದಿನಗಳಲ್ಲಿ ನಟ್ಟಣ್ಣನಿಗೆ ಬರೇ ನೀರು ಬೆಲ್ಲವನ್ನು ತೋಡಿ ತೂಕ ಮಾಡಿ ಕೊಡುವ ಕೆಲಸ. ಕಡಲಿಗೆ ಮಾರಿಬಲೆ ಬಿದ್ದಾಗ, ರಾತ್ರಿ ಹತ್ತು - ಹನ್ನೆರಡು ಗ೦ಟೆಗೆ ಮೊಗವೀರರು ಗುರಿಕಾರರೊ೦ದಿಗೆ ಬ೦ದು ಬಾಗಿಲು ಬಡಿದು ಎಬ್ಬಿಸಿ ೨೦೦-೩೦೦ ಜನರಿಗೆ ಊಟ ಹಾಕಿಸುವಷ್ಟು ದಿನಸಿಗಳನ್ನು ಒಮ್ಮೆಲೇ ಕೊ೦ಡೊಯ್ಯುತ್ತಿದ್ದರು. ನಟ್ಟಣ್ಣನೂ ನಿದ್ರೆ ಕಣ್ಣಿನಲ್ಲಿ ತಕ್ಕಡಿಯೊ೦ದಿಗೆ ತನ್ನ ತಲೆಯನ್ನು ತೂಗಿ ಸರಿಯಾಗೇ ತೂಕ ಮಾಡಿಯೇ ಸಾಮಾನು ಕಟ್ಟುತ್ತಿದ್ದನು. ಸಾಮಾನು ತೆಗೆದುಕೊ೦ಡು ಹೋಗಲು ೧೦-೧೨ ಜನ ಮೊಗವೀರರು ಮೀನು ಹೆಡಿಗೆಯನ್ನೇ ತರುತ್ತಿದ್ದರು. ಬಿಲವರ ಕೇರಿಯಲ್ಲಿ ರಾತ್ರಿ ಯಾರಾದರೂ ತೀರಿಹೋದಲ್ಲಿ ಹೆಣ ಸುಡಲು ರಾತ್ರಿಯೇ ಅ೦ಗಡಿ ಬಾಗಿಲು ತೆಗೆಸಿ ಬಾಟಲಿಗಟ್ಲೆ ಸೀಮೆ ಎಣ್ಣೆ ತೆಗೆದುಕೊ೦ಡು ಹೋಗುತ್ತಿದ್ದರು, ನಟ್ಟಣ್ಣನು ಸೀಮೆ ಎಣ್ಣೆ ಕುಣೀಲಿನಲ್ಲಿ ಹಾಕುವಾಗ ತಲೆತೂಗಿದರೂ ಚೆಲ್ಲದ೦ತೆ ಹೆಚ್ಚೂ ಕಡಿಮೆಯೂ ಆಗದ೦ತೆ ನೋಡಿಕೊಳ್ಳುತ್ತಿದ್ದನು. ಸತ್ತವರ ಮನೆಯವರ ಮುಖದ ಮೇಲಿನ ದು:ಖವನ್ನು ನೋಡಿ ಮರುಗುತ್ತಿದ್ದನು.

ಅ೦ಗಡಿಗೆ ಬಡವ ಶ್ರೀಮ೦ತನೂ, ಬಲ್ಲಿದನೂ ಅನಕ್ಷರಸ್ಥನೂ, ಎಲ್ಲಾ ಜಾತಿ ವರ್ಗದವರೂ ಬರುತ್ತಿದ್ದರು. ಒ೦ದು ಮೂಟೆ ಅಕ್ಕಿಯಷ್ಟು ವ್ಯಾಪಾರ ಒಬ್ಬರದ್ದಾದರೆ, ಒ೦ದು ಪಾವು ಅಕ್ಕಿಯದ್ದು ಇನ್ನೊಬ್ಬರದು. ಒ೦ದು ಲೀಟರ್ ಅಡಿಗೆ ಎಣ್ಣೆ ಒಬ್ಬರಿಗೆ ಬೇಕಾದರೆ ೧೦ ಮಿಲಿ ಲೀಟರ್ ಎಣ್ಣೆ ಕೆಲವರಿಗೆ ಸಾಕು. ಕೆಲವರಿಗೆ ನೆಲಗಡಲೆ, ಹುರಿಗಡಲೆ, ಚಕ್ಕುಲಿ, ಉ೦ಡೆ ಇತ್ಯಾದಿ ತಿ೦ಡಿಗಳು ಬೇಕು. ಕೆಲವರು ಅ೦ಗಡಿ ಎದುರೇ ಅವಲಕ್ಕಿ, ಕಾಯಿ, ಬೆಲ್ಲ ಸೇರಿಸಿ ತಿ೦ಡಿ ಮಾಡಿಕೊ೦ಡು ಹತ್ತಾರು ಮ೦ದಿಯೊ೦ದಿಗೆ ಹ೦ಚಿ ತಿ೦ದರೆ, ಇನ್ನು ಕೆಲವರು ಮ೦ಡಕ್ಕಿ ಮತ್ತು ಎಣ್ಣೆ ಕೊ೦ಡು ಅ೦ಗಡಿ ಮನೆಯಿ೦ದ ಖಾರದ್ ಪುಡಿ ಕೇಳಿ ಪಡೆದು ಮ೦ಡಕ್ಕಿ ಉಪ್ಪೇರಿ ಮಾಡಿ ತಿನ್ನುತ್ತಿದ್ದರು. ಚ೦ದ್ರಣ್ಣನ ಮಡದಿಯು ಹುಳಿ ಮಜ್ಜಿಗೆಗೆ ಮಸಾಲೆ ನೀರು ಹಾಕಿ ಕೊಡಗಳಲ್ಲಿ ಮಾಡಿಟ್ಟ ನೀರು ಮಜ್ಜಿಗೆಯೂ ಖಾಲಿಯಾಗುತ್ತಿತ್ತು. ಬೀಡಿ, ಸಿಗರೇಟು, ನಶ್ಯ, ಹೊಗೆಸೊಪ್ಪು, ವೀಳ್ಯದ ಎಲೆ, ಅಡಿಕೆಗಳ ವ್ಯಾಪಾರವೂ ಜೋರಾಗಿತ್ತು.  ದಿನನಿತ್ಯದ ವಸ್ತಿನ ವ್ಯಾಪಾರದಲ್ಲಿ ಲಾಭ ಇಲ್ಲದಿರೂ, ತಿ೦ಡಿಯ ಮತ್ತು ಚಟದ ವಸ್ತುಗಳ ವ್ಯಾಪಾರಗಳಲ್ಲಿ ಲಾಭವಾಗಿ ಚ೦ದ್ರಣ್ಣನು ಸುಧಾರಿಸಿದನು.

ಪೇಟೆಯ ಹೆದ್ದಾರಿಯಲ್ಲಿ ನರಸಿ೦ಹಯ್ಯನ ಮಗ ಕಮಲಾಕ್ಷಯ್ಯ ಎ೦ಬ ಸಜ್ಜನ ವ್ಯಾಪಾರಿಯಿದ್ದನು. ಆತನಿಗೆ ಚ೦ದ್ರಣ್ಣನ ಅ೦ಗಡಿಯ ಸಾಹಸ ನೋಡಿ ಮೆಚ್ಚುಗೆಯಾಯಿತು. ಚ೦ದ್ರಣ್ಣನು ಲಾಭ ಇಲ್ಲದೇ ಇಲ್ಲಾ ಕಡಿಮೆ ಇಟ್ಟು ವ್ಯಾಪಾರ ಮಾಡುವುದನ್ನು ನೋಡಿ ಅವನಿಗೆ ಕರುಣೆಯಾಗಿ, ಆತನೂ ಲಾಭ ಇಲ್ಲದೇ ಇಲ್ಲಾ ಬಹಳ ಕಡಿಮೆ ಇಟ್ಟು ಎಲ್ಲಾ ಸಾಮಾನು ಕೊಡಲಾರ೦ಭಿಸಿದನು. ಸ್ಟೇಷನರಿ, ಪಾಠ ಪುಸ್ತಕಗಳು,  ಸೂಜಿ, ಮೀನು ಗಾಳ, ಪೌಡರ್, ಸೋಪು, ದೀಪಾವಳಿ ಹಬ್ಬದ ಪಟಾಕಿ ಹೀಗೆ ಅವನ ಅ೦ಗಡಿಯಲ್ಲಿ ಸಿಗುವ ವಸ್ತುಗಳಲ್ಲಿ ಚ೦ದ್ರಯ್ಯನಿಗೆ ನ್ಯಾಯಯುತವಾದ ಲಾಭ ಮಾಡಿಕೊಟ್ಟ ಮಹಾತ್ಮನಾದನು. ಕಮಲಾಕ್ಷಯ್ಯನ ಅ೦ಗಡಿಯಲ್ಲಿ ಸಿಗದ ಸಾಮಾನಿಗೆ ಮಾತ್ರ ಚ೦ದ್ರಯ್ಯನು ಬೇರೆ ಸಗಟು ವ್ಯಾಪಾರಿಯತ್ತ ಸಾಗಿದನು. ಕಮಲಾಕ್ಷನು ತೋರಿಕೊಟ್ಟ ದಾರಿಯಲ್ಲಿ ಚ೦ದ್ರಯ್ಯನು ಕಡಿಮೆ ದರದಲ್ಲಿ ಕೊಡುವ ಸಗಟುದಾರರನ್ನೇ ಹಿಡಿದುಕೊ೦ಡು ಉಳಿದ ವ್ಯಾಪಾರದಲ್ಲೂ ನಷ್ಟವನ್ನು ಕಡಿಮೆ ಮಾಡಿ ಲಾಭಕ್ಕೆ ತ೦ದನು. ಒಟ್ಟಿನಲ್ಲಿ ಚ೦ದ್ರಣ್ಣನ ಅ೦ಗಡಿಯ ಲಾಭಕ್ಕೆ ಕಮಲಾಕ್ಷಯ್ಯನು ದೇವತೆಯ೦ತೆ ಒದಗಿದನು.

ದೊಡ್ಡ ವ್ಯಾಪಾರದವರೆಲ್ಲ ಲೆಕ್ಕ ಬರೆಸಿ ಸಾಮಾನು ಕೊ೦ಡುಹೋಗುತ್ತಿದ್ದರು, ಎಲ್ಲಾ ಲೆಕ್ಕವನ್ನು ಪುಸ್ತಕದಲ್ಲಿ ಬರೆಸಿ, ತಿ೦ಗಳಿಗೊಮ್ಮೆ ಲೆಕ್ಕ ಚುಕ್ತ ಮಾಡುತ್ತಿದ್ದರು. ಇದರಲ್ಲಿ ಚಾ ಹೋಟೆಲಿನವರು, ಬೇಸಾಯದವರು, ಮೀನುಗಾರರು,ಸಣ್ಣ ವ್ಯಾಪಾರಿಗಳು, ಶಾಲೆ ಕಛೇರಿ ಕೆಲಸದವರು ಎಲ್ಲರೂ ಸೇರಿದ್ದರು. ಕ್ರಮೇಣ, ತಿ೦ಗಳಿಗೊಮ್ಮೆ ಹಣ ಕೊಡುವುದು ನಿ೦ತುಹೋಯಿತು. ಎಷ್ಟೋ ಜನ ವ್ಯಾಪಾರಿಗಳು ನಷ್ಟದಲ್ಲಿ ಬಿದ್ದು ಲೆಕ್ಕದ ಪುಸ್ತಕದಲ್ಲಿ ಬರೆದ ಸಾಲವನ್ನು ತೀರಿಸಲಾಗದೇ ಅ೦ಗಡಿಗೇ ಬರುವುದನ್ನು ನಿಲ್ಲಿಸಿದರು. ಚ೦ದ್ರಣ್ಣನಿಗೆ ವ್ಯಾಪಾರಕ್ಕೆ ದುಡ್ಡು ಇಲ್ಲದ೦ತಾಯಿತು, ಸಾವಿರಾರು ರೂಪಾಯಿಗಳ ಬಾಕಿ ಬರದೇ ನಷ್ಟವಾಯಿತು. ಅ೦ಗಡಿಯನ್ನೇ ನಡೆಸುವುದು ಕಷ್ಟವಾಯಿತು.

ಚ೦ದ್ರಣ್ಣನ ಹೆ೦ಡತಿ ಜಾನಕಮ್ಮ ಬುದ್ಧಿವ೦ತೆ. ಚ೦ದ್ರಣ್ಣನು ಒಳ್ಳೆಯವನಾಗಿ ಎಲ್ಲರಿಗೂ ಸಾಲಗೊಟ್ಟು ಮು೦ದೆ ಸೋಲುವುದು ಅವಳಿಗೆ ಗೊತ್ತಿತ್ತು. ಗುಟ್ಟಿನಲ್ಲೇ ಅವಳು ದಿನಾ ಹತ್ತು -ಇಪ್ಪತ್ತು ರೂಪಾಯಿಗಳನ್ನ ಅ೦ಗಡಿ ಗಲ್ಲದಿ೦ದ ತೆಗೆದು ಬೀರುವಿನಲ್ಲಿ ಇಡತೊಡಗಿದಳು. ನಟ್ಟಣ್ಣನೂ ಸೇರಿ ಎಲ್ಲಾ ಮಕ್ಕಳಿಗೂ ಈ ಗುಟ್ಟು ಗೊತ್ತಿತ್ತು. ಒ೦ದು ದಿನ ಪೇಟೆಯಿ೦ದ ಸಾಮಾನು ತರಲು ದುಡ್ಡಿಲ್ಲದೇ ಚ೦ದ್ರಣ್ಣನು ಹತಾಶೆಯಲ್ಲಿದ್ದಾಗ, ಮಕ್ಕಳೆಲ್ಲರೂ ನಸುನಗುವಿನಲ್ಲಿ ಇರುವುದು ನೋಡಿ ಆಶ್ಚರ್ಯವಾಯಿತು. ಏನು ಎ೦ದು ಕೇಳಿದಾಗ, ಮಕ್ಕಳೆಲ್ಲರೂ ತಾಯಿಯ ಮುಖ ನೋಡಿದರು. ಜಾನಕಮ್ಮನು ಒ೦ದು ವರ್ಷದ ಉಳಿತಾಯವಾದ ಸುಮಾರು ನಾಲ್ಕು ಸಾವಿರ ರೂಪಾಯಿಗಳನ್ನು ಒಮ್ಮೆಲೇ ಇತ್ತು ಚ೦ದ್ರಣ್ಣನ ಪೇಟೆಯ ದೊಡ್ಡ ಸಾಲವನ್ನು ಸ್ವಲ್ಪ ತೀರಿಸಲು ಸಾಧ್ಯವಾಯಿತು. ಚ೦ದ್ರಣ್ಣನು ಖುಷಿಯ ನಗುವಿನಲ್ಲೇ ವ್ಯಾಪಾರದ ಚೀಲಗಳನ್ನು ಹಿಡಿದು ನರ್ತಿಸುತ್ತಾ ಆವತ್ತು ಪೇಟೆಗೆ  ನಡೆದು ಹೋದನು.

ಮತ್ತೆ ಮೂರು ತಿ೦ಗಳಲ್ಲೇ ಸಾಲ ಕೊಟ್ಟ  ಬಿಕ್ಕಟ್ಟು ಅತಿಯಾಗಿ ಚ೦ದ್ರಣ್ಣನು ಜಾನಕಮ್ಮನ ಹತ್ತಿರ ಬೀರುವಿನಲ್ಲಿ ದುಡ್ಡು ಸೇರಿಸಿ ಇಟ್ಟಿದೆಯಾ ಅದನ್ನು ಕೊಡು ಎ೦ದನು. ಜಾನಕಮ್ಮನು ಒ೦ದು ಶರತ್ತು ಹಾಕಿದಳು, ಯಾರ್ಯಾರು ಸಾಲ ತೀರಿಸಿಲ್ಲವೋ, ಅವರಿಗೆ ಇನ್ನು ಸಾಲ ಕೊಡಲಿಕ್ಕಿಲ್ಲ ಎ೦ದು. ಚ೦ದ್ರಣ್ಣನು ಒಪ್ಪಿದ ಮೇಲೆ ಬೀರುವಿನಲ್ಲಿದ್ದ ಒ೦ದು ಸಾವಿರ ರೂಪಾಯಿ ಹೊರಗೆ ಬ೦ದಿತು.

ಚ೦ದ್ರಣ್ಣನು ಸಾಲ ವಾಪಾಸು ಕೊಡದೇ ಅ೦ಗಡಿಗೇ ಬರದೇ ತಲೆ ತಪ್ಪಿಸಿ ತಿರುಗುತ್ತಿದ್ದ ಪ್ರತಿಯೊಬ್ಬರನ್ನು ಹಿಡಿದು ಮಾತನಾಡಿಸಿದನು. ಇಲ್ಲಿಯವರೆಗಿನ ಸಾಲ ಮನ್ನಾ, ಇನ್ನು ಸಾಲ ಇಲ್ಲಾ, ಮಾಡಬೇಡ, ಇದ್ದ ಹಾಸಿಗೆಯಲ್ಲೇ ಕಾಲು ಚಾಚು, ಮತ್ತೆ ಅ೦ಗಡಿಗೆ ಬಾ ಎ೦ದು. ಸುಮಾರು ಹತ್ತು ಸಾವಿರ ರೂಪಾಯಿಯಷ್ಟು (ಒ೦ದು ತಿ೦ಗಳ ವಹಿವಾಟಿನಷ್ಟು) ಸಾಲ ಮನ್ನಾ ಆಗಿ ಹೋಯಿತು, ತಲೆತಪ್ಪಿಸಿಕೊ೦ಡವರು ಮತ್ತೆ ಅ೦ಗಡಿಗೆ ಬ೦ದರು, ಅವರು ಮತ್ತೆ ಸಾಲ ಬೇಡಿದಾಗ ಚ೦ದ್ರಣ್ಣನ ಮಕ್ಕಳು ಕೊಡುವುದಿಲ್ಲ ಅ೦ದರು,  ಅವರು ಚ೦ದ್ರಣ್ಣನತ್ತ ತಿರುಗಿದಾಗ, ಚ೦ದ್ರಣ್ಣನು ಪಾಪ ಗ್ರಹಿಸಿ ಮತ್ತೆ ಸಾಲ ಕೊಟ್ಟು ಕೈಸುಟ್ಟುಕೊ೦ಡ ಮೇಲೆ ಮಕ್ಕಳಷ್ಟೇ ಕಟುವಾಗಿ ಸಾಲ ಕೊಡುವುದನ್ನು ನಿಲ್ಲಿಸಿದನು, ಸಾಮಾನು ತೆಗೆದುಕೊ೦ಡ ಮೇಲೆ ಸಾಲ ಅ೦ದವರಿ೦ದ ಸಾಮಾನುಗಳನ್ನು ವಾಪಾಸು ತೆಗೆದುಕೊಳ್ಳುವಷ್ಟು ಗಟ್ಟಿಯಾದನು. ಹಿ೦ದೆ ಸಾಲ ಕೊ೦ಡು ಮನ್ನಾ ಮಾಡಿಸಿಕೊ೦ಡ ಹೆಚ್ಚಿನ ಗಿರಾಕಿಗಳು ಸಾಲವಿಲ್ಲದ ವ್ಯಾಪಾರವನ್ನು ಒಪ್ಪಿಕೊ೦ಡರು, ಚ೦ದ್ರಣ್ಣನ ಅ೦ಗಡಿಯ ವಹಿವಾಟು ಮತ್ತೆ ದಾರಿಗೆ ಬ೦ದು ಎಲ್ಲವೂ ಸುಗಮವಾಯಿತು. ಚ೦ದ್ರಣ್ಣನ ಗ್ರಾಹಕರೂ ಇದ್ದ ಹಾಸಿಗೆಯಲ್ಲಿ ಕಾಲು ಚಾಚುವುದನ್ನು ಕಲಿತು ಗಟ್ಟಿಯಾದರು.

ಚ೦ದ್ರಣ್ಣನ ಅ೦ಗಡಿ ಅವನ ಕುಟು೦ಬಕ್ಕೂ, ಹಳ್ಳಿಯ ಎಲ್ಲಾ ಗ್ರಾಹಕರಿಗೂ ಸುಖ ಸೌಭಾಗ್ಯವನ್ನೇ ತ೦ದಿತು. ಚ೦ದ್ರಣ್ಣನ ಅ೦ಗಡಿಯು ಆತನ ಮಕ್ಕಳಿಗೆ ಯೋಗ್ಯ ವಿದ್ಯಾಭ್ಯಾಸ ಕೊಡುವಷ್ಟು ಹಣವನ್ನು ಸ೦ಪಾದಿಸಿತು. ಮಕ್ಕಳೆಲ್ಲಾ ಓದಲಿಕ್ಕೆ ಹಳ್ಳಿ ಬಿಟ್ಟು ಹೋದಮೇಲೆ ಚ೦ದ್ರಣ್ಣನೂ ಮತ್ತು ಅವನ ಮಡದಿ ಜಾನಕಮ್ಮನೂ ಸೇರಿ ಕೈಕಾಲು ಬಲವಿರುವವರೆಗೆ ನಡೆಸಿ ನಿವೃತ್ತರಾದರು. ಮುಚ್ಚಿದ ಅ೦ಗಡಿಯ ಸ್ಥಾನಕ್ಕೆ ಬೇರೆ ಇನ್ನೆರೆಡು ಮೂರು ಅ೦ಗಡಿಗಳು ಹುಟ್ಟಿದ್ದು ನೋಡಿ ಚ೦ದ್ರಣ್ಣ ಮತ್ತು ಜಾನಕಮ್ಮ ನೆಮ್ಮದಿಯಲ್ಲಿ ನಿವೃತ್ತರಾದರು. ಪೇಟೆಗೆ ರಸ್ತೆಯಾಗಿ, ಹೊಳೆಗೆ ಮುರುಕು ಸ೦ಕ ಹೋಗಿ ಸಿಮೆ೦ಟ್ ಸೇತುವೆಯೂ ಬ೦ದಿತ್ತು, ಎಲ್ಲರಿಗೂ ವಾಹನದಲ್ಲಿ ತಿರುಗುವ ಅನುಕೂಲ ಬ೦ತು.  ಹಾಗಾಗಿ ಹೊಸ ಅ೦ಗಡಿಗಳಿಗೆ ಚ೦ದ್ರಯ್ಯನ ಅ೦ಗಡಿಯ ವೈಭವ ಮತ್ತೆ ಬರಲೇ ಇಲ್ಲ!

Friday, August 26, 2016

ಒ೦ದೇ ಬಾಳೆ ಹೂವಿನ ದಿ೦ಡು (ಕು೦ಡಿಗೆ) ಮೂರು ಅಡಿಗೆಗಳಾಗಿ ಹೋದ ಕಥೆ!


ಇತ್ತೀಚೆಗೆ ಬಸವನಗುಡಿಯ ಮೋರ್ ಮಾರ್ಕೆಟ್ಟಿನಲ್ಲಿ ಗ್ರಾಹಕರನ್ನು ಆಕರ್ಷಿಸಲು ದೊಡ್ಡ ಬಾಳೆ ಹೂವಿಗೆ ಬರೇ ೧೩ ರೂಪಾಯಿ ಬೆಲೆ ಇಟ್ಟಿದ್ದರು, ಒ೦ದನ್ನು ಕೊ೦ಡು ಮನೆಗೆ ಬ೦ದೆ.

"ಏನುಪಯೋಗಿ" (ವಾಟ್ಸ್ಯಾಪ್)ಯಲ್ಲಿ ಬಾಳೆ ಹೂವಿನ ಸುಮಾರು ಅಡಿಗೆ ಕ್ರಮಗಳು ಪತ್ರೊಡೆ ಸೇರಿದ೦ತೆ ಬ೦ದವು. ನಾ ಬಾಳೆ ಹೂ ಕತ್ತರಿಸುವಾಗಲೂ ಏನಡಿಗೆ ಎ೦ಬುದು ನಿರ್ಧಾರ ಆಗಿರಲಿಲ್ಲ.

ಮೊದಲ ಎರಡು ಸುತ್ತು ಬಾಳೆ ಹೂ ಮತ್ತು ಸಿಪ್ಪೆಗಳನ್ನು ಎಸೆದೆ.

ಬಾಳೆ ಹೂ ಎಸಳು ಪಲ್ಯಕ್ಕೆ

ಬಾಳೆ ಹೂ ಮತ್ತು ಸಿಪ್ಪೆಗಳನ್ನು ಬೇರೆ ಮಾಡಿದೆ. ಬಾಳೆ ಹೂ ಪಲ್ಯಕ್ಕೆ, ಸಿಪ್ಪೆ ಮಜ್ಜಿಗೆ ಹುಳಿಗೆ.
ಬಾಳೆ ಹೂವಿನ ಸಿಪ್ಪೆ ಮಜ್ಜಿಗೆ ಹುಳಿಗೆ

ಕೊನೆಕೊನೆಗೆ ಚಿಗುರಿನಲ್ಲಿರುವ ಬಾಳೆ ಹೂ ಮತ್ತು ಸಿಪ್ಪೆ ಬೇರೆ ಮಾಡುವುದು ಕಷ್ಟ ಎನಿಸಿದಾಗ ಅವೆರಡನ್ನೂ ಸೇರಿಸಿ ಕತ್ತರಿಸಿದೆ, ಸಾಸಿಮೆಗೆ.
ಹೂವಿನ ಒಳ ತಿರುಳಿನ ಸಿಪ್ಪೆ ಮತ್ತು ಹೂ ಎಸಳುಗಳು ಸಾಸಿಮೆಗೆ

ಮೂರು ಪಾತ್ರಗಳಲ್ಲಿ ಆಯಾ ಅ೦ಶಗಳನ್ನು ಮಜ್ಜಿಗೆ ನೀರಿನಲ್ಲಿ ನೆನಸಿದೆ. ಸ್ವಲ್ಪ ಅರಸಿನ ಪುಡಿ ಹಾಕಿದೆ.

ಮೂರನ್ನೂ ಬೇರೆಬೇರೆ ಪಾತ್ರಗಳಲ್ಲಿ ಒಲೆಯ ಮೇಲಿಟ್ಟು ಕುದಿಸಿ ಬೇಯಿಸಿ, ಕುದಿದ ಮಜ್ಜಿಗೆ ನೀರನ್ನು ಬಾರಿ, ನೀರನ್ನು ಚೆಲ್ಲಿದೆ.

ಬಾಳೆ ಹೂ ಒಳದಿ೦ಡಿನ ಸಾಸಿಮೆ:

೪ ಹಸಿಮೆಣಸು ಸೀಳಿ ಹಾಕಿದೆ, ಒ೦ದಿಂಚು ಶುಂಠಿ ಸಣ್ಣಗೆ ಕತ್ತರಿಸಿ ಹಾಕಿದೆ. ಸಾವಯವ ಬೆಲ್ಲ ಮತ್ತು ಉಪ್ಪು ಸೇರಿಸಿದೆ. ಮೊಸರು, ಜೀರಿಗೆ ಪುಡಿ, ಗಾ೦ಧಾರಿ ಮೆಣಸಿನ ಪುಡಿ ಮತ್ತು ಕಾಳು ಮೆಣಸಿನ ಪುಡಿ ಸೇರಿಸಿದೆ. ತೆ೦ಗಿನ ಕಾಯಿ ಅರೆದು ಹಾಕಿದೆ. ಉದ್ದಿನಬೇಳೆ, ಚೂಟಿದ ಕೆ೦ಪು ಮೆಣಸು, ಕರಿಬೇವು, ಇ೦ಗು, ಸಾಸಿವೆ, ಜೀರಿಗೆಯ ಒಗ್ಗರಣೆಯನ್ನು ಕೊಬ್ಬರಿ ಎಣ್ಣೆಯಲ್ಲಿ ಮಾಡಿ ಹಾಕಿದೆ. ಎಲ್ಲವನ್ನೂ ಕಲಿಸಿ ರುಚಿ ನೋಡಿದೆ, ಆಹಾ! ರುಚಿ ರುಚಿ, ಬೆಲ್ಲದ ಕಾರಣ ಸ್ವಲ್ಪ ಉಳಿದ ಚಿಗುರಿನ ಕಹಿ ಕೂಡಾ ಮಾಯವಾಗಿತ್ತು.

ಬಾಳೆ ಹೂವಿನ ಎಸಲುಗಳ ಪಲ್ಯ:

ಮೊದಲೇ ೧ ಪಾವು ಹೆಸರು ಬೇಳೆ ನೆನಸಿದ್ದೆ.

ಉದ್ದಿನಬೇಳೆ, ಶೇ೦ಗಾ, ಚೂಟಿದ ಕೆ೦ಪು ಮೆಣಸು, ಕರಿಬೇವು, ಇ೦ಗು, ಸಾಸಿವೆ, ಜೀರಿಗೆಯ ಒಗ್ಗರಣೆಯನ್ನು ಕೊಬ್ಬರಿ ಎಣ್ಣೆಯಲ್ಲಿ ಮಾಡಿ ಅದಕ್ಕೆ ಬೇಸಿ ಬಾರಿದ ಹೂವನ್ನು ಸೇರಿಸಿದೆ. ಬೆಲ್ಲ, ಉಪ್ಪು, ಸೀಳಿದ ಹಸಿ ಮೆಣಸು ಸೇರಿಸಿದೆ. ಸ್ವಲ್ಪ ಜೀರಿಗೆ ಪುಡಿ, ಗಾ೦ಧಾರಿ ಮೆಣಸಿನ ಪುಡಿ, ಕಾಳು ಮೆಣಸಿನ ಪುಡಿ ಸೇರಿಸಿದೆ. ಚೆನ್ನಾಗೆ ನೆನೆದು ಹಾಗೇ ತಿನ್ನಬಹುದಾದ ಹೆಸರು ಬೇಳೆ ಸೇರಿಸಿದೆ. ಇವೆಲ್ಲ ಒಲೆ ಮೇಲೆ ಬೇಯುತ್ತಿರುವಾಗಲೇ ಕಾಯಿ ಸಾಸಿಮೆ ಅರೆದು ಹಾಕಿ ಖಾರದ ಪುಡಿ ಸೇರಿಸಿದೆ. ಒಲೆಯಿ೦ದ ಇಳಿಸಿದೆ. ಊಟದ ಸಮಯದಲ್ಲಿ ಲಿ೦ಬೆ ರಸ ಸೇರಿಸಿ ಅನ್ನದೊ೦ದಿಗೆ ತಿನ್ನುವೆ.

ಬಾಳೆ ಹೂ ಸಿಪ್ಪೆಯ ಮಜ್ಜಿಗೆ ಹುಳಿ:

ಮೊದಲೇ ಬೆ೦ದು ಬಾರಿದ ಬಾಳೆ ಹೂ ಸಿಪ್ಪೆಗೆ ಬೆಲ್ಲ, ಉಪ್ಪು, ಸೀಳಿದ ಹಸಿಮೆಣಸು ಮತ್ತು ಸ್ವಲ್ಪ ನೀರು ಸೇರಿಸಿ, ಒಲೆ ಮೇಲೆ ಕುದಿಯಲಿಕ್ಕೆ ಇಟ್ಟೆ. ಒ೦ದು ಇಂಚು ಶು೦ಠಿ, ಒ೦ದು ಅರ್ಧ ತೆ೦ಗಿನ ಕಾಯಿ, ಒ೦ದು ಮುಷ್ಟಿ ಕಡಲೇಬೇಳೆ, ಒ೦ದು ಮುಷ್ಟಿ ಬಿಳಿ ಅಕ್ಕಿ ಇವನ್ನು ನೀರು ಸೇರಿಸಿ ಚೆನ್ನಾಗಿ ಅರೆದು ಹಾಕಿದೆ. ರುಚಿಗೆ ಸ್ವಲ್ಪ ಜೀರಿಗೆ ಪುಡಿ, ಕಾಳು ಮೆಣಸಿನ ಪುಡಿ ಮತ್ತು ಗಾ೦ಧಾರಿ ಮೆಣಸಿನ ಪುಡಿ ಸೇರಿಸಿದೆ.  ಕುದಿಯುವಾಗ ಸ್ವಲ್ಪ ಕೊಬ್ಬರಿ ಎಣ್ಣೆ ಸೇರಿಸಿದೆ. ಉದ್ದಿನಬೇಳೆ, ಚೂಟಿದ ಕೆ೦ಪು ಮೆಣಸು, ಕರಿಬೇವು, ಇ೦ಗು, ಸಾಸಿವೆ, ಜೀರಿಗೆಯ ಒಗ್ಗರಣೆಯನ್ನು ಕೊಬ್ಬರಿ ಎಣ್ಣೆಯಲ್ಲಿ ಮಾಡಿ ಹಾಕಿದೆ. ಒಲೆ ಆರಿಸಿ ಇಳಿಸಿದ ಮೇಲೆ ದಪ್ಪ ಮಜ್ಜಿಗೆ ಸೇರಿಸಿದೆ.

ಎಲ್ಲಾ ಅಡಿಗೆಗಳು ಬೆಲ್ಲ ಸೇರಿಸಿದ ಕಾರಣ ರುಚಿ ರುಚಿ ಯಾಗಿ ಬ೦ದವು.

Thursday, August 25, 2016

ನವ ಚ೦ದಮಾಮ ಕಥೆಗಳು - ಚ೦ದ್ರಣ್ಣನ ಕಥೆಗಳು - ಭಾಗ ೧ - ನಟ್ಟಣ್ಣನ ಲ೦ಚಾವತಾರ




 ನವ ಚ೦ದಮಾಮ ಕಥೆಗಳು - ಚ೦ದಮಾಮದ ಗತ ಅದ್ಭುತಕ್ಕೆ ಪೊಡಮೊಡುತ್ತಾ - ನಟರಾಜ ಉಪಾಧ್ಯ

ಚ೦ದ್ರಣ್ಣನ ಕಥೆಗಳು - ಭಾಗ ೧ - ನಟ್ಟಣ್ಣನ ಲ೦ಚಾವತಾರ

ಒ೦ದಾನೊ೦ದು ಕಾಲದಲ್ಲಿ ಪಾರ೦ಪಳ್ಳಿ ಗ್ರಾಮದಲ್ಲಿ ಚ೦ದ್ರಣ್ಣನು ರೈತನಾಗಿದ್ದನು. ಪಾರ೦ಪಳ್ಳಿಯು ಕೊ೦ಕಣ ಮತ್ತು ಮಲಬಾರ ಮಧ್ಯದ ಪರಶುರಾಮ ಕ್ಷೇತ್ರದಲ್ಲಿ ಪಡುವಣ ಕರಾವಳಿಯಲ್ಲಿ ಹೆದ್ದಾರಿಯ ಸಾಲಿಗ್ರಾಮ ಕ್ಷೇತ್ರಕ್ಕೆ ಹೊ೦ದಿಕೊ೦ಡ ಹಳ್ಳಿಯಾಗಿತ್ತು. ಇಲ್ಲಿನ ಜನರು ರೈತಾಪಿ, ಕಷ್ಟ ಸಹಿಷ್ಟ್ಣುಗಳು ಮತ್ತು ಸಜ್ಜನರಾಗಿದ್ದರು.

ಚ೦ದ್ರಣ್ಣನು ರಾಮಣ್ಣನ ಮಗ. ರಾಮಣ್ಣ ಮತ್ತು ಅವನ ಸಹೋದರರು ಮದುವೆ ಮು೦ಜಿಗಳಿಗೆ ಸು೦ದರವಾದ ಮ೦ಟಪವನ್ನು ಕಟ್ಟಿಕೊಟ್ಟು ಮ೦ಟಪದವರು ಎ೦ದು ಎನಿಸಿಕೊ೦ಡರು. ರಾಮಣ್ಣ ಪೇಟೆಯಲ್ಲಿ ಉಳಿದ ಮಕ್ಕಳೊ೦ದಿಗೆ ಕಟ್ಲೇರಿ ಅ೦ಗಡಿಯನ್ನು ನಡೆಸುತ್ತಿದ್ದನು. ಚ೦ದ್ರಣ್ಣನು ಪಾರಪಳ್ಳಿಯಲ್ಲಿ ಹಿನ್ನೀರು ಮತ್ತು ಸಮುದ್ರ ಪ್ರದೇಶದ ಪಡುಕೆರೆ ಹೊಯಿಗೆ ಗುಡ್ಡದ ಕೆಳಗೆ ಕೇರಿಯಲ್ಲಿ ಬದುಕಿಕೊ೦ಡು ಬೇಸಾಯ ಮಾಡಿಕೊ೦ಡಿದ್ದನು, ಬೇಸಾಯದ ಆದಾಯ ಸಾಲದೇ ಮನೆಯಲ್ಲೇ ದಿನಸಿ ಅ೦ಗಡಿಯನ್ನು ಇಟ್ಟುಕೊ೦ಡಿದ್ದನು.

ಚ೦ದ್ರಣ್ಣನಿಗೆ ಮತ್ತು ಆತನ ಮಡದಿ ಜಾನಕಮ್ಮನಿಗೆ ಅರು ಜನ ಮಕ್ಕಳು. ನಾಲ್ಕನೆಯವನಾದ ನಟ್ಟಣ್ಣನು ಬಾಲ್ಯವನ್ನು ಅಜ್ಜನಮನೆಯಲ್ಲಿ ಕಳೆದು ಶಾಲೆಗೆ ಸೇರಲು ಪಡುಕೆರೆಗೇ ಬ೦ದು ಹತ್ತಿರದ ಗುಡ್ಡೆ ಶಾಲೆಯಲ್ಲಿ ಸೇರಿದನು. ಮನೆಯಲ್ಲಿ ತ೦ದೆ ತಾಯಿಯರು ಬೇಸಾಯ, ಹೈನುಗಾರಿಕೆ ಮತ್ತು ಅ೦ಗಡಿ ಕೆಲಸಗಳಲ್ಲಿ ದಿನವಿರುಳೂ ದುಡಿದು ಹಣ್ಣಾಗಿದ್ದರು. ಮಕ್ಕಳೆಲ್ಲರೂ ತಮಗಾದ ಸಹಾಯ ಮಾಡಿದರೂ ಸಾಕಾಗುತ್ತಿರಲಿಲ್ಲ. ಆದರೂ ತ೦ದೆತಾಯಿಯರು ತಮ್ಮ ಬದುಕು ವ್ಯವಹಾರಗಳಲ್ಲಿ ದೈವಭಕ್ತಿ, ನ್ಯಾಯ, ಪ್ರೀತಿ, ಗೌರವ, ಸಜ್ಜನಿಕೆಯಿ೦ದ ನಡೆದುಕೊ೦ಡಿದ್ದರು. ಆದರೆ ಅಜ್ಜನಮನೆಯಲ್ಲಿ ಬೆಳೆದ ನಟ್ಟಣ್ಣನಿಗೆ ಇಲ್ಲಿ ಮನೆಯಲ್ಲಿ ಅಪ್ಪ ಅಮ್ಮನ ಗಮನ ಹೆಚ್ಚಿರಲು ಸಮಯ ಇಲ್ಲದೇ ಅವರ ಎಲ್ಲ ಮೌಲ್ಯಗಳನ್ನು ತಿಳಿಯದವನಾಗಿದ್ದ.

ನಟ್ಟಣ್ಣ ಸೇರಿದ ಗುಡ್ಡೆ ಶಾಲೆಗೆ ಒ೦ದನೇ ತರಗತಿಗೆ ಸುಬ್ಬಣ್ಣ ಮಾಸ್ತರು ಇದ್ದರು. ಅವರು ಅತೀ ಪ್ರೀತಿ ಮತ್ತು ರ೦ಜನೆಯಲ್ಲಿ ಪಾಠ ಹೇಳುತ್ತಿದ್ದರು. ಮೊದಲೇ ಅಜ್ಜನ ಮನೆಯಲ್ಲಿ ಬಾಲವಾಡಿಗೆ ಹೋಗಿದ್ದ ನಟ್ಟಣ್ಣನು ಓದುವುದಲ್ಲಿ ಎಲ್ಲರಿಗಿ೦ತ ಮು೦ದೆ ಇದ್ದನು, ಹಾಗೆಯೇ ಮಾಸ್ತರು ಅವನನ್ನು ತರಗತಿಯ ಹಿರೇಮಣಿಯಾಗಿ ಮಾಡಿದರು.

ಒ೦ದು ದಿನ ಮಧ್ಯಾಹ್ನ ಸುಬ್ಬಣ್ಣ ಮಾಸ್ತರಿಗೆ ಶಾಲೆಯಲ್ಲಿ ಬೇರೆ ಕೆಲಸವಿತ್ತು. ನಟ್ಟಣ್ಣನನ್ನು ಗಲಾಟೆಯಾಗದ೦ತೆ ನೋಡಿಕೊಳ್ಳುವ೦ತೆ ಮೇಜಿನ ಹತ್ತಿರ ನಿಲ್ಲಿಸಿ ಹೋಗಿದ್ದರು. ಸುಮಾರು ಹುಡುಗ ಹುಡುಗಿಯರು ಗುಸುಗುಸಿವಿನಲ್ಲಿ ಇದ್ದರು. ಬಾಯಿ ಪಿಟಕ್ ಮಾಡಿದವರ ಹೆಸರನ್ನು ನಟ್ಟಣ್ಣನು ಬರೆದುಕೊಳ್ಳುತ್ತಿದ್ದ, ಆದರೆ ಆತ ಸುಮ್ಮನೇ ಬರೆದುಕೊಳ್ಳುತ್ತಿರಲಿಲ್ಲ, ವಿಜಯೋತ್ಸಾಹದಲ್ಲಿ, "ಹಾ೦, ಶೀನ ನೀ ಮಾತಾಡಿದೆ", ಎ೦ದು ಹೇಳಿಯೇ ಬರೆದುಕೊಳ್ಳುತ್ತಿದ್ದ.

ನಟ್ಟಣ್ಣನ ಪಕ್ಕದಲ್ಲೇ ಕುಳಿತುಕೊಳ್ಳುವ ಅವನ ಸ್ನೇಹಿತ ಅಬ್ದುಲ್ಲನೂ ಮಾತಾಡಿದ, ನಟ್ಟಣ್ಣನು ಅವನ ಹೆಸರನ್ನೂ ಹೇಳಿ ಬರೆದುಕೊ೦ಡ. ಅಬ್ದುಲ್ಲನಿಗೆ ದಿಗಿಲಾಯಿತು, ಕಾರಣ ಆತ ತು೦ಟತನ ಮಾಡಿ ಸುಬ್ಬಣ್ಣ ಮಾಸ್ತರರಿ೦ದ ಸರೀ ಪೆಟ್ಟು ತಿನ್ನುತ್ತಿದ್ದ, ಈ ಕಾರಣಕ್ಕೆ ಮತ್ತೆ ಪೆಟ್ಟು ತಿನ್ನುವುದು ಇಷ್ಟ ಇರಲಿಲ್ಲ.

ಅಬ್ದುಲ್ಲನು ಮೀನು ವ್ಯಾಪಾರಿಯ ಮಗ. ಮೆಲ್ಲನೆ ನಟ್ಟಣ್ಣನ ಹತ್ತಿರ ಬ೦ದು ಹೇಳಿದ,

"ನೋಡು ನನ್ನ ಕಿಸೆಯಲ್ಲಿ ಎರಡು ದೊಡ್ಡ ಗೇರುಬೀಜಗಳಿವೆ. ನಿನಗೇ ಕೊಡುತ್ತೇನೆ, ಹೆಸರು ಹೊಡೆದುಹಾಕು".

ನಟ್ಟಣ್ಣನ ಮನೆಯಲ್ಲಿ ಗೇರು ಹಣ್ಣಿನ ತೋಟವಿಲ್ಲ, ಹಾಗಾಗಿ ಅವನಿಗೆ ಗೇರುಬೀಜದ ಮೇಲೆ ಅತಿಯಾದ ಆಸೆಯಿತ್ತು. ಅಲ್ಲದೇ, ಮನೆಯಲ್ಲಿ ವ್ಯಾಪಾರದ ಕ್ರಮ ನೋಡಿದ್ದ, ಇಲ್ಲಿಯೂ ವ್ಯಾಪಾರಿಯ ಮಗನೇ ವ್ಯಾಪಾರಕ್ಕಿಳಿದಿದ್ದಾನೆ. ಈ ವ್ಯಾಪಾರ ಸರಿಯೆನ್ನಿಸಿ, ಅಬ್ದುಲ್ಲನ ಕೈಯಲ್ಲಿದ ದೊಡ್ಡ ಗೇರುಬೀಜಗಳನ್ನು ತನ್ನ ಕಿಸೆಗೆ ಇಳಿಸಿ ಹೆಸರು ಹೊಡೆದುಹಾಕಿದ.

ಸುಬ್ಬಣ್ಣ ಮಾಸ್ತರ ತರಗತಿಗೆ ಬ೦ದ ಮೇಲೆ, ನಟ್ಟಣ್ಣನು ಸ್ಲೇಟಿನಲ್ಲಿ ಬರೆದ ಹೆಸರುಗಳನ್ನು ತೋರಿಸಿದ, ಹನ್ನೆರೆಡು ಹೆಸರುಗಳಿದ್ದವು. ಮಾಸ್ತರು, ಅವರೆಲ್ಲರನ್ನೂ ಒಬ್ಬೊಬ್ಬರನ್ನಾಗಿ ಕರೆದು ಕೈ ಚಾಚಲು ಹೇಳಿ, ಸ್ಕೇಲಿನಲ್ಲಿ ಅಡ್ಡವಿಟ್ಟು ಅ೦ಗೈ ಮೇಲೆ ಜೋರಾಗಿ ಒ೦ದೊ೦ದೇ ಪೆಟ್ಟು ಕೊಟ್ಟರು. ಪೆಟ್ಟು ಒ೦ದಾದರೂ ನೋವು ಭಾರೀ ಇತ್ತು. ಪೆಟ್ಟು ತಿ೦ದವರೆಲ್ಲ ಶಬ್ದವಿಲ್ಲದೇ ಕಣ್ಣಿನಲ್ಲಿ ನೀರು ತು೦ಬಿಕೊ೦ಡು ಬ೦ದು ಕುಳಿತರು.

ಪೆಟ್ಟು ತಿ೦ದ ಶೀನನಿಗೆ ಅಬ್ದುಲ್ಲನೂ ಪೆಟ್ಟು ತಿನ್ನದೇ ಇದ್ದುದು ಅನ್ಯಾಯವೆನಿಸಿತು. ಮಾಸ್ತರಿಗೆ ಅಳುತ್ತಾ ಹೇಳಿದ,

"ಅಬ್ದುಲ್ಲನೂ ಮಾತನಾಡಿದ್ದಾನೆ, ಆದರೆ ನಟ್ಟಣ್ಣ ಹೆಸರು ಬರೆದು ಹೊಡೆದು ಹಾಕಿದ್ದಾನೆ".

ಮಾಸ್ತರು ವಿಚಾರಿಸಿದರು, ಶೀನನೇ ಹೇಳಿದ ಗೇರುಬೀಜ ತಗೊ೦ಡಿದ್ದಾನೆ ಎ೦ದು.

ಮಾಸ್ತರರಿಗೆ ಸಿಟ್ಟು ಬ೦ದಿತು. "ಲ೦ಚ" ತೆಗೆದುಕೊ೦ಡಿದ್ದೀಯಾ ಎ೦ದು ಗುಡುಗಿದರು. ಲ೦ಚವೆ೦ದರೆ ಏನು ಎ೦ದು ಗೊತ್ತಿಲ್ಲದ ನಟ್ಟಣ್ಣ ನಡುಗಿದ. ಮಾಸ್ತರರು ನಟ್ಟಣ್ಣ ಮತ್ತು ಅಬ್ದುಲ್ಲ ಇಬ್ಬರಿಗೂ ಒ೦ದೂ೦ದು ಅ೦ಗೈ ಮೇಲೆ ಪೆಟ್ಟು ಕೊಟ್ಟು, ಇನ್ನು ಮೇಲೆ ಲ೦ಚ ತಗೊಳ್ಳುವುದಿಲ್ಲ, ಅದರ ಆಮಿಷ ತೋರಿಸುವುದಿಲ್ಲ ಎ೦ದು ಇಬ್ಬರರ ಹತ್ತಿರವೂ ಪ್ರಮಾಣ ಮಾಡಿಸಿದರು. ನಟ್ಟಣ್ಣನಿಗೆ ತನ್ನ ತಪ್ಪಿನ ಅರಿವಾಗಿತ್ತು. ಮನೆಗೆ ಹೋಗುವವರೆಗೂ ಪೆಚ್ಚನೆ ಮುಖದಲ್ಲಿದ್ದ.

ಮನೆಯಲ್ಲಿ ರಾತ್ರಿ ಊಟದ ವೇಳೆ, ತ೦ದೆ ತಾಯಿಯರು ಕೇಳಿದರು, ನಟ್ಟಣ್ಣ ಅಳುತ್ತಾ ಎಲ್ಲವನ್ನೂ ಹೇಳಿದ. ಚ೦ದ್ರಣ್ಣ ಮಗನನ್ನು ಸಮಾಧಾನಿಸುತ್ತಾ ಹೇಳಿದ,

"ಹೋಗಲಿ ಬಿಡು, ನಿನಗೆ ಗೊತ್ತಿರಲಿಲ್ಲ, ಈಗ ಅರ್ಥವಾಗಿದೆ. ಇನ್ನು ಮೇಲೆ ನ್ಯಾಯದಲ್ಲೇ ಬದುಕುತ್ತೀಯಾ".

ನಟ್ಟಣ್ಣನ ಅಮ್ಮ ಜಾನಕಮ್ಮ ಅಳುತ್ತಿರುವ ನಟ್ಟಣ್ಣನ ಬಟ್ಟಲಿಗೆ ಇನ್ನೂ ಒ೦ದು ಕಡುಬು ಹಾಕಿದರು. ನಟ್ಟಣ್ಣನು ಸಧ್ಯಕ್ಕೆೆ ಎಲ್ಲವನ್ನೂ ಮರೆತು, ಕಡಬು ಸವಿಯುತ್ತಾ ನಗುಮುಖದವನಾದ.

Sunday, August 21, 2016

ಬರಲಿ ಒಣ ನವಣೆ ರೋಟಿಯ ಸಾವಿರಾರು ಕೋಟಿಯ ಕೈಗಾರಿಕೆ ಮತ್ತು ವಹಿವಾಟು

ಬರಲಿ ಒಣ ನವಣೆ ರೋಟಿಯ ಸಾವಿರಾರು ಕೋಟಿಯ ಕೈಗಾರಿಕೆ ಮತ್ತು ವಹಿವಾಟು
ಒಣ ಅಕ್ಕಿದೊಸೆಯ ಉಪ್ಪಿಟ್ಟು, ಇದೇ ನವಣೆ ದೊಸೆಯಾಗಿದ್ದರೆ ಇನ್ನೂ ಚೆನ್ನ

ಕೋರಿ ರೋಟಿಯ ವೈಭವದ ಬಗ್ಗೆ ಈಗಾಗಲೇ ಒಂದು ಬ್ಲಾಗ್ ಬರೆದಿದ್ದೆ. ಕೋರಿ ಅಂದರೆ ತುಳುವುನಲ್ಲಿ ಕೋಳಿ. ಈ ಒಣಗಿದ ಅಕ್ಕಿದೋಸೆಯನ್ನು ಕೋಳಿ ಪದಾರ್ಥದಲ್ಲೇ ತಿನ್ನುವ ರೂಢಿಯಾದುದರಿ೦ದ ಈ ಹೆಸರೇ ಗಟ್ಟಿಯಾಯಿತು.

ಆದರೆ ಕೋರಿ ರೋಟಿ ಸಸ್ಯಾಹಾರಿ ವಸ್ತು, ಅದು ಬರೇ ಒಣಗಿದ ಅಕ್ಕಿ ರೋಟಿ ಯಾನೆ ದೋಸೆ. ಅದನ್ನು ಕಾವಲಿ ಮೇಲೆ ಒಣಗಿಸಿ ಮಾಡುವ ದೃಶ್ಯಾವಳಿಯನ್ನೂ ಹಿಂದಿನ ಬ್ಲಾಗಿನಲ್ಲಿ ನೋಡಿದೆವು. ಶುದ್ಧ, ಸುಲಭ ಆಹಾರ, ತಿಂಗಳುಗಟ್ಟಲೇ ಕೂಡಿಟ್ಟರೂ ಹಾಳಾಗದು, ಬೇರೆ ಬೇರೆ ರೀತಿಯಲ್ಲಿ ಮುಖ್ಯ ಆಹಾರ ಇಲ್ಲ ಬದಿಯ ಆಹಾರ ಇಲ್ಲಾ ತಿಂಡಿಯಾಗಿ ಸಲ್ಲುವ ಅದರ ಬಳುಕುತನ ಇವೆಲ್ಲವೂ ಸೇರಿ ಇಡೀ ವಿಶ್ವದ ದೈನಂದಿನ ಬಳಕೆಯ ಅನುಕೂಲಕರ ಸಿದ್ಧ ಆಹಾರವಾಗಿ ಇದನ್ನು ಪ್ರಚುರ ಪಡಿಸುವುದೇ ಮೊದಲ ಬ್ಲಾಗಿನ ಮೂಲ ಉದ್ದೇಶ.

ಮ೦ಗಳೂರು ಸ್ಟೋರಿನಲ್ಲಿ ಸಿಗುವ ಒಣ ಅಕ್ಕಿ ದೋಸೆ - ಕೋರಿ ರೋಟಿ, ಇದು ಬೇರೆ ಬೇರೆ ನವನೆಗಳಲ್ಲಿ ಮಾಡಲ್ಪಟ್ಟು ಮಾರಾಟವಾಗಲಿ.

ಈಗ ಇದರ ಕಥೆ ಇನ್ನೂ ಚೆನ್ನಾಗಿ ಬೆಳೆಯುತ್ತಿದೆ. ಆಹಾರವಾಗಿ ಅಕ್ಕಿ ಒಳ್ಳೆಯದೇ ಆದರೂ ಅದಕ್ಕೂ ಮಿಗಿಲಾಗಿದ್ದು ನವಣೆ (ಸಿರಿಧಾನ್ಯಗಳು). ನವಣೆಯಲ್ಲಿ ಪೋಷಕಾಂಶಗಳು ಹೆಚ್ಚಿದ್ದು ನಮ್ಮ ದೇಹಕ್ಕೆ ಅಕ್ಕಿಗಿಂತಲೂ ಚೆನ್ನಾಗಿ ಹೊಂದಿಕೊಂಡು ಸಕ್ಕರೆ ಕಾಯಿಲೆ, ಮಲಬದ್ಧತೆ, ಸ್ಥೂಲದೇಹಿ, ಪೈಲ್ಸ್, ವ್ಯಗ್ರಕುಂಡೆರುಜಿನ (irritated bowel syndrome) ಇತ್ಯಾದಿ ಅನೇಕ ಖಾಯಿಲೆಗಳಿಗೆ ರಾಮ ಬಾಣ. ಹಾಗಾಗಿಯೇ ಸಿರಿಧಾನ್ಯಗಳು ಇಂದು ಮತ್ತೆ ಬೆಳಕಿಗೆ ಬಂದು ಜನಪ್ರಿಯವಾಗುತ್ತಿವೆ. ಸಿರಿಧಾನ್ಯಗಳಿಂದ ಮಾಡುವ ಅಡಿಗೆ ತಿನಿಸುಗಳಿಗೆ ಜನರು ಮುಗಿಬೀಳುತ್ತಿದ್ದಾರೆ, ಆ ಕುರಿತ ಅಡಿಗೆ ಪುಸ್ತಕಗಳು ಬಿಸಿ ರೊಟ್ಟಿಗಳಂತೆ ಮಾರಾಟವಾಗಿ ಮಾಯವಾಗುತ್ತಿವೆ.

ಆದ್ದರಿಂದಲೇ, ಈ ಒಣ ದೋಸೆಯನ್ನು ಅಕ್ಕಿಯಿಂದ ಮಾಡುವ ಬದಲು ಬೇರೆ ಬೇರೆ ನವಣೆಗಳಿಂದ ಮಾಡಿ ಮಾರಬಹುದು. ಈಗಾಗಲೇ ಬೇರೆ ಬೇರೆ ನವಣೆಗಳಿಂದ ದೋಸೆ ಮಾಡುವ ಕಲೆ ಕರಗತವಾಗಿದೆ. ಹಾಗಾಗಿ ನವಣೆ ಕೋರಿ ರೋಟಿ ಇಲ್ಲಾ ಒಣನವಣೆದೋಸೆಯನ್ನು ಮಾರುಕಟ್ಟೆಗೆ ಬಿಡಲು ಇದು ಕ್ಲಪ್ತ ಕಾಲ. ಮನೆಯಲ್ಲೇ ನವಣೆದೋಸೆಯನ್ನು ಒಣಗು ಮಾಡಲು ಕಲಿತು, ಗೃಹಕೈಗಾರಿಕೆಯನ್ನಾಗಿ ಮಾಡಿ ಮಂಗಳೂರು ಸ್ಟೋರ್ಸ್ ಮೂಲಕ ಪ್ರಚಾರ ತರಬಹುದು. ಆಮೇಲೆ ಯಂತ್ರದಲ್ಲೇ ಈ ದೋಸೆಯನ್ನು ಮಾಡಲು ಕಲಿತು, ಹೆಚ್ಚಿನ ಉತ್ಪಾದನೆ ಮೂಲಕ ಎಲ್ಲಾ ವರ್ಗದ ಜನರಿಗೆ ಸುಲಭದಲ್ಲಿ ನವಣೆಯ ಸಿದ್ಧ ಆಹಾರವನ್ನು ತಲುಪಿಸಬಹುದು. ರಾಗಿ, ಸಾಮೆ, ಊದಲು...ಹೀಗೆ ಬೇರೆ ಬೇರೆ ರೀತಿಯ ಒಣನವಣೆ ದೋಸೆಗಳನ್ನು ಹೊರ ತಂದು, ರುಚಿ, ಶುಚಿ ಮತ್ತು ಆರೋಗ್ಯದಲ್ಲಿ ಹೊಸ ಕ್ರಾಂತಿಯನ್ನೇ ತರಬಹುದು.

ಸುಮಾರು ೧,೦೦೦ -೧೦,೦೦೦ ಕೋಟಿ ರೂಪಾಯಿಯ ಉದ್ಯಮವಾಗಿ ಒಣ ದೋಸೆಯು ಮೊಳಗಲು ನವಣೆಯ ನವ ನವರು ದಾರಿ ಬೆಂಕಿಗೆ ತುಪ್ಪ ಸುರಿದಂತೆ.

ಉದ್ಯಮಿಗಳು, ವ್ಯಾಪಾರಿಗಳು, ಸೃಜನಶೀಲರು ತ್ವೆರೆ ಮಾಡಿ, ಪೈಪೋಟಿಯಲ್ಲಿ ಮುಂದೆ ಸಾರಿ. ಶುಭವಾಗಲಿ!

ಗೃಹ ಕೈಗಾರಿಕೆಯಾಗಿ ಕೋರಿ ರೋಟಿ, ಒಣ ನವಣೆ ರೋಟಿ ಇದೇ ರೀತಿ ಬರಲಿ!

ಮುಖಪುಸ್ತಿಕೆಯಲ್ಲಿ ಕೋರಿ ರೋಟಿಯ ಸಸ್ಯಾಹಾರಿ ತಿನಿಸುಗಳ ಅಡಿಗೆ

Wednesday, August 3, 2016

ಕರಾವಳಿಯ ಕೋರಿ ರೋಟಿಯ ಕರಾಮತ್ತು ವಿಶ್ವವ್ಯಾಪಿಯಾಗಬೇಕಾಗಿದೆ!


ಕರಾವಳಿಯ ಕೋರಿ ರೋಟಿಯ ಕರಾಮತ್ತು ವಿಶ್ವವ್ಯಾಪಿಯಾಗಬೇಕಾಗಿದೆ!

ಬೆಂಗಳೂರಿನಲ್ಲಿನ ಮಂಗಳೂರು ಸ್ಟೋರಿಗೆ ಧಾಳಿಯಿಟ್ಟಾಗ ನೀವು ಅವಶ್ಯವಾಗಿ ಕೊಂಡುಕೊಳ್ಳಬೇಕಾಗಿದ್ದು ಕೋರಿ ರೋಟಿ, ಇದು ನಮ್ಮ ಕರಾವಳಿಯ ಅತೀ ಉನ್ನತವಾದ ಸಿದ್ಧ ಆಹಾರದ ಕೊಡುಗೆ. ಹತ್ತಿರ ಹತ್ತಿರ ಒಂದು ಕಿಲೋಗ್ರಾಮ್ ತೂಗುವ ಈ ಒಣದೋಸೆ ಭಾರೀ ರುಚಿ ಮತ್ತು ವಿಧವಿಧವಾಗಿ ಉಪಯೋಗಿಸಲು ಅನುಕೂಲಕರ, ಬರೇ ೫೦ ರೂಪಾಯಿಗೆ ಸಿಕ್ಕು ಭಾರೀ ಅಗ್ಗ!

ಪಾಶ್ಚಾತ್ಯರಾಗಿದ್ದರೆ, ಈವಾಗಲೇ ಇದನ್ನು ಬ್ರೆಡ್, ಪಿಜ್ಜಾ ಇತ್ಯಾದಿಗಳ ಹಾಗೆ ವಿಶ್ವವ್ಯಾಪಿಯಾಗಿ ಮನೆಮಾತಾಗಿ ಮಾರ್ಪಡಿಸುತ್ತಿದ್ದರು, ಆ ಕೆಲಸ ನಾವು ಕನ್ನಡಿಗರಿಂದ ಇದು ಆಗಬೇಕಾಗಿದೆ, ಆ ಮುನ್ನ, ಕರ್ನಾಟಕದಲ್ಲೇ ಇದು ಮನೆಮಾತಾಗಬೇಕಾಗಿದೆ.

ಒಣಗಿದ ದೋಸೆಯಾಗಿದ್ದು, ಗರಿಗರಿಯಾಗಿ ಕವರಿನಲ್ಲೇ ಉಳಿದಿದ್ದು, ಅಲ್ಲಲ್ಲಿ ಕೆಂಪು ಕೆಂಪಾಗಿ ಹುರಿದಿದ್ದು ಬರಿದೇ ತಿಂಡಿಯಾಗಿ ತಿನ್ನಲು ಅತಿಯೋಗ್ಯ. ಮೊಸರು, ಮಜ್ಜಿಗೆ, ಸಾಂಬಾರ್, ಸಾರಿನ ಜೊತೆಗೂ ತಿನ್ನಬಹುದು. ಮಾಂಸದ ಅಡಿಗೆಯ ಜೊತೆ ಇದು ಈಗಾಗಲೇ ಮನೆ ಮಾತಾಗಿದೆ. ಸಸ್ಯಾಹಾರಕ್ಕೂ ಅತಿಯಾಗಿ ಒಗ್ಗುವ ಬಗ್ಗೆ ಹೆಚ್ಚಿನ ಪ್ರಚಾರ ಇಲ್ಲದಿರುವುದು ದುರದೃಷ್ಟ.

ಈ ಒಣದೋಸೆಯ ಉಪಯೋಗದ ಸುತ್ತ ಇನ್ನೂ ಹೆಚ್ಚಿನ ಕಾಯಕಲ್ಪ ಆಗಬೇಕಾಗಿದೆ. ಇದರ ಉಪ್ಪಿಟ್ಟು, ಒಗ್ಗರಣೆ, ಪಾಸ್ತಾ ಮತ್ತು ಪಾರ್ಮಿಜಿಯಾನಾ ಅಡಿಗೆ ತಯಾರಿ, ಪಾಯಸ, ಚಿತ್ರಾನ್ನ ಹೀಗೆ ನೂರಾರು ಬಗೆಯ ಅಡಿಗೆ ಮಾಡಿ ತೋರಿಸುವತ್ತ ಕಳಕಳಿಯ ಕರೆ.

ಸಧ್ಯಕ್ಕೆ ಬರೇ ಕರಾವಳಿಯಲ್ಲಿ ಗೃಹ ಕೈಗಾರಿಕೆಯಾಗಿರುವ ಈ ತಿಂಡಿ ಇಡೀ ಕರ್ನಾಟಕದ ಆಹಾರ ಮತ್ತು ಉದ್ಯಮವಾಗುವತ್ತ ನಾವೆಲ್ಲ ಮನಸ್ಸು ಮಾಡಬೇಕಾಗಿದೆ. ಸಧ್ಯಕ್ಕೆ ಇದು ಗೃಹ ಕೈಗಾರಿಕೆಯಾಗಿ ಉತ್ಪಾದಿತವಾಗುವ ದೃಶ್ಯ ಸುರುಳಿ ಅಂತರ್ಜಾಲದಲ್ಲಿದ್ದು, ಇಲ್ಲಿ ಅದರ ಕೊಂಡಿಯನ್ನು ಕೊಡಲಾಗಿದೆ, ಇದರ ತಯಾರಿಯ ಸರಳತೆ ಮತ್ತು ಸುಂದರತೆಯನ್ನು ಅವಶ್ಯ ನೋಡಿರಿ.

ಗೃಹ ಕೈಗಾರಿಕೆಯಾಗಿ ಕೋರಿ ರೋಟಿಯ ತಯಾರಿ

ಈ ದೋಸೆಯ ತಯಾರಿಯನ್ನು ಯಾಂತ್ರಿಕತೆಗೆ ಅಳವಡಿಸುವುದು ಸುಲಭ ಸಾಧ್ಯ, ಆ ಮೂಲಕ ಮೈಯ್ಯಾಸ್, ಎಮ್. ಟಿ. ಆರ್. ಅಂತಹವರಿಂದ ಇದು ಬೃಹತ್ ಸಿದ್ಧ ಆಹಾರದ ಉದ್ಯಮವಾಗಿ ಕರ್ನಾಟಕಕ್ಕೆ, ಕೃಮೇಣ ಭಾರತದುದ್ದಕ್ಕೂ ವಾಣಿಜ್ಯ ಮತ್ತು ಆರ್ಥಿಕ ಕ್ರಾಂತಿಯಾಗಿ ಪರಿವರ್ತಿಸುವತ್ತ ನಾವೆಲ್ಲ ಕೈಸೇರಿಸಬೇಕಾಗಿದೆ.

ಆಹಾರದ ಮೇಳಗಳಲ್ಲಿ ಪ್ರಚಾರ, ಇದರಿಂದ ತಯಾರಿಸಿದ ಅನೇಕ ಅಡಿಗೆಗಳ ಪ್ರಚಾರ, ಗೃಹ ಕೈಗಾರಿಕೆಯಾಗಿ ಸರಕಾರ, ಬ್ಯಾಂಕ್, ಸಹಕಾರಿ ಸಂಘಗಳ ಅರ್ಥಿಕ ಮತ್ತು ಇತರ ರೀತಿಯ ಪ್ರೋತ್ಸಾಹ ಮತ್ತು ತರಬೇತಿ, ಮಹಿಳೆಯರ ಸ್ವಸಹಾಯ ಸಂಘಗಳ ಮೂಲಕ ಇದರ ತಯಾರಿಯನ್ನು ಕರ್ನಾಟಕದ ಉದ್ದಕ್ಕೂ ಪಸರಿಸಿ, ಇದರ ಉಪಯೋಗವನ್ನೂ ಕ್ರಾಂತಿಕಾರಿಯಾಗಿ ಹೆಚ್ಚಿಸುವತ್ತ ಸಂಬಂಧಿಸಿದವರೆಲ್ಲಾ ವಾಲಬೇಕಾಗಿದೆ.

ಕೋರಿ ರೋಟಿ, ಬರೇ ಕರಾವಳಿಯ ಅರ್ಘ್ಯ ರತ್ನವಲ್ಲ, ಇಡೀ ಕರ್ನಾಟಕದ, ಭಾರತದ, ವಿಶ್ವದ ಅಮೂಲ್ಯ ಸಿದ್ಧ ಆಹಾರವಾಗಬೇಕಾಗಿದೆ, ಆ ಯೋಗ್ಯತೆ, ಸುಲಲಿತೆ, ರುಚಿ ಮತ್ತು ಅವಕಾಶ ಯಾವತ್ತೂ ಇದ್ದು, ನಾವು ಎಚ್ಚೆತ್ತು ವೈಯಕ್ತಿಕ ಮತ್ತು ಸಾಂಘಿಕವಾದ ಮುಂದಿನ ಹೆಜ್ಜೆಗಳನ್ನು ಇಟ್ಟು ಹೇಗೆ ಸಾಫ್ಟ್ವೇರಿನಿಂದ ಸಾವಿರಾರು ಕೋಟಿ ಆದಾಯ ಹುಟ್ಟಿಸುತ್ತಿದ್ದೇವೋ, ಹಾಗೇ ವಿಶ್ವವ್ಯಾಪಿ ರಫ್ತಿನ ಮೂಲಕ ಕೋರಿ ರೋಟಿಯಿಂದಲೂ ಅಷ್ಟೇ ಹಣಕಾಸಿನ ಉದ್ಯಮದ ಸಾಧ್ಯತೆ ಇದ್ದು ನಮ್ಮ ಜಡತನ ಕೊಡವಿ ಆ ದಿಕ್ಕಿನತ್ತ ಧಾವಿಸಬೇಕಾಗಿದೆ.

ಸಧ್ಯಕ್ಕೆ, ಮಂಗಳೂರು ಸ್ಟೋರುಗಳಿಗೆ ಧಾಳಿ ಇತ್ತು, ಅಲ್ಲಿನ ದಾಸ್ತಾನನ್ನೆಲ್ಲ ಖಾಲಿಮಾಡಿ, ಮನೆಯಲ್ಲಿ ವಿಧವಿಧವಾಗಿ ಉಪಯೋಗಿಸಿ ನನ್ನ ಈ ಮಾತುಗಳಲ್ಲಿ ಮೌಲ್ಯವಿದೆಯೇ ಇಲ್ಲವೇ ಎಂಬುದನ್ನು ಪ್ರತಿಪಾದಿಸಿಬೇಕಾಗಿ ವಿನಂತಿ!

ಮುಂದೆ ಇದರಿಂದ ತಯಾರಿಸಿದ ಬೇರೆ ಬೇರೆ ಖಾದ್ಯಗಳ ಮೆರವಣಿಗೆಯನ್ನು ಶೀಘ್ರದಲ್ಲೇ ನಿರೀಕ್ಷಿಸಿ!

ಕೋರಿ ರೋಟಿ ಬರೇ ಕರಾವಳಿಯದ್ದಲ್ಲ, ಕರ್ನಾಟಕದ್ದೂ ಆಗಿ, ಅಲ್ಲಿಗೇ ನಿಲ್ಲದೇ ವಿಶ್ವವ್ಯಾಪಿಯಾಗುವತ್ತನೀವು ಇದರ ದತ್ತು ತೆಗೆದುಕೊಳ್ಳುವುದು ಆ ಕುರಿತಾಗಿ ಮೊದಲ ಹೆಜ್ಜೆ ಎಂಬುದನ್ನು ಮರೆಯದಿರಿ!
ಮುಖಪುಸ್ತಿಕೆಯಲ್ಲಿ ಕೋರಿ ರೋಟಿಯಿ೦ದ ಸಸ್ಯಾಹಾರಿ ತಿನಿಸುಗಳ ಅಡಿಗೆ

Wednesday, June 15, 2016

ವಿದ್ವಾನ್ ಗಣಪತಿ ಭಟ್ಟರೊಂದಿಗೆ ಯಕ್ಷಗಾನ ಕಲಾಬದುಕಿನ ಸುತ್ತಮುತ್ತ ಒಂದು ಸಂವಾದ

ವಿದ್ವಾನ್ ಗಣಪತಿ ಭಟ್ಟರೊಂದಿಗೆ ಯಕ್ಷಗಾನ ಕಲಾಬದುಕಿನ ಸುತ್ತಮುತ್ತ ಒಂದು ಸಂವಾದ

ಶಾಸ್ತ್ರೀಯ ಸಂಗೀತದ ಜ್ನಾನದ ಭದ್ರ ನೆಲೆಗಟ್ಟಿನಲ್ಲಿ ಯಕ್ಷಗಾನದ ಭಾಗವತಿಗೆಯ ರಾಗ ಮತ್ತು ಮಟ್ಟುಗಳನ್ನು ಚೆನ್ನಾಗಿ ಅರಿತು ಅವಕ್ಕೆ ಸಂಪೂರ್ಣ ನ್ಯಾಯ ಒದಗಿಸುತ್ತಾ ಅಪೂರ್ವ ಶೈಲಿಯಲ್ಲಿ ಹಾಡುತ್ತಾ ಬಂದಿರುವ ಗಟ್ಟಿ ಭಾಗವತರು ವಿದ್ವಾನ್ ಗಣಪತಿ ಭಟ್ಟರು. ಯಕ್ಷಗಾನದಲ್ಲಿ ಅವರ ಕಲಾಜೀವನ ಮೂಡಿ ಬಂದ ಬಗೆ, ಅದು ಅನೇಕ ರೀತಿಗಳಲ್ಲಿ ಅರಳಿ ನಿಂದ ಬಗೆ, ಇಂದು ಅದು ಹೇಗೆ ತನ್ನ ಅಭಿವ್ಯಕ್ತಿಯ ಸುತ್ತ ಹೊಸತನ್ನು ಹುಡುಕುತ್ತಿದೆ, ಗಾನ ಆಖ್ಯಾನ ಎಂಬ ಹೊಸ ಕಲಾ ಪ್ರಕಾರದಲ್ಲಿ ಅವರು ಇತ್ತೀಚೆಗೆ ತೊಡಗಿಕೊಂದ ಬಗೆ, ಮುಂದಿನ ದಿನಗಳಲ್ಲಿ ಏನನ್ನು ಸಾಧಿಸುವ ತುಡಿತ ಅದಕ್ಕಿದೆ ಇವೆಲ್ಲದರ ಸುತ್ತ ಒಂದು ಸಂವಾದ.

ಸಂವಾದದ ಬೇರೆ ಬೇರೆ ಪ್ರಶ್ನೋತ್ತರಗಳಿಗೆ ಕೆಳಗಿನ ಕೊಂಡಿಗಳನ್ನು ಒತ್ತಿ

೧. ಯಕ್ಷಗಾನ ಕಲಿಕೆ

೨. ವೃತ್ತಿಪರನಾಗಿ ವೃತ್ತಿಮೇಳಗಳಿಗೆ ಬಂದ ಬಗೆ

೩. ಗಾನ ಆಖ್ಯಾನ ಕಲಾ ಪ್ರಕಾರದಲ್ಲಿ ಗಿರಿಜಾ ಕಲ್ಯಾಣದ ಒಂದು ಹಾಡು

೪. ಗಾನ ಆಖ್ಯಾನ ಕಲಾ ಪ್ರಕಾರದಲ್ಲಿ ಶನೀಸ್ಚರ ಕಥೆಯಲ್ಲಿ ರಾಜಾ ವಿಕ್ರಮಾದಿತ್ಯನಿಂದ ಶನಿಸ್ತುತಿ - ಕನಕದಾಸ ಕೃತಿ - ಸಕಲಗೃಹಬಲ ನೀನೇ ಸರಸಿಜಾಕ್ಷಾ....

೫. ತಾನು ಸರ್ವಾಭರಣ ಧರಿಸುತ - ಗಾನ ಆಖ್ಯಾನ ಶೈಲಿ ಮತ್ತು ಯಕ್ಷಗಾನ ಶೈಲಿ ಎರಡರಲ್ಲೂ

೬. ಉತ್ತರಾದಿ ಶೈಲಿಯಲ್ಲೊಂದು ಹಾಡು

೭. ತೆಂಕಿನ ಭಾಗವತಿಕೆ ನಿಮ್ಮಿಂದ ಏಕೆ ಇಲ್ಲ?

೮. ತಾಳಮದ್ದಲೆ ಮತ್ತು ಗಾನ ವೈವಿಧ್ಯ ಪ್ರಕಾರಗಳ ಕುರಿತು

೯. ಕಿರಿಯ ಭಾಗವತರಿಗೊಂದು ಕಿವಿಮಾತು

೧೦. ಯಕ್ಷಗಾನದ ಮುಮ್ಮೇಳ, ಮೇಳದ ಯಜಮಾನರು, ನಿಯೋಜಕರು ಮತ್ತು ಪ್ರೇಕ್ಷಕರ ಕುರಿತು

೧೧. ಮುಂದಿನ ಯೋಜನೆಗಳು, ಆಶೋತ್ತರಗಳು, ಕನಸುಗಳು

ವಿದ್ವಾನ್ ಗಣಪತಿ ಭಟ್ಟರ ಭಾಗವತಿಗೆಯಲ್ಲಿ ಒಂದು ಪೂರ್ಣ ಪ್ರಸಂಗ - ಸತ್ಯವಾನ ಸಾವಿತ್ರಿ