Sunday, April 17, 2016

ಪರಶುರಾಮ ಸೃಷ್ಟಿ ಕಥನಗಳ ನಿತ್ಯೋತ್ಸವ - ಪಾ.ನ.ಉ. ೦೦೧೦ - ಸದಿ ಮಾಸ್ತ್ರ ಕಥಿ - ಭಾಗ ೪

Original post at : https://www.facebook.com/notes/nataraja-upadhya/%E0%B2%B8%E0%B2%A6%E0%B2%BF-%E0%B2%AE%E0%B2%BE%E0%B2%B8%E0%B3%8D%E0%B2%A4%E0%B3%8D%E0%B2%B0-%E0%B2%95%E0%B2%A5%E0%B2%BF-%E0%B2%AD%E0%B2%BE%E0%B2%97-%E0%B3%AA/10154745598477738

ಸದಿ ಮಾಸ್ತ್ರ ಕಥಿ - ಭಾಗ ೪
Photo Courtesy: Sri Surendra Upadhya, s/o Sadi Mastar (Shreeman Subraya Upadhya)
ಬ್ಯಾಸಗಿ ಕಾಲ ಪಾರಂಪಳ್ಳಿ ಪಡುಕೆರಿಯಲ್ಲ ವಸಂತೋತ್ಸವದ ವೈಭವದಲ್ ಮೆರಿತ್. ಶಾಲಿಗ್ ರಜ, ಮಾವು, ಗೇರ್, ಹಲ್ಸ್ ಮರ್ಗಳೆಲ್ಲಾ ಹೂವಾಯ್ ಕಾಯಾಯ್ ಹಣ್ಣ್ ಆಪುದ್. ಗೆದ್ದಿಲಿಲ್ಲಾ ತರ್ಕಾರಿ ಬೆಳಿ ಇಲ್ಲಾ ಗುಂಬ್ಳ್, ಸೌತಿ ಬೆಳ್ಸತ್ರ್, ಪಂಪ್ಸೆಟ್ ನೀರ್ ಇಲ್ಲಾ ಸಂಬ್ಳಿಗಿ ನೀರ್ ಹಾಯ್ಸಿ ಗೆದ್ದಿಗ್ ಬಿಡುದು, ಬಿಸ್ಲ್ ಏರಿದ್ರೂ ಸಮುದ್ರ ಗಾಳಿಲ್ ಹಾಡಿಲ್ ಹಾಯ್ ಅನ್ಸತ್, ಒಂದ್ ಲುಂಗಿ ಇಲ್ಲಾ ಮುಂಡ್ ಇಲ್ಲಾ ಚಡ್ಡಿ, ಬರೀ ಮೈ, ಒಂದ್ ಕೈ ಮುಖ ಒರ್ಸೂ ಇಲ್ಲಾ ಮುಂಡಾಸ್ ಮಾಡ್ಕಂಬ್ ಟವೆಲ್, ಹಾಂಗಾಯ್ ಗಾಳಿ ಆಡ್ಕಂಡ್ ಮೈ ಆರಾಮ ಇರತ್!

ಏಪ್ರಿಲಿನಲ್ ಯುಗಾದಿ ಬರತ್, ಸಂವತ್ಸರ ಬದ್ಲಾತ್. ಹಾಂಗೇ ರಾಮನವಮಿಗೆ ೧೫ ದಿನ ಮದ್ಲೇ ವಿಷ್ಣುಮೂರ್ತಿ ದೇವಸ್ಥಾನದ್ ರಾಮಭಜನಿ ಶುರು. ನಮ್ ಕೇರಿಲ್ ಗಿರಿಜಮ್ಮನ್ ಮನಿ ಮತ್ ನಮ್ಮನಿಲ್ ರಾಮಭಜನಿಗೆ ಭಜನಾಮಂಡಳಿನ್ ಕರ್ಸತ್. ನಾವ್ ಇದನ್ ಕರುದು "ರಾಮಧ್ಯಾನ" ಅಂತ್!

ರಾಮಭಜನಿ ಸುರು ಆಪುದ್ ರಾತ್ರಿ ೮ ಗಂಟಿ ಮೇಲೆ. ವಿಷ್ಣುಮೂರ್ತಿ ದೇವಸ್ಥಾನದ್ ಈ ಭಜನಾ ಮಂಡಳಿಗ್ ವಾಸುದೇವ ಉಪಾಧ್ಯರ್ ಮುಖಂಡರು. ಎಲ್ಲಾ ಐತಾಳರು, ಮಧ್ಯಸ್ತರು, ಉಪಾಧ್ಯರು ಇತ್ಯಾದಿಯರು ಸೇರ್ಕಂಡ್ ಸುಮಾರ್ ೨೫ ಜನ ಖಾಯಂ ಭಜನಿಯವರ್. ಭಜನಿ ತಂಡ ವಿಷ್ಣುಮೂರ್ತಿ ದೇವಸ್ಥಾನದಿಂದ ಭಜನಿ ಮಾಡ್ಕಂತ ಹೊರ್ಡತ್. ಒಂದ್ ಪೆಟ್ರೊಮ್ಯಾಕ್ಸ್ ದೀಪ ಇರತ್. ಹಾರ್ಮೋನಿಯಂ, ತಬಲ ಹೊತ್ಕಂಡ್ ಬಪ್ಪೋರ್ ಇರತ್ರ್.

ಇತ್ತ ಭಜನಿ ಆಪು ಮನಿಲ್, ರಾಮದೇವರ ಪಟ ಇಟ್, ಹೂವಿನ ಅಲಂಕಾರ ಮಾಡಿ ಇಡತ್ರ್. ಅಂಗಳ ತೊಳ್ದ್, ಸುಮಾರು ಇನ್ನೂರ್ ಜನ ಕೂತ್ಕಂಬ್ಕೆ ಜಮಖಾನ, ಮಡಲ್ ಹಾಸಿ ಇಡ್ತರ್. ಒಳಗ್ ಅಡ್ಗಿ ಭಟ್ರ್ ಪನ್ಯಾರದ್ ವ್ಯವಸ್ಥಿ ಮಾಡ್ತ ಇರತ್ರ್.

ಭಜನಿ ತಂಡ ಸಂಕ ಹತ್ತಿ ಬಪ್ಪು ಚಂದವೇ ಚಂದ. ಒಂದ್ ಪೆಟ್ರೋಮ್ಯಾಕ್ಸ್ ದೀಪದ್ ನೆರಳ್ ಬೆಳ್ಕಲ್ಲ್ ಕಾಲ್ಗಳೆಲ್ಲ ಮುಂದ್ ಬಂದ್ ಅದರ್ ಹಿಂದ್ ನೆರಳ್ ಬಪ್ಪುದ್ ದೂರ್ದಿಂದ್ ಕಾಂಬುದ್ ಚೆಂದ, ಹಾಂ, ಭಜ್ನಿಯವ್ರ್ ಬಂದ್ರ್, ಮಕ್ಳೇ ಎಲ್ಲಾ ಎಲ್ಲಿದ್ರಿ, ಗಡಿಬಿಡಿ ಸುರು. ಅಂಗಳದ್ ಮುಂದ್ ಒಂದ್ ಸ್ಟೂಲ್ ತಂದ್ ಅದ್ರ್ ಮೇಲ್ ಕಾಲ್ದೀಪ ಇಟ್ಟ್ ದೀಪ ಹಚ್ಚಿ ಇಡತ್.

ಭಜ್ನಿಯವ್ರ್ ಮನಿ ಹತ್ರ ಬಂದಾಂಗ್ ಮೈಕಿಗ್ ವಾಲ್ಯೂಮ್ ಹೆಚ್ಚ್ ಮಾಡಿಯಾಂಗ್ ಸ್ವರ ಕೇಳುಸುರುವಾತ್, ಯಾವ್ ಪದ್ಯ ಹಾಡ್ತಿದ್ರ್ ಅಂಬುದೂ ಗೊತ್ತಾತ್. ಭಜನಿ ಮಾಡುವವರ್ ಬಂದ್ ಕಾಲಿಗ್ ನೀರ್ ಹಾಕ್ಕಂಡ್ ಅಂಗಳ್ಕ್ ಬಂದಾಗ್ಳಿಗ್ ಅವ್ರನ್ ಬರ ಮಾಡ್ಕಂಬ್ ಸಂಭ್ರಮ, ಅವ್ರಿಗೆ ಚೌಕಿಯಿಂದ ರಂಗಸ್ಥಳಕ್ ಬಂದ್ ಉಮೇದ. ಹೊಸ ಉಮೇದದಲ್ ಎಲ್ಲರೂ ಕಾಲ್ದೀಪದ್ ಸುತ್ತ ವೃತ್ತಾಕಾರವಾಗಿ ಭಜ್ನಿ ಹೇಳ್ತಾ ಕುಣುಕ್ ಸುರು ಮಾಡ್ತ್ರ್. ಇಷ್ಟೊತ್ತಿಗ್ ಗಂಟಿ ಸುಮಾರ್ ಒಂಭತ್.

ಭಜನಿ ಮಾಡ್ತಾ ಕುಣುದ್ರಲ್, ಸುಮಾರ್ ನಮೂನಿ ಇತ್. ಒಬ್ರಿಗ್ ಒಬ್ರ್ ಮುಖ ಹಾಕುದ್, ಕಡಿಗ್ ಪುಕ್ಳಿ ಹಾಕುದ್, ಕಾಲ್ದೀಪದ್ ಹತ್ರ ಬಗ್ಗಿ ತಾಳ ಹಾಕುದ್, ಕಾಲ್ದೀಪದ್ ಹೊರಗ್ ಬಗ್ಗಿ ತಾಳ ಹಾಕುದ್. ಹಾವ್ ಹರ್ದಂಗ್ ಒಬ್ರಿಗ್ ಒಬ್ರ್ ಸುತ್ ಹಾಕ್ಕಂಡ್ ಒಂದ್ ದಿಕ್ಕಲ್ ಕುಣ್ದರೆ, ಕಡೀಗ್ ಎಣಿ ಬಿಡ್ಸ್ಕಂಡ್ ಹಾಂಗ್ ಇನ್ನೊಂದ್ ದಿಕ್ಕಲ್ ತಿರ್ಗುದ್. ತಾಳ ಹಿಡ್ಕಂಡ್ ಕೈ ಮುಂದ್ ಹಿಂದ್ ಮೇಲ್ ಕೆಳ್ಗ್, ಅಡ್ಡ ಆಚಿ ಈಚಿ, ಯಾವ್ ಯಾವ್ ನಮೂನಿ ಆತ್ತೋ ಆಯಾ ನಮೂನಿ ಕೊಣುದ್. ಇನ್ನೊಂದ್ ಗಮ್ಮತ್, ಮೂರ್ ಹೆಜ್ಜಿ ಮುಂದ್ ಹೋಯ್, ಒಂದ್ ಅಥ್ವಾ ಎರಡ್ ಅಥವಾ ಮೂರ್ ಹೆಜ್ಜಿ ಹಿಂದ್ ಬಪ್ಪುದ್, ತಾಳದ್ ಮಾತ್ರಿಗ್ ಸರಿಯಾಯಿ. ಇದೆಲ್ಲಾ ಮಾಡ್ಸುಕ್ ಒಬ್ರ್ ಲೀಡರ್, ಅವ್ರ್ ಕುಣುದ್ ಬದ್ಲಾದ್ ಹಾಂಗ್ ಎಲ್ಲರೂ ಬದ್ಲಾಯ್ಸಿ ಕೊಣುದ್. ಎಲ್ಲಾ ನಮೂನಿ ಕೊಣ್ದ್ ತೋರ್ಸುಕೆ ೨ ಪದ್ಯ ಆರೂ ಬೇಕ್. ಇಷ್ಟೆಲ್ಲಾ ಕುಣುವಾಗ ಪೆಟ್ರೊಮ್ಯಾಕ್ಸ್ ದೀಪವೂ ಸ್ಟೂಲ್ ಕೆಳಗ್ ಇಪ್ಕೋಯ್, ನೆರಳ್ ಬೆಳಕಿನ್ ಆಟ ಅದ್ಭುತ. ನಾವ್ ಮಕ್ಳಿಗ್ ಏರ್ಕಂಡ್ ಬರತ್. ಈ ಕೊಣುವವರ್ ಸುತ್ತಿನ್ ಹೊರ್ಗ್ ನಾವೂ ಕೊಣು ಸುರುಮಾಡತ್. ನಮ್ದ್ ಹೆಜ್ಜಿ ಸಲ್ಪ ತಪ್ಪಾರೂ ನಡಿತ್. ಕೊಣವವ್ರ್ ಹೊರ್ಗ್ ಬಗ್ಗಿರ್ ಅಥವಾ ಹೆಜ್ಜಿ ಹಾಕಿರೆ ಅವ್ರಿಗ್ ಅಡ್ದ ಬರ್ದಿದ್ರ್ ಸರಿ. ಈ ಕೊಣ್ಕಿ ಮುಗ್ದ್ ಶ್ರೀಮದ್ ರಮಾರಮಣಾ ಗೋವಿಂದಾ ಹಾಕಿ ಮುಗಿತಾನೇ, ಇನ್ನೊಬ್ರ್ ಹೊಸ ಹಾಡ್ ತಕ್ಕಂತ್ರ್, ಎಲ್ಲರೂ ಹಾಡ್ತಾ ಹಾಡ್ತಾ ಕೂತ್ಕಂತ್ರ್, ಇಷ್ಟ್ರ್ ಒಳ್ಗೇ ತಬ್ಲಾ, ಹಾರ್ಮಣಿಯವ್ರ್ ಮದ್ಲೇ ಕೂತ್ಕಂಡ್ ತಯಾರಾಗಿರ್ತ್, ಭಜನಿಗ್ ಬಂದವ್ರಿಗ್ ಪಾನಕ ಇಲ್ಲಾ ನೀರ್ ಇಲ್ಲಾ ಹಾಲಿನ್ ಸೇವೆ ಒಂದ್ ಸರಿ ನಡಿತ್. ಭಜನಿ ಕಾಂಬುಕ್ ಬಂದ್ ಮಕ್ಳ್ ಗಂಡಸ್ರ್ ಭಜ್ನಿ ಸೊಲ್ಲ್ ಹಾಡಿ ಹಾಂಗೆ ಇನ್ನೊಂದ್ ಸರಿ ನಮ್ ಸ್ವರ ಸೇರಿ ಹಾಡುದ್, ತಾಳ ಹಾಕ್ಕಂತಾ.

ಹೆಚ್ಚಾಯ್, ಶಾಸ್ತ್ರೀಯ ಸಂಗೀತ ಬಪ್ ರಾಮಚಂದ್ರ ಐತಾಳರ್ ಹಾರ್ಮೋನಿಯಂ ನುಡ್ಸುದ್. ತಬ್ಲ ಒಬ್ರ್ ಕೈ ಇನ್ನೊಬ್ರ್ ಬದ್ಲಾಯ್ಸಿ ಬಡುದ್, ನಮ್ಮಪ್ಪಯ್ಯ ಕೂಡಾ ತಬಲ ಬಾರ್ಸುದ್ ಆವತ್ ಮಾತ್ರ, ಒಂದ್ ಎರ್ಡ್ ಪದ್ಯಕ್, ಸದಾಶಿವ ಐತಾಳ್ರ್ ಲಾಯಕ್ ಪದ್ಯ ಹೇಳ್ತ್ರ್, ವಾಸುದೇವ ಉಪಾಧ್ಯರ್ ದೇವ್ರಿಗ್ ಪಕ್ಕ ನಾಯಕನಾಗಿ ಕೂತ್ಂದ್ ಭಕ್ತಿಲ್, ಗಾಂಭೀರ್ಯದಲ್ ಹಾಡ್ತ್ರ್.

ಆಟದಲ್ ಎರಡನೇ ವೇಷದ್ ಪ್ರವೇಶ ಆದಾಂಗ್, ೧೦-೩೦ ಇಲ್ಲಾ ೧೧ ಘಂಟೆಗೆ, ಇನ್ನೂ ಒಂದ್ ಘಂಟಿ ಭಜ್ನಿ ಉಳ್ದಿತ್ ಅಂಬಾಗ್ಳಿಗ್ ಸದಿ ಮಾಷ್ಟ್ರ್ ಪ್ರವೇಶ. ಬಂದವ್ರ್ ಹೆಚ್ಚಾಯ್ ಹಾರ್ಮಣಿ ತಬ್ಲದ್ ಮಧ್ಯ ಕೂತ್ಕಂತ್ರ್, ನಡಿತಿರು ಭಜ್ನಿಗ್ ಅವ್ರದ್ದೂ ಸ್ವರ ಸೇರ್ಸಿ ಸೇರ್ಕಂತ್ರ್.

ಸದಿ ಮಾಷ್ಟ್ರ್ ಬಂದ್ ಕೂಡ್ಲೇ ನಾವ್ ಮಕ್ಳೆಲ್ಲಾ ನೆಟ್ಟಗ್, ನಾವ್ ಅವ್ರನ್ನೇ ಕಾಂಬ್ ಹಾಂಗ್, ಭಜ್ನಿಯವ್ರ್ ಎಲ್ಲಾ ದೇವರಿಗ್ ಮುಖ ಹಾಕ್ಕಂಡ್ ಕಂಡ್ರೆ ಎಡ ಬದಿಲ್ ಇದ್ರೆ, ನಾವ್ ಬಲ ಬದಿಲ್ ಮುಂದಿನ್ ಸಾಲಲ್ ಕೂತ್ಕಂಡ್ ಬೆನ್ ಬಗ್ಸಿ ಕೂರ್ಮಂಡಿ ಇದ್ದವ್ರ್ ಒಂದ್ ಸರಿ ಬೆನ್ ನೆಟ್ಕ್ ಮಾಡ್ಕಂಡ್ ಕಣ್ ದೊಡ್ಡದ್ ಮಾಡ್ಕಂಡ್ ಸದಿ ಮಾಷ್ಟ್ರ್ ಮುಖ ಬಾಯ್ ಕಾಂತಾ ಕೂತ್ಕಂಬದ್!

ಇನ್ನೊಂದ್ ಶ್ರೀಮದ್ ರಮಾರಮಣಾ ಗೋವಿಂದಾ ಹಾಕಿಕೂಡ್ಲಿಗ್, ಸದಿ ಮಾಷ್ಟ್ರ್ ಎತ್ಗಡಿ ತಕ್ಕಂತ್ರ್, ದೊಡ್ಡ ಸ್ವರ ಓಂದ್ ಪದ್ಯಕ್ ಸಂಬಂಧಿಸಿದ್ ಚೂರ್ಣಿಕೆ (ಉಗಾಭೋಗ)ಯಿಂದ್ ಸುರು, ಅದೂ ಶಾಯಿರಿ ಹೇಳಿ ಹಾಂಗೆ ಎರ್ಡ್ ಸರಿ ಮೂರ್ ಸರಿ ಮೊದ್ಲಿನ್ ಲೈನನ್ನೇ ಹೇಳುವಾಗ, ನಮ್ ಸೂರ್ಯ, ಅವ್ರೆದ್ರೇ ಕೂತ್ಕಂಡ್, "ಅರರೆ ಶಹಭಾಸ್, ವರೆ ವಾ ವರೆ ವಾ" ಅಂತ್ ಗುರುಗಳಿಗೆ ಸರೀ ಗಾಳಿ ಹಾಕಿ ಸದಿ ಮಾಷ್ಟ್ರ್ ಎಲ್ಲಾ ಉಮೇದಿನ್ ಹೊರ್ಗ್ ತಂದ್ ಹಾಕ್ತಾ. ಚೂರ್ಣಿಕೆ ತಾರಕಕ್ ಹೋಯ್ ಇಳ್ದ್ ಮೇಲ್, ಮಂದ ಗತಿಯಲ್ ಪದ್ಯ ಸುರುವಾತ್. ಓಂದ್ ಸರಿ, ಇಡೀ ಭಜನಾಕೂಟ ಸಲ್ಪ ಸಪ್ಪೆ ಇರುವ್ ಭಕ್ತಿಯಿಂದ ಗಮ್ಮತ್ ತುಂಬಿದ ಲೀಲಾಮಯವಾದ ಭಾವಕ್ಕೆ ಜಿಗಿತ್, ಹೊಗಸ್ರೂ ಒಂದ್ ಸರಿ ಬೆನ್ ನೆಟ್ಕ್ ಮಾಡ್ಕಂಡ್ ಸೀರಿ ಸೆರ್ಗ್ ಬೀಸ್ಕಂಡ್ ಕುರ್ಕಾಲ್ ಮಂಡಿ ಕಾಲ್ ಬದ್ಲಾಯ್ಸಿಕ್ಕಂಡ್ರ್ ಮಕ್ಳೆಲ್ಲಾ ಸ್ವರ ದೊಡ್ಡದ್ ಮಾಡಿ chorus ಹಾಡ್ತ್ರ್, ಪಕ್ಕದ್ ಕೇರಿಲ್ ಮನಿಲ್ ಇಪ್ಪೋರ್ ಯಾರಾರೂ ಇದ್ರೆ, ಹಾಂ ಸದಿ ಮಾಷ್ಟ್ರ್ ಹಾಡು ಸುರು ಮಾಡ್ರ್ ಅಂತ್ ಹೇಳ್ಲಕ್.

ಸದಿ ಮಾಷ್ಟ್ರದ್ ಎಲ್ಲಾ ಮೊದ್ಲೇ ನಿಗದಿಯಾದ ೩-೪ ಬ್ರಾಂಡ್ ಹಾಡ್ಗಳ್, ಒಂದೇ ಹಾಡ್ ಉಗಾಭೋಗದಿಂದ್ ಸುರುವಾಯ್, ಮೊದ್ಲ್ ಮಂದ ಗತಿ ಇದ್ದದ್, ಕಡಿಗ್ ಮಧ್ಯ ಗತಿಗ್ ಬತ್, ತೀವ್ರ ಗತಿಗೆ ಹೋಯ್, ಅತೀ ತೀವ್ರ ಗತಿಗ್ ಮುಟ್ಟಿ, ತಾರಕಕ್ಕೇರಿ, ಎಲ್ಲರಿಗೂ ಮೈಮೇಲ್ ಬಂದ್ ಹಾಂಗ್ ಆಯಿ, ಹಿತ್ತಾಳಿ ತಾಳ ಒಂದಕ್ ಒಂದ್ ಕುಟ್ಟಿ ಕುಟ್ಟಿ ಚಿನ್ನದಾಂಗ್ ಹೊಳು ಸುರುವಾಯಿ, ಮತ್ತೆ ಮಂದ ಗತಿಗ್ ಇಳ್ದ್ ಮುಗುಕೆ ಸುಮಾರ್ ೧೫ ನಿಮ್ಷ ಆತ್, ಶ್ರೀಮದ್ ರಮಾರಮಣಾ ಗೋವಿಂದ ಅಂಬುದು ಸಂತೋಷ, ಸಂಭ್ರಮ, ತೃಪ್ತಿ, ಮತ್ತು ಧನ್ಯತೆಯಲ್ಲಿ ಆಕಾಶಕ್ಕೇ ಮುಟ್ಟತ್. ಎಲ್ಲರ ಸ್ವರ ತಾರಕಕ್ ಏರಿ ಇರತ್, ತಾಳ ಕೈಯಲ್ಲೇ ಹಾಕಿ ಹಾಕಿ, ಕೈ ಬೊಕ್ಕಿ ಬಪ್ಪಷ್ಟ್ ಆಯಿರತ್. ನಾವ್ ಮಕ್ಕಳ್ ಉದ್ವೇಗದಲ್ ನಮ್ ಸ್ವರ ಮೀರಿ ಕಿರ್ಚಿ ಮರ್ದಿನ ಸ್ವರ ಬಿದ್ ಹೋಯ್ ಇರತ್. ಸದಿ ಮಾಷ್ಟ್ರಿಗೂ ಒಂದ್ ಎರ್ಡ್ ದಿನ ಸ್ವರ ಬಿದ್ ಹೋಪುದೇ, ಅದ್ ಗೊತ್ತಿದ್ರೂ ಅವ್ರಿಗ್ ಅದ್ ಕ್ಯಾರೇ ಇಲ್ಲ, ಮುಂದ್ ಎರ್ಡ್ ದಿನ ವಾಗಮ್ಮನಿಗ್ ತಮಾಷಿ ಮಾಡ್ಕಂಡ್ ಮೆಣ್ಸಿನ್ ಕಷಾಯ ಮಾಡಿ ಕೊಡುಕ್ ಒಂದ್ ಛಾನ್ಸ್!

ಸದಿ ಮಾಷ್ಟ್ರದ್ ಪದ ಆದ್ ಕೂಡ್ಲೇ ಇನ್ನೊಬ್ರ್ ಸ್ವಲ್ಪ ದೊಡ್ಡ್ ಸ್ವರದಲ್ಲೇ ತಕ್ಕಂತ್ರ್, ಹಾರ್ಮನಿ ಶ್ರುತಿನೂ ಮೇಲ್ ಹೋಯ್ ಕೂತಿತ್ತಲ್ಲ. ಅದ್ ಮುಗ್ದ್ ಮೇಲ್ ಸದಿ ಮಾಷ್ಟ್ರದ್ ಕೊನೇ ಪದ್ಯ ಇಪ್ಪಾಂಗ್, ಇನ್ನೂ ಬೇಕಿದ್ರ್ ಬೇರೆಯವ್ರ್ ಹಾಡುದ್, ಕೊನೇ ಪದ್ಯ ಸದಿಮಾಷ್ಟ್ರ್ ತಕ್ಕಂತ್ರ್, ಇನ್ನೊದ್ ಸರಿ ತಾರಕಕ್ ಹೋಯ್ ಕೆಳ್ಗ್ ಬತ್ನೇ ವಾಸ್ದೇವ್ ಉಪಾಧ್ಯರ್ ಮಂಗಳದ್ ಭಜ್ನಿ ಎತ್ಕಂತ್ರ್, ನಾವ್ ಮಕ್ಳ್ ಸದಿ ಮಾಷ್ಟ್ರ್ ತಾರಕದಿಂದ ಮಂಗಳಕ್ ಬಂದ್, ಮೈಮೇಲ್ ಜಕ್ಣಿ ಬಂದ್ ಹಾಂಗ್ (trans) ಕೈಯಲ್ ತಾಳ ಹಾಕ್ತಾ ರಾಮನ್ ಚಿತ್ರ ಕಾಂತಾ ಕೂತ್ಕಂತ್, ಪುರೋಹಿತ್ರ್ ಮಂಗಳಾರತಿ ಮಾಡಿ ಮುಗ್ಸಿ, ಕೊನೇ ಶ್ರೀಮದ್ ರಮಾರಮಣ ಗೋವಿಂದಾ ಹಾಕುವಾಗ ಎಲ್ಲರ್ ಬಾಯ್ ಕೈ, ರಟ್ಟಿ, ಮೈ ಸುಸ್ತಾಯ್, ಪಾನ್ಕ ಪನ್ಯಾರ ಬಪ್ಪುಕೂ ಸರಿ ಆತ್.

ಸದಿ ಮಾಷ್ಟ್ರ್ ಬ್ರಾಂಡೆಂಡ್ ಹಾಡ್ಗಳು, ನನಗ್ ನೆನ್ಪಿದ್ದಾಂಗ್, ೧. ನೋಡು ನೋಡು ಗೋಪಿ ನಿನ್ನ ೨. ರಾಧೆ ರಾಧೆ ರಾಧೆ ರಾಧೆ ರಾಧೆ ಗೋವಿಂದ, ಜೈ ರಾಧೆ ಗೋವಿಂದ,...೩. ಭಾಗ್ಯದ ಲಕ್ಷ್ಮಿ ಬಾರಮ್ಮ... ೪. ಡೊಂಕು ಬಾಲದ ನಾಯಕರೇ ಹೀಗೆ....

ನಾವ್ ಮಕ್ಳ್ ಉದ್ವೇಗದಲ್ ಒರ್ಲಿ ಒರ್ಲಿ ಸ್ವರ ತೆಕ್ಕಂಡ್ರೆ, ಸದಿ ಮಾಷ್ಟ್ರ್ ನಮ್ಮನ್ ಏರ್ಸುಕ್ ಒರ್ಲಿ ಒರ್ಲಿ ಸ್ವರ ತೆಕ್ಕಂತ್ರ್. ಭಜನಾ ಮಂಡಳಿಯವ್ರ್, ಹದಾ ಹಾಡ್ಕಂಡ್ ಪಾನಕ ಪನ್ಯಾರ ಆದ್ಮೇಲ್ ಮತ್ ಹಾಡ್ಕಂಡ್ ವಾಪಸ್ ಹೋಪುಕೆ ಪಾನಕ ಪನ್ಯಾರ ಒಂದ್ ಬಲ ಕೊಟ್ಟಿದ್ರೆ, ಇನ್ನೊಂದ್ ಬದಿ ಸದಿ ಮಾಷ್ಟ್ರ್ದ್ ಇಂದ್ರಜಾಲದ್ ಹಾಡಿನ್ ಬಲ ಬಂದಿರತ್.

ಮುಂದಿನ್ ದಿನ ಸದಿ ಮಾಷ್ಟ್ರ್ ಗೆದ್ದಿಲೋ, ಮನಿಲೋ, ಪ್ಯಾಟಿಗ್ ಹೋಪತಿಗ್ ಸಿಕ್ಕಾಗ್ಳಿಗ್, ಗುರು ಶಿಷ್ಯರು ಬಿದ್ ಸ್ವರದಲ್ ಉಭಯ ಕುಶಲೋಪರಿ ಹೇಳ್ಕಂಬದ್ ಲಾಯಕ್, ಇಬ್ರೂ ಕಣ್ಣಲ್ಲೇ ನೆಗಾಡ್ಕಂಡ್ ಹಿಂದಿನ್ ದಿನದ್ ರಾತ್ರಿದ್ ಗಮ್ಮತ್ತನ್ ನೆನ್ಕಂಡ್ ನಗುವಿನ್ ಬಾಯ್ ಇಬ್ಬ್ರಿಗೂ ಇನ್ನೂ ದೊಡ್ದಾಯೇ ಮುಂದ್ ಹೋಪುದ್!

ಸದಿ ಮಾಷ್ಟ್ರ್ ಭಜನಿ ಅವ್ರಿಗೆ ಭಕ್ತಿ ಮತ್ ನಂಬಿಕೆಯಿಂದ್ ಹುಟ್ಟಿದ್ರೂ ನಮ್ಗೆ ಮಕ್ಳಿಗ್ ಭಕ್ತಿ ಹುಟ್ಟಿಸುವಂತಹದಲ್ಲ; ಆದ್ರ್, ನಮ್ ಬದುಕಿನಲ್ಲಿ ಆತ್ಮ ವಿಶ್ವಾಸ, ಜೀವನೋಲ್ಲಾಸ, ನಂಬಿಕೆ, ಆಶಯ, ಪ್ರಯತ್ನ, ಧರ್ಮ, ನೀತಿ, ಸ್ನೇಹ, ಸಂಬಂಧ, ಸಂಭ್ರಮ, ಸಂತೋಷ ಇವೆಲ್ಲವನ್ನು ಹೆಚ್ಚಿಸುವಂತಹದ್ದು, ಇವೆಲ್ಲಾ ಮೆರೆದರೆ, ನಾಸ್ತಿಕನಾದವನೂ ಜೀವನ ಮಾಗುತ್ತಾ ಭಗವಂತನಿಗೇ ಶರಣು ಬರುವವನೇ, ಹಾಗಾಗಿ ಸದಿಮಾಷ್ಟ್ರ್ ಭಜನಿ ಭಗವಂತನಿಗೆ ಅತೀ ಪ್ರಿಯವಾದದ್ದೇ!

ಇನ್ನೂ ಇದೆ, ಮುಂದಿನ ಕಂತಿನಲ್ಲಿ ಮುಕ್ತಾಯ!

ಪರಶುರಾಮ ಸೃಷ್ಟಿ ಕಥನಗಳ ನಿತ್ಯೋತ್ಸವ - ಪಾ.ನ.ಉ. ೦೦೦೯ - ಸದಿ ಮಾಸ್ತ್ರ ಕಥಿ - ಭಾಗ ೩

Original post at: https://www.facebook.com/notes/nataraja-upadhya/%E0%B2%B8%E0%B2%A6%E0%B2%BF-%E0%B2%AE%E0%B2%BE%E0%B2%B8%E0%B3%8D%E0%B2%A4%E0%B3%8D%E0%B2%B0-%E0%B2%95%E0%B2%A5%E0%B2%BF-%E0%B2%AD%E0%B2%BE%E0%B2%97-%E0%B3%A9/10154740640292738


ಸದಿ ಮಾಸ್ತ್ರ ಕಥಿ - ಭಾಗ ೩

Photo Courtesy: Sri Surendra Upadhya, s/o Sadi Mastar (Shreeman Subraya Upadhya)

ಪಾರಂಪಳ್ಳಿ ಪಡುಕೆರಿಯಲ್ಲಿ ಮಳಿ ಬಪ್ಪು ಮದ್ಲೇ, ಮೇ ತಿಂಗಳಲ್ಲೇ ಗೆದ್ದಿಗೆ ಹೊಳಿ ಕೆಸ್ರ್ ಹೆಡ್ಗಿಲ್ ಹಾಕಿ, ಅದ್ ಒಣ್ಗಿದ್ ಮೇಲ್ ಅದ್ರ್ ಶೆಟ್ಟಿ ಕುಟ್ಟಿ ಸುತ್ತಲೂ ಬಿಸುಡುವ ಕೆಲ್ಸ, ಮಳಿ ಸುರುವಾತ್ನೇ, ಹೂಡಿ, ಬೀಜ ಹಾಕಿ, ಅಗೇಡಿ ಗದ್ದಿ ತಯ್ಯಾರ್ ಮಾಡುದ್. ಮಳಿ ಜಾಸ್ತಿ ಆಯಿ ಜುಲೈ ಹಾಂಗ್, ಮನಿದ್ ಗೊಬ್ರ್ ಗುಂಡಿದ್ ಗೊಬ್ರ ಹೊತ್ ಗೊಬ್ರ ಹಾಕಿ, ನೆಟ್ಟಿ ಗದ್ದೀನ್ ಹೂಡಿ, ನೆಟ್ಟಿ ಮಾಡಿರೆ ಕೃಷಿಗೆ ಒಂದ್ ವಿರಾಮ. ಹೆಚ್ಚಾಯ್ ಆಸಾಡಿ ತಿಂಗ್ಳ್ ಒಳ್ಗ್ ಎಲ್ಲಾ ನೆಟ್ಟಿ ಮುಗ್ದಿರತ್.

ಜೂನ್ ತಿಂಗ್ಳಲ್ಲೇ ಮಳಿ ಜೋರ್ ಹೊಡಿತ್, ಸಮುದ್ರ ಬದಿ ಹೋರೆ, ಮಳಿ ನೀರ್ ಹೊಳಿ ಸೇರಿ, ಹೊಳಿ ನೀರ್ ಸಮುದ್ರ ಸೇರಿ, ಮಳಿಗಾಲ್ದ್ ಗಾಳಿಲ್ ನೀರ್ ಸಲ್ಪ ಮುಂದ್ ಬಂದ್, ಸಮುದ್ರದ್ ದಡ ಕೆರಿದಡದಾಂಗ್ ಹೊಂಡದಾಂಗ್ ಇದ್ದ್ ಸಮುದ್ರ ಬದಿ ಆಡುಕ್ ಲಾಯ್ಕ ಅಲ್ಲ, ಇನ್ ಮಳಿಗಾಲಕ್ ಏನಾರೂುಪಯೋಗದ್ ತೇಲ್ಕಂಡ್ ಬಂದಿತ್ತಾ ಕಾಂಬುದ್ ಬಿಟ್ರೆ.

ಆದ್ರ್ ಆಸಾಡಿ ಮುಗ್ದ್, ಕರ್ಕಾಟ್ ಆಮಾಸಿ ಬಪ್ಪೊತಿಗ್, ಸಮುದ್ರ ಸಲ್ಪ ಹಿಂದ್ ಹೋಯ್, ಕರ್ಕಾಟ್ ಅಮಾಸಿಗೆ ಮೀಯುಕ್ ಜನ ಸೇರ್ಕಂಡ್ ಒಂದ್ ಹಬ್ಬವೇ ಇರತ್. ಸಮುದ್ರ ಸ್ನಾನ ಮಾಡುಕ್ ಮೊದ್ಲ್ ಹೊಯ್ಗಿಲ್ ಕಬ್ಬಡಿ ಆಡು ಗಮ್ಮತ್ ಏನ್ ಕೇಂತ್ರಿ. ಸುಮಾರ್ ೨೦೦-೩೦೦ ಜನ ಸೇರುದ್. ಸಾಲಿಗ್ರಾಮದ್ ನೆಲ್ಗಡ್ಲಿ, ಐಸ್ಕ್ಯಾಂಡಿ ಹೀಂಗ್ ಒಂದೆರೆಡ್ ಅಂಗ್ಡಿನೂ ಬತ್ತಿತ್! ಸಮುದ್ರ ಸ್ನಾನ್ ಮುಗ್ದ್ ಮೇಲ್ ಮನಿಲ್ ಹೊರ್ಳಿ ಕಡ್ಬ್ ಕತ್ತರ್ಸಿ ತಿಂಬು ಕೆಲ್ಸ.

ಕರ್ಕಾಟ್ ಅಮಾಸಿ ಬಂದ್ರ್ ಇನ್ನೊಂದ್ ಗಮ್ಮತ್ ಏನಂದ್ರ್ ಮರ್ದಿನದಿಂದ್ ಸ್ವಾಣಿ ತಿಂಗ್ಳ್!

ಸ್ವಾಣಿ ತಿಂಗ್ಳ್ ಗಮ್ಮತ್ತೇ ಗಮ್ಮತ್. ಮನಿಲ್ ದಿನಾ ಹೊಸ್ತ್ಲ್ ಪೂಜಿ ಇರತ್, ನಮ್ಗ್ ಹೊಸ್ಲ್ ಪೂಜಿ ಪ್ರಸಾದ ತಿಂಬಕ್ ಸಿಗತ್, ಮೊಸ್ರ್ ಅವ್ಲಕ್ಕಿ, ಬೆಲ್ಲದ್ ಅವ್ಲಕ್ಕಿ, ಬಾಳಿ ಹಣ್ ಪಾಯ್ಸ ಏನೋ ಒಂದ್ ಇರತ್.

ಇದಕ್ಕಿಂತ್ ದೊಡ್ಡ್ ಗಮ್ಮತ್, ಕೋಡಿ ಕನ್ಯಾನದ್ ಈಶ್ವರ ದೇವಸ್ಥಾನದಲ್ ಸ್ವಾಣಿಆರ್ತಿ. ನಾವ್ ಮಕ್ಕಳ್ ೫ ಗಂಟಿಗೇ ದೇವಸ್ಥಾನಕ್ ಹೋಯ್ ಆರ್ತಿಗ್ ಬತ್ತಿ ಹಾಕುದು. ಒಂದಷ್ಟ್ ಹಿತ್ತಾಳಿ ಆರ್ತಿ, ಒಂದ್ ಹತ್ ಮರದ್ ಆರ್ತಿ. ಹಿತ್ತಾಳಿ ಆರ್ತಿಲ್ ಕೆಲ್ವದ್ ರಥದ್ ಆರ್ತಿ. ಮರದ್ ಆರ್ತಿ ಮೇಲ್ ಅಕ್ಕಿ ಹಿಟ್ಟಿಂದ್ ನೀರ್ ಹಾಕಿ ಅಂಟ್ ಮಾಡಿ, ಚುಕ್ಕಿ ಆಟದಲ್ ಚುಕ್ಕಿ ಹಾಕಿಯಾಂಗ್ ಹಾಕ್ತ್ರ್. ಅದಕ್ ನಾವ್ ಎಣ್ಣಿಲ್ ಅದ್ದಿ ಹಿಂಡಿದ್ ಬತ್ತಿನ್ ಹೂಗ್ ಕಣಿಗ್ ಮಾಡಿ ಅಕ್ಕಿ ಹಿಂಟ್ ಅಂಟಲ್ ಹುಗ್ದ್ ಹಚ್ಚುದ್. ಪುರೋಹಿತ್ರ್ ಹಳೀ ವೇಸ್ಟಿ ತಂದ್, ಎಣ್ಣಿಲ್ ಅದ್ದಿ, ಹಿಂಡಿ, ಬಟ್ಟಿನ್ ಉದ್ದುದ್ದ ಬಾಲ ಮಾಡಿ ಕೊಡ್ತ್ರ್, ನಾವ್ ಅದನ್ ಕೈಯಲ್ಲೇ ಅರ್ಧರ್ಧ ಆದಿಗ್ ಹರ್ದ್, ಹೂಗ್ ಮಾಡಿ ಮಾಡಿ ಅಂಟ್ಸಿ, ಮ್ಯಾಲ್ ಹೂವನ್ ಅಗಲ ಇನ್ನೂ ಹರಡುದ್. ಸ್ವಾಣಿ ತಿಂಗ್ಳ್ ಕೊನೇಲ್, ಒಂದೇ ದಿನಕ್ ಎರ್ಡೆರ್ಡ್ ಸ್ವಾಣಿ ಪೂಜಿ ಇದ್ದಾಗ್ಲಿಗ್ ಇನ್ನೂ ೩-೪ ಆರ್ತಿ ದೇವಸ್ಥಾನದ್ ಅಟ್ಟದಿಂದ್ ತೆಗೆದ್ ಹೆಚ್ ಇರತ್, ಆದ್ರ್ ಹತ್ನೇ ಆರ್ತಿ ಉದ್ದ ಚೆಂದ ಇಪ್ಕೋಯ್, ಹತ್ತನೇ ಆರ್ತಿಯೇ ಕೋನೇದ್ ಆರ್ತಿ ಆಯಿ ನಮ್ಗ್ ಕಾಂಬುಕ್ ಗಮ್ಮತ್. ಬತ್ತಿ ಹಚ್ಚುಕ್ ಸೇರಿದ್ ಮಕ್ಳಲ್ ಸೀನಿಯಾರಿಟಿ ಪ್ರಕಾರ ಆರ್ತಿ ಸಿಕ್ಕತ್. ಮೊದ್ಲ್ ಮೊದ್ಲ್ ಸಣ್ ಸಣ್ ಹಿತ್ತಾಳಿ ಆರ್ತಿ, ಕಡಿಗ್ ಹಿತ್ತಾಳಿದ್ ರಥದ್ ಆರ್ತಿ, ಅದಾದ್ ಮೇಲ್, ಮೊದ್ಲಿಗ್ ಒಂದ್ನೇ ಹಿಟ್ಟಿನ್ ಆರ್ತಿ ಸಿಕ್ಕಾಗ್ಳ್, ಒಂದ್ ದೊಡ್ಡ್ ಪ್ರಮೋಷನ್ ಬಂದ್ ಹಾಂಗ್, ಕ್ರಮೇಣ ಆರ್ತಿ ನಂಬರ್ ಜಾಸ್ತಿ ಆಗ್ತಾ ಹೋತ್. ಕೊನೇ ಆರ್ತಿ ಮಕ್ಳ್ ಲೀಡರಿಗೆ ಇಲ್ಲಾ ಅವ ಪಾಪ ಕಂಡ್ ಯಾರಿಗ್ ಕೊಡ್ತ್ನೋ ಅವ್ರಿಗ್. ನಾವ್ ಬೇಡ್ಕಂಡ್ ಬೇಡ್ಕಂಡ್ ಆರ್ತಿ ಪ್ರಮೋಷನ್ ತಕ್ಕಂಬದ್! ಹತ್ತನೇ ಆರ್ತಿ ಚಾನ್ಸ್ ಎಲ್ಲಾ ದೊಡ್ಡ ಮಕ್ಳಿಗ್ ಸಿಕ್ಕು ಹಾಂಗ್ ಲೀಡರ್ ಮಾಡ್ತಾ! ಅಪರೂಪಕ್ ಯಾವ್ದೋ ಹಬ್ಬಕ್ ಬೇರೆ ಊರಿಗ್ ಮಕ್ಳ್ ಹೋಯ್ ಬಂದ್ ಮಕ್ಳ್ ಕಮ್ಮಿ ಇದ್ರ್, ಆ ದಿನ ಮಾತ್ರ ೨-೩ ಆರ್ತಿ ಒಬ್ನಿಗೇ ಮಾಡು ಅವ್ಕಾಶ!

ಬತ್ತಿ ಹಚ್ಚಿ ಮೇಲ್ ಸಲ್ಪ ಹೊತ್ ದೇವಸ್ಥಾನದ್ ಹೊರ್ಗ್ ಆಟ, ಕಡಿಗ್ ಮಂಗಳಾರ್ತಿ ಸುರು ಆಪತಿಗೆ, ಐದ್ ಮಕ್ಕಳಿಗ್ ಗರ್ಭ ಗುಡಿಲ್ ಕೆಲ್ಸ. ಎಡದಲ್ ೩ ಜನ್, ಬಲದಲ್ ೨ ಜನ. ಎಡದಲ್, ಒಬ್ಬ ಒಂದೊಂದೇ ಆರತಿ ಕ್ರಮ ಪ್ರಕಾರ ದೂಡಿ ಕೊಡ್ತ, ೨ನೆಯವ ಬೆ೦ಕಿ ಹಚ್ಚಿ ಕೊಟ್ರೆ, ಮೂರ್ನೆಯವ ಅದನ್ ಇನ್ನೂ ಹೆಚ್ಚ್ ಹತ್ತಿ ಉರಿವಾಂಗ್ ಕಂಡ್ಕಂಡ್ ಗರ್ಭಗುಡಿ ಒಳ್ಗ್ ಕೊಡ್ತ. ಪುರೋಹಿತ್ರ್ ಆರ್ತಿನ್ ವೈಭವದಿಂದ್ ಆಕಡೆ ಈಕಡೆ, ಮೇಲೆ ಕೆಳ್ಗೆ ಸುತ್ ಸುತ್ ಮಾಡಿ ಅರ್ತಿ ಮಾಡಿ ಹೊರ್ಗ್ ಕೊಡ್ತ್ರ್. ಬಲ ಬದಿಲ್ ನಾಕನೆಯವ ಆ ಆರ್ತಿನ ಕೈ ಸುಟ್ಕಂಡ್ದೇ ಹಿಂದ್ ಹಾಕ್ತ, ಅಲ್ಲ್ ಒಬ್ಬ ಜೂನಿಯರ್ ಕೂತಿರ್ತ, ಅವ ಆರ್ತಿದ್ ಉಳಿದ್ ಬತ್ತಿ ಎಲ್ಲಾ ಇನ್ನೊದ್ ಹಿತ್ತಾಳಿ ಸಣ್ಣ ಆರ್ತಿಲ್ ದ್ವಾಸಿ ಕೆರ್ಸಿ ಹಾಂಗ್ ಕೆರ್ಸಿ ತೆಗ್ದ್, ನಾಳಿಗ್ ಮತ್ ಉಪ್ಯೋಗ್ಸುವ್ ಹಾಂಗ್ ಕ್ಲೀನ್ ಮಾಡಿ ಇಡ್ತ. ಉಳದ್ ಬತ್ತಿ ಹಾಕಿದ್ ಹುಡ್ಗರಲ್, ಒಬ್ಬನಿಗ್ ಜಾಗಂಟಿ ಬಾರ್ಸು ಚಾನ್ಸ್, ಒಂದಿಷ್ಟ್ ಜನ್ರಿಗ್ ದೇವಸ್ಥಾನದ ಗಂಟಿಗಳನ್ ಹೊಡೆಯುವ ಚಾನ್ಸ್, ಉಳ್ದವ್ರ್ ಗರ್ಭಗುಡಿ ಹೊರ್ಗ್ ಎಡ್ ಬಲದಲ್ ಉದ್ದಕ್ ಕೂತ್, ಆರ್ತಿ ಕಾಂಬುದ್, ನಾ ಹಾಕಿದ್ ಆರ್ತಿ ಬತ್ತಿ ಹ್ಯಾಂಗ್ ಉರ್ದಿತ್ ಅಂತ. ತೀರಾ ಪಡ್ಪೋಷಿ ಮಾಡಿ ಬತ್ತಿ ಹಚ್ಚುವವ ಸಿಕ್ ಹಾಕಂಡ್ ಹಿಂಭಡ್ತಿ ತಕ್ಕಂತ, ಒಳ್ಳೇ ಆರ್ತಿ ಉರಿದ್ರ್, ಹಚ್ಚಿಯವ್ನಿಗ್ ಭಡ್ತಿ. ಹಾಂಗಾಯ್, ಮಕ್ಳಿಗ್ ಹೆಚ್ ಎಣ್ಣಿ ಬಟ್ಟಿ ಹಾಕಿರ್ ಲಾಯ್ಕ್ ಉರಿತ್ ಅಂತ್ ಗೊತ್ತಾಯ್, ಬತ್ತಿ ಹಾಕುವಾಗ್ಳಿಗ್ ಪುರೋಹಿತ್ರ್ ಹತ್ರ್ ಇನ್ನೂ ಕೊಡಿ ಅಂತ್ ಬೇಡುದ್. ಅವ್ರೂ ಬುದ್ಧಿವಂತ್ರ್, ರೇಷನ್ ಲೆಕ್ಕದಲ್, ಯಾವ್ಯಾವ್ ಆರ್ತಿಗ್ ಎಷ್ಟ್ ಎಷ್ಟ್ ಬಟ್ಟಿ ಮತ್ ಎಷ್ಟ್ ಎಷ್ಟ್ ಅಕ್ಕಿ ಹಿಟ್ಟಿನ್ ಚುಕ್ಕಿ ಅಂತ್ ನಿಗ್ದಿ ಮಾಡಿ ಅದ್ಕ್ ಸರಿಯಾಯಿ ಮಾಡಿ ಕೊಡ್ತ್ರ್. ಅದ್ಕೇ ಉಮೇದ್ವಾರಿಗಳ್ ಏನ್ ಮಾಡ್ತ್ರ್ ಅಂದ್ರ್, ಎಣ್ಣಿ ಬಟ್ಟಿದ್ ಸ್ವಲ್ಪ ನೂಲ್ ನೂಲ್ ಉದ್ದಕ್ ತೆಗ್ದ್, ಆರ್ತಿಗ್ ಬಟ್ಟಿ ಹೂಗ್ ಹಾಕಿ ಮೇಲ್ ಆರ್ತಿ ಬತ್ತಿ ಹೂವಿನ್ ಮೇಲ್ ಎಣ್ಣಿ ಬಟ್ಟಿದ್ ನೂಗಲ್ ಉದ್ದ ಅಗ್ಲ ಹಾಕಿ ಇಡ್ತ್ರ್, ಆರ್ತಿ ಹಚ್ಚಿಯಾಗ್ಳ್, ಈ ನೂಗಳ್ ಒಂದೇ ಸರಿ ಉರ್ದ್, ಅಗ್ನಿ ದೇವನ ವಿಶ್ವ ದರ್ಶನ, ಬತ್ತಿ ಹಚ್ಚು ಮಕ್ಳೆಲ್ಲಾ "ಓವ್" ಅಂತ್ ಹೇಳಿ ಬತ್ತಿ ಹಚ್ಚಿಯವ್ನ್ ಕಣ್ ಕಂಡ್ ಕಣ್ ಹಾಸ್ರುದ್, ಮೆಚ್ಚಿಗೆಯ್ ಶಿಫ್ಹಾರಸ್ಸಿನಲ್, ಅಲ್ಲಿಗ್ ಆದಿನದ್ ಕಬ್ಜಕ್ ಬೆಲಿ ಬಂದಹಾಗ್! ಅಪ್ರೂಪಕ್ ನೂಲ್ ಹಾಕಿಯವ್ ಸರಿ ಹಾಕ್ದಿದ್ರ್, ಅವೆಲ್ಲ ಆರ್ತಿ ಮಾಡ್ವಾಗ, ಒಂದೇ ಸರಿ ಪುರೋಹಿತ್ರ್ ಕೈಮೇಲ್ ಬಿದ್, ಮರ್ದಿನ ಪುರೋಹಿತ್ರ್ ಯಾರ್ ಹಾಂಗ್ ಮಾಡಿದ್ ಅಂತ್ ಸಣ್ಣಕ್ ಹೇಳಿ ಅವನ್ ವಿಚಾರ್ಸ್ಕಂತ್ರ್!

ಸ್ವಾಣಿ ಆರ್ತಿ ಗಮ್ಮತ್ತ್ ಇನ್ನೂ ಇತ್, ಪೂಜಿ ಆದ್ಮೇಲ್ ಎಲ್ಲರಿಗೂ ಪನ್ಯಾರ, ಅರ್ಳ್ ಪಂಚಕಜಾಯ, ಕೋಸಂಬ್ರಿ, ಹುಳಿ ಅವ್ಲಕ್ಕಿ, ಮೊಸ್ರ್ ಅವ್ಲಕ್ಕಿ, ಕಡ್ಲಿ ಉಸ್ಲಿ, ಹೀಂಗ್ ರುಚಿರುಚಿಯಾದ್. ಎರ್ಡ್ ಎರ್ಡ್ ಸ್ವಾಣಿ ಆರ್ತಿ ಇದ್ರ್, ಎರ್ಡೆರೆಡ್ ಪನ್ಯಾರ. ಮಕ್ಳೆಲ್ಲ ಸಾಲಾಗ್ ಕೂತ್ಕಂಡ್ ತಕ್ಕಂಬ್ದ್. ದೊಡ್ಡವ್ರಿಗ್ ಎಲ್ಲಾ ಕೊಟ್, ಮಕ್ಳಿಗ್ ಹಂಚಿ, ಹೊರಗ್ ಕೆಸುವಿನೆಲಿ ಹಿಡ್ಕಂಡ್ ಬ್ರಾಹ್ಮಣೇತರರಿಗ್ ಹಂಚಿ, ಒಳ್ಗ್ ಬಪ್ಪತಿಗ್ ಮತ್ತೂ ಉಳ್ದ್ರ್ ಕುಸ್ರಿ ಅಂತ್ ಮತ್ ಸಲ್ಪ ಹಂಚುದ್. ಎರ್ಡನೇ ಸರಿ ಕೈಹಿಡ್ದವರಿಗ್ ಮಾತ್ರ ಕೊಡುದ್, ಹಾಂಗಾಯ್ ದೊಂಬಿ, ಆ ದೊಂಬಿಯಲ್ ಪಾಪದ್ ಪುರೋಹಿತರ್ ಇದ್ರೆ ಅಪರೂಪಕ್ ಪಾತ್ರಕ್ಕೇ ಕೈ ಹಾಕ್ಕಂಡ್ ಒಬ್ಬಿಬ್ರ್ ತಕ್ಕಂಡ್ ಬೈಸ್ಕಂಡದ್ದೂ ಕಂಡಿದ್ದೆ.

ಸೋಣಿ ತಿಂಗ್ಳ್ ಗಮ್ಮತ್ತೇ ಹೀಂಗ್. ಇಷ್ಟ್ ದೊಡ್ ಪೀಟ್ಕಿ ಯಾಕ್ ಅಂದ್ರ್ ನಮಗ್ ಸೋಣಿ ತಿಂಗ್ಳಿಗ್ ಇದಕ್ಕಿಂತ್ ದೊಡ್ಡ್ ಗಮ್ಮತ್ ಇನ್ನೊಂದ್ ಇದ್ದಿತ್, ಅದೇ ಸದಿ ಮಾಷ್ಟ್ರದ್ ರಾಮಾಯಣ ಕಾವ್ಯ ವಾಚನ ಮತ್ ಅರ್ಥ ಹೇಳುದ್.

ಮಧ್ಯಾಹ್ನ ಊಟ ಆಯಿ, ಸುಮಾರ್ ೧.೧೫ಕ್ ಸದಿ ಮಾಸ್ಟ್ರ್ ದಪ್ಪದ್ ರಾಮಾಯಣ ಪುಸ್ತಕ ತಕ್ಕಂಡ್ ಕಾವ್ಯವಾಚನ ಸುರು ಮಾಡ್ತ್ರ್. ಅವ್ರ್ ಧರ್ಮಪತ್ನಿ, ವಾಗಮ್ಮ (ಶ್ರೀಮತಿ ವಾಗ್ದೇವಿ ಅಮ್ಮನವರು) ಅವ್ರ್ ಅಡ್ಗಿ ಮನಿ ಬಾಗ್ಲ್ ಮೆಟ್ಲಲ್ ಕೂತ್ಕಂಡ್ ಕೇಂಬುದ್. ಸದಿ ಮಾಷ್ಟ್ರ್ ದೊಡ್ಡ್ ಸ್ವರದಲ್ಲೇ ಹಾಡುದ್ ಹಾಂಗಾಯ್, ಅವ್ರ್ ಸ್ವರ ಕೇಳುಕು, ಅಕ್ಕಪಕ್ಕದ್ ಮನಿಯವ್ರೆಲ್ಲ ಅವರ್ ಮನಿಗ್ ಪದ್ರಡ್. ನಮ್ ಅಮ್ಮನೂ ಕೆಲ್ಸ ಮುಗ್ದ್ ಕೂಡ್ಲೇ ಓಡ್ಕಂಡ್ ಬಂದ್ ಕೂತ್ಕಂತಿದ್ರ್! ಕೆಲಸರಿ ೨೫ ಜನರ್ ವರಿಗೂ ಸೇರುದ್ ಇರತ್.

ಸದಿ ಮಾಷ್ಟ್ರ್ ಒಂದೊಂದೇ ಕಾಂಡದ್ ಪದ ಹಾಡ್ತಾ ಬರ್ತ್ರ್. ಪದ ಕಾವ್ಯವಾಚನದ ಶೈಲಿಲ್ ಹೇಳಿ, ಆಮೇಲ್ ಅರ್ಥ ಹೇಳುದ್. ಭಾರೀ ಉತ್ಸಾಹ, ಆಸಕ್ತಿ ಮತ್ತು ಭಕ್ತಿಯಲ್ ಅರ್ಥ ಹೇಳ್ತ್ರ್. ಕೆಲವೊಮ್ಮೆ, ಹಾಡ್ ಹೇಳ್ತಾ, "ರಾಮಾ" ಅಂತ್ ಬಂದ್ ಪದವನ್ನ್ "ರಾಮಾ...." "ರಾಮಾ...." ರಾಮಾ..." ಅಂತ್ ಆರ್ತತೆಯಂದ್ ಉದ್ದುದ್ದ ಉದ್ದುದ್ದ ಮಾಡಿ ಹಾಡಿ ನಾವ್ ಮಕ್ಳಿಗ್ ನಾಟಕೀಯತೆಯನ್ ಹೆಚ್ಚಿಸಿ ಗಮ್ಮತ್ ಜಾಸ್ತಿ ಮಾಡ್ತಿದ್ರ್, ದೊಡ್ಡವ್ರಿಗ್ ಭಕ್ತಿ ಜಾಸ್ತಿ ಮಾಡ್ತಿದ್ರ್!

ಸುಮಾರ್ ಮೂರುವರಿವರಿಗೂ, ಕಾಪಿ ಕುಡು ಸಮಯದ್ ವರಿಗೂ ಇದ್ ಸಾಗುದ್. ಇಡೀ ಸ್ವಾಣಿ ತಿಂಗ್ಳಲ್ ರಾಮಾಯಣನ್ ಪೂರ್ಣ ಹಾಡಿ ಮುಗ್ಸುದೇ, ಅದೂ ಕೊನೆಗ್ ಯುದ್ಧಕಾಂಡಕ್ ಸಮುದ್ರಕ್ ಸೇತ್ವೆ ಕಟ್ಟುವಲ್ಲಿಂದ್ ಹೆಚ್ಚ್ ಸಮಯ ಬೇಕ್, ಗಮ್ಮತ್ ಜಾಸ್ತಿ ಇಪ್ಕೋಯ್, ಮೊದ್ಲಿನ್ ಕಾಂಡ ಎಲ್ಲಾ ಸಲ್ಪ ಎಕ್ಸ್ ಪ್ರೆಸ್ ಆಯಿ ಇರತ್. ನಾವ್ ಇನ್ನೂ ಸಣ್ಣವರ್, ಹೆಚ್ಚಿನ್ನೂ ಯಕ್ಷಗಾನ ಕಂಡಿಲ್ಲ, ಹಾಂಗಾಯ್ ಸದಿ ಮಾಷ್ಟ್ರ್ ಕಾವ್ಯವಾಚನದಲ್ಲೇ ನಾವ್ ರಾಮಾಯಣ ಲಾಯಕ್ ಕಲ್ತಕಂತ್.

ಕಿಷ್ಕಿಂದಾ ಕಾಂಡ ಬಂದ್ಕೂಡ್ಲೇ ಗಮ್ಮತ್ ಹೆಚ್ ಆಪು ಸುರು ಆತ್. ಸದಿ ಮಾಷ್ಟ್ರ್ ಮಂಗಗಳ ಮಂಗನಾಟಗಳಿಗ್ ಇನ್ನಷ್ಟ್ ಇಂಬ್ ಕೊಟ್ ಮಕ್ಳನ್ನೆಲ್ಲಾ ಮಂಗ ಮಾಡಿ ಗುಲ್ಲೆಬ್ಬಿಸುತ್ತಿದ್ರ್. ಹನುಮಂತ ಬಂದ್ರ್ ಸೈ, ಮಕ್ಳಿಗ್ ಎಲ್ಲಾ ಗಮ್ಮತ್ ತಡ್ಕಂಬಕ್ ಆಪುದೇ ಅಲ್ಲ, ಅವ ಮಾಡಿದ್ ಸಾಹಸ ಸಲ್ಪಿಲ್ಲೇ, ಸಮುದ್ರ ಹಾರಿದ್, ಲಂಕೆ ಸುಟ್ ಹಾಕಿದ್, ಸಂಜೀವಿನಿ ಪರ್ವತ ತಂದದ್, ರಾಮಲಕ್ಷ್ಮಣರನ್ ಹೊತ್ ಯುದ್ಧಮಾಡ್ಸಿದ್, ಅವ್ನೇ ವಿಚಿತ್ರ ವಿಚಿತ್ರ ಯುದ್ಧ ಮಾಡಿದ್, ಅವ ಗಮ್ಮತ್ತಿಗ್ ಯುದ್ಧ ಮಾಡಿರೂ ರಾಕ್ಷಸರ್ ಸಾಯುದ್, ಹೀಂಗ್ ಅವ ಬಂದ್ ಕೂಡ್ಲೆ ಕತಿ ರಂಗ್ ಏರುದ್. ಸದಿ ಮಾಷ್ಟ್ರೂ ಮಕ್ಳಿಗ್ ಮಂಗಂಗ್ ಸಾರಾಯ್ ಕುಡ್ಸಿಯಾಂಗ್ ಮಾಡುದ್! ಮಕ್ಕ್ಳ್ ಕೇಕೆ ಹಾಕ್ವಾಗ ಸದಿ ಮಾಷ್ಟ್ರ್ ಕೂಡಾ ಏರಿ ಮಸಾಲಿ ಜಾಸ್ತಿ ಹಾಕುದ್, ಸ್ವರ ಇನ್ನೂ ದೊಡ್ಡದ್, ಆಲಾಪದಲ್ ಲಹರಿ ಜೋರ್ ಜೋರ್.

ನಾವ್ ಮಧ್ಯಾಹ್ನ ಶಾಲಿಗ್ ಹೋಪ್ಕೋಯ್, ನಂಗ್ ಸಿಕ್ಕುದ್ ಶನಿವಾರ, ಭಾನುವಾರ, ರಜಿ ದಿನ. ನಮ್ಗ್ ತಪ್ಪಿಹೋದ್ ಬಗ್ ತಲಿಬಿಸಿ ಕಮ್ಮಿ, ಕೇಳಿದ್ ದಿನ ಎಲ್ಲದನ್ನೂ ತುಂಬಿಸಿಕೊಂಡ್ ಬರತ್. ಶಾಲಿ ದಿನ, ಊಟ ಆದ್ ಮೇಲ್ ಅರ್ಧ ಗಂಟಿ ಕೇಂಬುಕ್ ಸಿಗುದ್, ಕಡಿಗ್ ಶಾಲಿಗ್ ಓಡುದ್!

ಹನುಮಂತನಷ್ಟೇ ಗಮ್ಮತ್ ಕೊಟ್ಟವ ಕುಂಭಕರ್ಣ, ಹನುಮಂತ ಮೊದ್ಲ್ ಲಂಕಿಗ್ ಬಂದಾಗ್ಳಿಗ್, ಕುಂಭಕರ್ಣನ್ ಗೊರ್ಕಿಗ್ ಮೂಗಿನ್ ಹೊಳ್ಳಿಗೇ ಹೋಯ್ ಸಿಕ್ ಹಾಕಂಡ್, ಅವ್ನ್ ಬಿರ್ಗಾಳಿಯಂತ್ ಉಸ್ರಿಗ್ ಮ್ಯಾಲೆ ಕೆಳ್ಗೆ ಹೋಯ್, ಕಡಿಗೆ ಮೈ ದೊಡ್ಡದ್ ಮಾಡ್ಕಂಡ್ ಮೂಗಿನ್ ಹೊರ್ಗ್ ಬಂದಾಗ್ಳಿಗ್ ನಮ್ಗೆ ಅಯ್ಯಬ್ಬ! ಹಾಂಗೆ ಯುದ್ದಕ್ ಅವನ್ ಏಳ್ಸುಕ್ ಎಷ್ಟೆಲ್ಲಾ ತಾಪತ್ರಯ! ಬದ್ಕಲ್ ಗಮ್ಮತ್ ಆಗಿ ಇಪ್ಪುಕೆ ಈ ಕುಂಭಕರ್ಣ ಒಬ್ಬ ಸ್ಫೂರ್ತಿಯೇ ಆದ!

ಯುದ್ಧಕಾಂಡದಲ್ಲ್ ಒಂದಂದ್ ದಿನ ಒಂದಂದ್ ಯುದ್ಧ, ರಾವಣನ್ ಯುದ್ಧ ಕೊನೇಗ್ ಎರ್ಡ್ ದಿನ ತಕ್ಕಂತ್. ರಾವಣ ಸತ್ ಮೇಲ್ ನಂಗ್ ಬ್ಯಾಜರ್ ಸುರು, ರಾಮಾಯಣ ಮುಗಿತ್ತಲೇ ಅಂತ್. ಕಡಿಗೆ ಎಲ್ಲರೂ ಅಯೋಧ್ಯೆಗ್ ಬಂದ್ ರಾಮ ಪಟ್ಟಾಭಿಷೇಕ ಆಗುವತ್ತಿಗ್ ನಮ್ಗ್ ಎದಿ ಸಲ್ಪ್ ಬಿಗ್ದ್ ಬಪ್ಪುದ್!
ಆದ್ರೂ ಕಾರ್ತಿಕ್ ತಿಂಗ್ಳಲ್ ಕೊಸ್ರ್ ಅಂತ್ ಸಲ್ಪ ಸಿಗ್ತಿತ್!
ದೀಪಾವಳಿ ಮುಗ್ದ್, ಕಾರ್ತಿಕ್ ಮಾಸ ಬಂದಾಗ್ಳಿಗ್, ದ್ವಾದಶಿ ದಿನ (೨ ಸಲ ಬತ್) ಆಚರಣಿ ಜೋರ್. ಬೆಳ್ಗ್ ಎದ್ದ್, ಬೇಗ್ ಮಿಂದ್, ದೊಡ್ ಅರಿ ಆಪಷ್ಟ್ ದ್ವಾಸಿ ಮಾಡಿ, ದೇವ್ರಿಗ್, ತೊಳ್ಸಿ ಗಿಡಕ್ ನೈವೇದ್ಯ ಮಾಡಿ ಲೆಕ್ಕಿಲ್ದಷ್ಟ್ ದ್ವಾಸಿ ತಿಂದ್ ಗಮ್ಮತ್ ಮಾಡ್ಕಂಡ್ ಶಾಲಿಗ್ ಹೋಯ್ ಬಂದ್ ಕಂಡ್ರ್, ಆವತ್ ರಾತ್ರಿವರಿಗೂ ಮನಿಲ್ ದ್ವಾಸಿಯೇ ಊಟಕ್. ದ್ವಾಸಿಗ್ ಹುಳಿ, ಬೆಲ್ಲ, ಸಾರ್, ಮೊಸ್ರ್, ಪಾಯ್ಸ ಹಾಕ್ಕಂಡ್ ತಿನ್ಕಂಡ್ ಹೊಟ್ಟಿ ಭಾರ ಆಯ್ ಕಾಲೆಳ್ಕಂಡ್ ಜಗ್ಲಿಗ್ ಬಂದ್ರ್, ಸದಿ ಮಾಷ್ಟ್ರ್ ಸ್ಪೆಷಲ್ ಆವತ್ತಿಗ್, ವಿಶೇಷ ಕಾವ್ಯವಾಚನ, ಅವ್ರಿಗ್ ಇಷ್ಟ ಆದ್ ಭಾಗ ತಕ್ಕಂಡ್, ಇಲ್ಲಾ ವಾಗಮ್ಮ ಹೇಳಿದ್ ಸನ್ನಿವೇಶ, ಒಂದ್ ಒಂದೂಕಾಲಿಗೆ ಬೇಗ ಸುರುವಾದ್ರ್ ಶಾಲಿಗ್ ಮತ್ ಹೋಪುದ್ರೊಳಗೇ ಒಂದ್ ಅರ್ಧ ಘಂಟಿ ಕೇಂಬುಕ್ ಸಿಕ್ಕತ್, ಒಂದುಮುಕ್ಕಾಲಿಗ್ ಓಡ್ಕೋಂಡ್ ಹೋರ್ ಸಾಕ್.

ಇದ್ ಅಪ್ರೂಪದ್ ಕಾವ್ಯವಾಚನ, ಹಾಂಗಾಯ್ ಸದಿ ಮಾಷ್ಟ್ರ್ ಸ್ಪಿರಿಟ್ ಜಾಸ್ತಿ ಇರತ್. ಒಂದ್ ಹಾಡ್ ತಕ್ಕಂಡ್ ಅದ್ರಲ್ಲೇ ಮುಳ್ಗಿ, ತಾರಕಕ್ ಹೋಯ್ ಆಲಾಪ ಹೆಚ್ಚಿಸಿ ಕೂಗು ಸುರುಮಾಡ್ತ್ರ್, ಸ್ವರವೂ ದೊಡ್ಡದ್, ಆಗ್ಳಿಗ್, ವಾಗಮ್ಮ ಸಣ್ ನಗಿಲ್ ಹೇಳ್ತ್ರ್, "ಇವತ್ ದ್ವಾಸಿ ಗಟ್ಟಿ ಬಿದ್ದಿತ್, ಎರ್ಡ್ ಹೆಚ್ಚೇ ತಿಂದಿದ್ರ್" ಅಂತ. ಸದಿ ಮಾಷ್ಟ್ರ್, ಹಾಡು ಅರ್ಥದಲ್ಲೇ ನಗು ತನ್ಕಂಡ್ "ಹೌದ್, ಇವತ್ತಿನ ದ್ವಾಸಿ ಭರ್ಜರಿ, ಲಾಯಕ್ ಆಯ್ತ್" ಅಂತ್ ನಗುವಲ್ಲೇ ಉತ್ತರಿಸುವುದು ನಮ್ಗ್ ಗಂಡ ಹೆಂಡತಿದ್ ಹಳ್ತಿನ್ ಕಾಲದ್ ಸರಸ ಸಲ್ಲಾಪ ಅಂತ್ ಗೊತ್ತಾಯ್, ಇನ್ನೂ ಖುಷಿ. ಇಷ್ಟ್ ಮಾತ್ ಬಂದದ್ದಕ್ಕೆ ಸದಿ ಮಾಷ್ಟ್ರ್ ಏರ್ಕಂಡವ್ರ್ ಇಳುದೇ ಇಲ್ಲ, ಇನ್ ವಾಗಮ್ಮನೇ ಹೇಳ್ಕ್, ಸಾಕ್ ಇವತ್ತಿಗ್, ಕಾಪಿ ಮಾಡ್ವಾ ಅಂತ್! ಈ ಕಾವ್ಯವಾಚನ ಎಷ್ಟ್ ಗಮ್ಮತ್ತೋ, ನನಗೆ ಈ ದಂಪತಿಗಳ ಸೂಕ್ಷ್ಮವಾದ ಸರಸ ಸಲ್ಲಾಪವೂ ಅಷ್ಟೇ ಗಮ್ಮತ್ ಕೊಟ್ಟಿತ್. ಸದಿ ಮಾಷ್ಟ್ರ್ ಅವ್ರ್ ಹೆಂಡ್ತಿನ ಭಾರೀ ಪ್ರೀತಿಸಿದ್ರ್, ವಾಗಮ್ಮನೂ ಸದಿ ಮಾಷ್ಟ್ರಿ ಲಹರಿಗ್ ಒಳ್ಳೇ ಗಾಳಿ ಹಾಕ್ತಿದ್ರ್! ಸದಿ ಮಾಷ್ಟ್ರ್, ನಮ್ಮೆದುರೇ, ವಾಗಮ್ಮನಿಗೆ ಊರಿನ್ ಎಲ್ಲಾ ಸುದ್ದಿ ಕೊಡ್ತಿದ್ರ್, ಮತ್ ಎಲ್ಲಾ ನಿರ್ಣಯಕ್ ಅವರ್ ಹತ್ರ ಮಾತಾಡ್ತಿದ್ರ್, "ಹ್ವಾ, ಇವ್ಳೆ, ಹೀಂಗ್ ಮಾಡಿರ್ ಹ್ಯಾಂಗೇ"! ವಾಗಮ್ಮನೂ ನೇರ, ಅವ್ರಿಗ್ ಸಂಬಂಧಿಸಿದ್ ವಿಷಯದಲ್ಲಿ ಖಡಕ್ ತೀರ್ಪು, ಉಳಿದ್ ವಿಷಯದಲ್ ನೀವೇ ಹೇಳಿಯಂಗ್. ಸದಿ ಮಾಷ್ಟ್ರ್ ಎಷ್ಟ್ ಜಾಣರು ಅಂದ್ರೆ, ಒಂದ್ ದಿನವೂ ಅವ್ರ್ ಹೆಂಡ್ತಿ ಜೊತಿಗ್ ಜಗ್ಳ ಇಲ್ಲಾ ಸ್ವರ ಏರ್ಸಿದ್ ಇಲ್ಲ, ವಾಗಮ್ಮನೂ ಹಾಗೇ, ಸದಿ ಮಾಷ್ಟ್ರ್ ಮೇಲ್ ಸ್ವರ ಏರ್ಸುವರಿಗ್ ಸದಿ ಮಾಷ್ಟ್ರ್ ಬಿಟ್ಟದ್ದೇ ಇಲ್ಲ! ಅಷ್ಟು ಅನ್ಯೋನ್ಯ, ಈ ಅನ್ಯೋನ್ಯತೆ, ವಾಗಮ್ಮನ ಸಹೋದರ "ಸ್ವಾಮಯ್ಯ" ಬಂದಾಗ್ಳಿಗೂ! "ನಮ್ ಸ್ವಾಮಯ್ಯ" ಅಂತ್ ಅವರ್ ಹೊತ್ಕಂಡ್ ತಿರ್ಗಿದೇ ನಂಗ್ ಭಾರೀ ಸ್ಫೂರ್ತಿ ಕೊಟ್ ವಿಷ್ಯ, ಒಬ್ಬ ಮನ್ಷ ಬಂಧುವಿನ ಕುರಿತು ಇಷ್ಟ್ ಕಾಳಜಿ ತೋರ್ಸ್ತಾನಲ್ಲ ಅಂತ!

ಕಾರ್ತಿಕ್ ಮಾಸದಲ್ ದ್ವಾದಶಿ ಅಲ್ದೇ, ಕಾರ್ತಿಕ್ ಸ್ವಾಮ್ವಾರನೂ ಕಾವ್ಯವಾಚನ ಮಾಡಿದ್ ಇತ್!

ರಾಮಾಯಣ ಕಾವ್ಯವಾಚನ, ಸದಿ ಮಾಷ್ಟ್ರ ನೂರು ಪ್ರತಿಭೆಯ ಮುಖಗಳಲ್ಲಿ ಒಂದ್, ಈ ವಿಷಯದಲ್ ಸದಿ ಮಾಷ್ಟ್ರ್ ತನ್ನನ್, ಹೆಂಡ್ತಿಯನ್, ಬಂದ್ ನೆರ್ದ್ ಕೇರಿ ಮನಿಯವರನ್ನ, ಮುಖ್ಯವಾಗಿ ಮಕ್ಳನ್ ರಮಿಸಿ ರಮಿಸಿ ರಾಮನಾಗಿಯೇ ಹೋದ್ರ್! ಹನುಮಂತನ ಉತ್ಸಾಹಕ್ ಎಣೆಯಾಗಿ ರಾಮಭಂಟನೇ ಆದ್ರ್! ವಾಗಮ್ಮ ಮೊದ್ಲೇ ತೀರಿ ಹೋದ್ರ್, ಅದ್ರ್ ಮೇಲ್ ಸದಿ ಮಾಷ್ಟ್ರ್ ಸ್ವಭಾವದಂತೆ ಎಷ್ಟೇ ಗೆಲ ಇದ್ರೂ, ವಾಗಮ್ಮ ಮೊದ್ಲೇ ಹೋದದ್ ಒಂದ್ ಕೊರತೆಯೇ ಆಯ್ತ್, ಸೀತೆ ಕಳ್ಕಂಡ್ ರಾಮನ್ ಹಾಗ್ ಸೂಕ್ಷ್ಮದಲ್ ನೋಡಿದವರಿಗ್ ಕಾಣ್ತಿದ್ರ್, ರಾಮಾಯಣದ್ ಕಾವ್ಯವಾಚನದ್ ವೈಭವಕ್ಕೂ ಒಂದ್ ಅಂತಿಮ ತೆರೆ ಬಿತ್!

ಸದಿ ಮಾಷ್ಟ್ರ್ ರಾಮಾಯಣ ಕಾವ್ಯವಾಚನ, ನಮ್ ಪಡುಕೆರಿ ಕೇರಿಯಲ್ಲಿ ನ ಭೂತೋ ನ ಭವಿಷ್ಯತಿ ಅಂಬಂತೆ ಅಮೋಘ, ಅಪೂರ್ವ, ಬಣ್ಣಿಸಲಸದಳ! ಇನ್ ಯಾರಾದರೂ ಪ್ರತಿಭಾವಂತ ಉಮೇದ್ವಾರಿ, ಸದಿ ಮಾಸ್ತರ ಸವಿ ನೆನಪು ಮತ್ ಗೌರವದಲ್ಲಿ ಈ ಕಾವ್ಯವಾಚನ ಸನ್ನಿವೇಶವನ್ ಮತ್ತೆ ಹುಟ್ಟಿಸಬೇಕಷ್ಟೇ! ಅಂತಹ ತಾಕತ್ತು, ಅವರ ಮಗ ಸುರೇಂದ್ರ ಉಪಾಧ್ಯರಿಗೆ ಇನ್ನೂ ಇದೆ ಅಂತ ಅನ್ಸತ್!
(ಇನ್ನೂ ಇದೆ!)

ಪರಶುರಾಮ ಸೃಷ್ಟಿ ಕಥನಗಳ ನಿತ್ಯೋತ್ಸವ - ಪಾ.ನ.ಉ. ೦೦೦೮ - ಸದಿ ಮಾಸ್ತ್ರ ಕಥಿ - ಭಾಗ ೨

ಸದಿ ಮಾಸ್ತ್ರ ಕಥಿ - ಭಾಗ ೨

Photo Courtesy: Sri Surendra Upadhya, s/o Sadi Mastar (Shreeman Subraya Upadhya)
Original post at: https://www.facebook.com/notes/nataraja-upadhya/%E0%B2%B8%E0%B2%A6%E0%B2%BF-%E0%B2%AE%E0%B2%BE%E0%B2%B8%E0%B3%8D%E0%B2%A4%E0%B3%8D%E0%B2%B0-%E0%B2%95%E0%B2%A5%E0%B2%BF-%E0%B2%AD%E0%B2%BE%E0%B2%97-%E0%B3%A8/10154710042717738
ಸದಿಯ ಮಾಸ್ತರ್ ಒಂದ್ನೇ ಕ್ಲಾಸಲ್ ಕಲ್ಸುವಾಗ ಆದ್ ಇನ್ನೊಂದು ಕಥಿ. ಭಾರತಿ (ಹೆಸ್ರು ಬದಲಾಯಿಸಿದ್ದೇನೆ) ಪುರೋಹಿತ್ರ್ ಮಗ್ಳ್, ಒಳ್ಳೇ ಗುಣ, ಚೂಟಿ. ಒಂದಿನ ಯಾಕೋ ಮಾಸ್ಟ್ರ್ ಕ್ಲಾಸಿಲ್ ಇಲ್ಲ, ಇನ್ನೊಂದ್ ಕ್ಲಾಸಿಗೆ ಪಾಠಕ್ ಹೋಯಿರ್. ಇವ್ಳ್ ಮನಿಂದ ದುಡ್ ಇಪ್ ಡಬ್ಬೀನೇ ಹಿಡ್ಕಂಬದಿದ್ದ್ಳ್! ನಾವೆಲ್ಲ ಕೇಂತ್, ಇದ್ ನಿಂದೆಯಾ? ಹೌದ್! ಅಪ್ಪಯ್ಯನೇ ಕೊಟ್ದ್, ಅಷ್ಟೂ ನಂದೇ ಅಂತ್ ಹೇಳಿದ್ ಅಲ್ದೇ ಅಷ್ಟೂ ದುಡ್ಡನ್ ಕ್ಲಾಸಿಲ್ ಎಲ್ಲರಿಗೂ ಹಂಚೀಳ್! ಕೇಳಿ ಕೈಚಾಚಿಯವ್ರಿಗೆಲ್ಲ ದಾನ ಧರ್ಮ, ಅವ್ಳ್ ಸುತ್ ಒಂದ್ ಸಣ್ಣ ದೊಂಬಿಯೇ ಆಯ್ತ್, ಸುಮಾರ್ ಜನ್ರಿಗ್ ನೋಟ್, ಒಂದಷ್ಟ್ ಜನ್ರಿಗ್ ಒಂದ್ ರೂಪಾಯ್ ನಾಣ್ಯ, ನಂಗ್ ತಾಮ್ರದ್ ಒಂದ್ ಪೈಸ ಜಗ ಜಗ ಹೊಳುದ್ ಲಾಯಕ್ ಆಯಿ ಕಂಡ್ಡ್ ಒಂದ್ ಮುಷ್ಟಿ ಆಪಷ್ಟ್ ಸಿಕ್ತ್. ಬಹುಶ: ಅಪ್ಪಯ್ಯ ಪುರೋಹಿತ್ರ್, ದಾನ ಧರ್ಮ ದಕ್ಷಿಣಿ ಬಂದದ್ ಡಬ್ಬಿಗ್ ಹಾಕಿದ್ ಒಬ್ಳೆ ಮಗ್ಳ್ ಅಂತ್ ಕೊಟ್ಟಿಪ್ಕೂ ಸಾಕ್! ನಮ್ಗೋ ಖುಷಿಯೇ ಖುಷಿ, ಶಾಲಿಗ್ ಬಂದದ್ಕ್ ದುಡ್ ಸಿಕ್ಕತ್ ಅಲ್ಲಾ ಅಂತ, ಎಲ್ಲರೂ ನಂದ್ ಕಾಣ್, ನಿಂದ್ ತೋರ್ಸ್ ಅಂತ ಕೈಲಿದ್ ಕಾಂಬುದ್ ತೋರ್ಸುದ್, ಇವ್ಳೋ, ಒಂದು ಮಹಾಸಾಧನೆ ಮಾಡಿದ ಖುಷಿಲ್ ರಾಜಕುಮಾರಿ ಹಾಗ್ ಬೀಗಿದ್ಳ್! ಅವಳ್ ಡಬ್ಬಿ ಪೂರ್ಣ ಖಾಲಿಯಾಗಿತ್, ಅವಳ ಇಡೀ ಕ್ಲಾಸಿನವ್ರ್ ಮೇಲಿನ ಪ್ರೀತಿಗ್ ಒಂದ್ ಅಭಿವ್ಯಕ್ತಿ ಸಿಕ್ಕಿದ್ ಗಮ್ಮತ್ತಲ್ ಅರಳ್ಕಂಡ್ ನಸು ನಗಾಡ್ಕಂಡ್ ನಾವ್ ಖುಷಿಲ್ ಮಾಡು ಗಲಾಟಿನ್ ಕಂಡ್ಕಡ್ ನಲಿದಾಡಿದ್ಳ್, ನಂಗಂತೂ ಅವ್ಳನ್ ಆಗ್ಲಿಗ್ ಕಂಡಾಗ್ಲಿಗ್ ದೇವ್ರನ್ ಕಂಡಷ್ಟ್ ಖುಷಿ, ಮನ್ಸಲ್ಲೇ ಅವ್ಳ್ ಗೆಲದ್ ಒಂದ್ ಪಟ ತೆಕ್ಕಂಡ್ ಇಟ್ಕಂಡದ್ ಇಷ್ಟ್ ವರ್ಷ ಆರೂ ಚೂರೂ ಹಾಳಾಯ್ಲ!

ಮಾಸ್ಟ್ರ್ ಕ್ಲಾಸಿಗ್ ಬತ್ ಬತ್ನೆ ನಮ್ ದೊಂಬಿ ಗಲಾಟಿ ಗೊತ್ತಾಯ್ತ್, ಮಕ್ಳ್ ಕೈಲಿದ್ ದುಡ್ ನೋಡಿ ಹೌಹಾರಿ ಹೋದ್ರ್, ಇದ್ ಎಲ್ಲಿಂದ ಬಂತ್? ಯಾರ್ ಕೊಟ್ಟದ್? ಭಾರತಿ ಕೊಟ್ಟದ್ ಅಂತ ಗೊತ್ತಾದ್ಲ್ಮೇಲೆ, ಅವ್ಳೂ ಕೂಡಾ ಆತ್ಮವಿಶ್ವಾಸದಲ್ಲೇ ಹೇಳಿಳ್, ಹೌದ್, ನಾನೇ ಕೊಟ್ಟದ್, ನಂದೇ ಅದ್, ಅಪ್ಪ ಕೊಟ್ಟದ್. ಸದಿ ಮಾಷ್ಟ್ರ್ ಅವ್ಳಿಗ್ ಹೊಡಿಲಿಲ್ಲ, ಬಡಿಲಿಲ್ಲ, ಶಾಲಿಗ್ ದುಡ್ ತಪ್ಪಾಂಗಿಲ್ಲ, ಎಲ್ಲಾ ವಾಪಾಸ್ ತಕಂಡ್ ಹೋಗ್ಬೇಕ್, ಎಲ್ಲರೂ ದುಡ್ ವಾಪಾಸ್ ಕೊಡಿ ಅಂತ್ ಹೇಳಿರ್, ನಮ್ಗ್ ಗುಡ್ಗಿ ಹಾಂಗ್ ಆಯ್ತ್, ಮಿಣ್ಣಗ್ ಒಬ್ಬೊಬ್ರೇ ಹೋಯ್ ಅವಳ್ ಡಬ್ಬಿಗ್ ದುಡ್ಡ್ ಹಾಕ್ತ್, ನಾ ಹಾಕುಕೆ ಹೋದಾಗ್ಲಿಗ್ ಅಲ್ಲೇ ಸೀನ ಇದ್ದ, ಪಾಪ ಬಡವ್ರ್ ಮನಿಯವ, ನಮ್ಗಿಂತ ದೊಡ್ಡವ, ಸುಮಾರು ಹತ್ ರೂಪಾಯ್ ಮೇಲ್ ಅವನ್ ಕೈಯಲ್ಲೇ ನೋಟ್ಗಳ್ ಇತ್, ಅವ್ನಿಗ್ ವಾಪಾಸ್ ಹಾಕುದ್ ಭಾರೀ ಕಷ್ಟ ಆಯ್ ಕಣ್ಣೀರ್ ಬಪ್ಪಂಗ್ ಇತ್! ಭಾರತಿ ಅಂತೂ ತನ್ನ ಕನಸಿನ ಅರಮನಿಯೇ ಬಿದ್ದ್ ನೋವಲ್ಲಿ ಅಳ್ತಾ ನಿಂತ್ ದುಡ್ಡಿನ್ ಡಬ್ಬಿ ಹಿಡ್ಕಂಡಿದ್ಳ್!

ಎಲ್ಲರೂ ವಾಪಾಸ್ ಹಾಕಿದ್ಮೇಲೆ ಮಾಸ್ಟ್ರ್ ದುಡ್ ಲೆಕ್ಕ ಮಾಡಿರೆ, ನೂರ್ ರೂಪಾಯಿ ಮೇಲ್ ಇಪ್ಪುದ್ ನೋಡಿ ಇನ್ನಷ್ಟ್ ಹೌಹಾರಿದ್ರ್, ಹತ್ರ ಹತ್ರ ಅವರ್ ಒಂದ್ ತಿಂಗ್ಳ್ ಸಂಬ್ಳ ಆಪಷ್ತಿತ್, ಅವ್ಳಿಗ್ ಹೇಳಿರ್, ಈ ದುಡ್ ಹೀಂಗೆ ಮನಿಗ್ ಹೋಯ್ಕ್, ನಿಮ್ಮಪ್ಪನ್ ಹತ್ರ ನಾ ಮಾತಾಡ್ತೆ, ಎಷ್ಟ್ ವಾಪಾಸ್ ಬಂತ್ ಅಂತ್ ಲೆಕ್ಕ ಕೇಂತೆ ಅಂದ್ರ್! ನಮ್ಗೂ ಬೇರೆಯವ್ರ್ ದುಡ್ ಹಾಂಗ್ ತಕಂಬ್ಕಾಂಗ ಅಂತ್ ಬುದ್ಧಿವಾದ ಹೇಳಿರ್! ಎಲ್ಲರೂ ಆವತ್ ಇಡೀ ತಣ್ಣಗೆ ಬ್ಯಾಜಾರಲ್ಲೇ ಇತ್, ಮಾಷ್ಟ್ರ್ ಬಯ್ದದಕ್ ಅಲ್ಲ, ನಮಗ್ ಗಮ್ಮತ್ ಇಪ್ಪುದ್ ಎಲ್ಲ ದೊಡ್ಡವ್ರ್ ಕಣ್ಣಲ್ ತಪ್ಪಲ್ವಾ, ಅವರ್ನ್ ನಾವ್ ನಂಬತ್, ನಮ್ಮನ್ ನಾವ್ ನಂಬ್ ಹಾಂಗ್ ಇಲ್ಲಲೇ ಅಂತ್!

ಭಾರತಿ ಎರ್ಡ್ ದಿನ ಶಾಲಿಗೇ ಬರ್ಲಿಲ್ಲ, ಸದಿ ಮಾಷ್ಟ್ರ್ ಅವರ್ ಅಪ್ಪಯ್ಯನಿಗ್ ಹೇಳಿದ್ ಅಲ್ದೇ, ಅಪ್ಪಯ್ಯನಿಗೇ ಬುದ್ಧಿವಾದ ಹೇಳಿರ್ಕ್, ಅವ್ರಿಗ್ ತಲಿಬಿಸಿ ಆಯಿ ಮನೀಲ್ ಎರ್ಡ್ ಅವ್ಳಿಗ್ ಬಿಟ್ಟಿರ್ಕ್!

ಭಾರತಿ ಮತ್ತೆ ಶಾಲೆಗ್ ಬಂದ್ಳ್! ಅವ್ಳ್ ದೇವರಾಂಗಿನ್ ಮುಖ ಮತ್ ನಂಗ್ ಜನ್ಮದ್ಲ್ ಕಾಂಬುಕ್ ಸಿಗ್ಲಿಲ್ಲ, ಸಲ್ಪ ಸೀರಿಯಸ್ ಆಯೇ ಇಪ್ಪು ಸುರುಮಾಡ್ಲ್, ನಂಗ್ ದೇವ್ರನ್ನೇ ಕಳ್ಕಂಡ್ ನೋವ್ ಹಾಂಗೇ ಉಳ್ದ್ ಹೋಯ್ತ್! ಕಡಿಗ್ ಅವ್ಳ್ ಶಾಲಿ ಬದ್ಲಾಯ್ಸಿಳೋ, ಫೇಲ್ ಆಯಿ ಹಿಂದ್ ಬಿದ್ಲೋ, ನಾವ್ ಮೂರ್ನೇ ಕ್ಲಾಸಿಗ್ ಬಪ್ಪತಿಗ್ ಮರೆ ಆಗಿ ಹೋದ್ಳ್! ಆದ್ರ್ ಆವತ್ತಿನ್ ಅವ್ಳ್ ರಾಜ ದರ್ಬಾರ್, ನಂಗೆ ಜನ್ಮಾಂತರಕ್ಕ್ ಹ್ಯಾಂಗ್ ದರ್ಬಾರ ಮಾಡುದ್ ಅಂತ್ ಕಲ್ಸಿ ಕೊಡ್ತ್. ಸದಿ ಮಾಸ್ತ್ರ್ ಹೇಳಿದ್ ಎಲ್ಲ ಸರಿ, ಅವರ್ ಹೊಡಿದೇ ಬಡಿದೇ ಬಯ್ದೇ ಅವ್ಳನ್ ಕಂಡ್ಕಂಡದ್ದೂ ಸರಿ, ಅವ್ರ ಬುದ್ಧಿವಾದವೂ ಸರಿ, ಆದ್ರ್ ಅವಳ್ ಶಕ್ತಿ ಭಾರೀ ಇಪ್ಕೋಯೋ ಏನೋ, ದುಡ್ಡಿನ್ ವಿಷ್ಯದಲ್ ಸದಿ ಮಾಷ್ಟ್ರ್ ಬುದ್ಧಿವಾದ ಬದ್ಕಲ್ ನಾಟ್ಲೇ ಇಲ್ಲ, ಅವಳದ್ದೇ ಆಟ ಮಿಗಿಲಾಯ್ತ್!

ನಂಗ್ ಈಗ ಅನ್ಸುದ್, ಸದಿ ಮಾಸ್ತ್ರ್ ಮಕ್ಳಲ್ ದೇವ್ರನ್ನೇ ಕಂಡ್ರ್, ಆದ್ರೂ ಮಕ್ಕಳ್ ನೀತಿ ಬಿಟ್ಟಾಗ ಅವ್ರನ್ ಮಾನವರನ್ನಾಗಿ ಕಂಡ್ರ್, ಯಾವತ್ತೂ ಅವರ್ ಸಿಟ್ಟಿಗ್ ಹೊಡದ್ದೇ ಇಲ್ಲ, ಮಂಗನಾಟ ಜಾಸ್ತಿ ಆದಾಗ್ ಶಿಕ್ಷೆ ಅಪ್ರೂಪಕ್ ಶಾಸ್ತ್ರಕ್ ಕಿವಿ ಹಿಂಡಿದ್ ಬಿಟ್ರೆ! ಆ ಕಿವಿ ಹಿಂಡುದ್ ಕೂಡ ನೋವಿಲ್ಲ, ಕಾಂಬವರ್ ಎದ್ರ್ ಮರ್ಯಾದಿ ಹೋಪಷ್ಟ್ ಮಾತ್ರ! ಮಕ್ಳಿಗ್ ಮಾಸ್ತ್ರ್ ಅಂದ್ರ್ ಹೀಂಗ್ ಇರ್ಕ್!

ಸದಿ ಮಾಷ್ಟ್ರ್ ರಿಟೈರ್ ಆದ್ರ್, ನಾವ್ ಒಂದೊಂದೇ ಕ್ಲಾಸ್ ಪಾಸಾತಾ ನಾಕನೇ ಕ್ಲಾಸಿಗ್ ಬಂತ್. ಸದಿ ಮಾಸ್ಟ್ರ್ ಮನಿ ನಮ್ಮನಿ ಹಿಂದೇ. ನಮ್ಮನಿ ಅಂಗ್ಡಿಗ್ ಸಾಮಾನ್ ತಕಂಬಕ್ ಬಂದಿದ್ದ್ರ್, ನಾವ್ ಅಣ್ಣ ತಮ್ಮರೆಲ್ಲ ಅಂಗ್ಡಿ ಕೆಲ್ಸ ಮಾಡಿದವ್ರ್ ಅಪ್ಪಯ್ಯ ಗದ್ದಿಂದ ಅಂಗ್ಡಿಗ್ ಬಂದ್ರಂತ್ ಕೈಬಿಟ್ಟ್ ಓದು ಬದ್ಲ್ ಇಸ್ಪೀಟ್ ಆಡು ಸುರ್ಮಾಡಿತ್, ನಮ್ಮನಿ ಒಳ್ಗ್ ಜಗ್ಲಿಲೇ, ರಾತ್ರಿ ೮ ಗಂಟಿ ಇರ್ಬಹುದು!

ಸದಿ ಮಾಷ್ಟ್ರ್ ಅಂಗ್ಡಿ ಹೊರ್ಗ್ ಗಿರಾಕಿ ಇತ್ ಅಂತ್ ನಮ್ಮನಿ ಒಳ್ಗ್ ಬಂದ್ ಅಂಗ್ಡಿ ಬಾಗ್ಲಲ್ ನಿತ್ಕಂಡ್ರ್, ನಾವ್ ಆಟದ್ಲ್ ಮುಳುಗಿ ಹೋಯಿತ್, ಅವ್ರ್ ಬಂದದ್ ಕಾಣ್ಲೇ ಇಲ್ಲ, ಆಟದ್ ಕೇಕೆ ನಮ್ದ್ ನಡೀತಿತ್. ನಮ್ಮೂರಲ್ ಒಂದ್ ಸಂಪ್ರದಾಯ, ನಮ್ ಮೇಷ್ಟ್ರ್ ನಾವ್ ಸಾಯಲೊರಿಗೂ ನಮ್ಗ್ ಗುರುಗಳ್ ಇದ್ದಹಾಂಗ್, ಭಯ ಭಕ್ತಿಯಲ್ಲೇ ನಮಸ್ಕಾರ, ಇನ್ ಸಲಿಗಿ ಇದ್ರ್ ಪ್ರೀತಿದ್ ಮಾತ್. ಸದಿ ಮಾಷ್ಟ್ರಿಗ್ ಅನ್ಸಿಕ್, ಈ ಚಂದ್ರನ್ ಮಕ್ಳ್ ಎಲ್ಲಾ ಒಳ್ಳೆಯವೇ, ಇವತ್ ಏನ್ ಕಂಡ್ರೂ ಕಾಣ್ದಿದ್ದಂಗ್ ಇದ್ರಲ್ಲಾ ಅಂತ್ ಅನ್ಸಿ, ಮಕ್ಳೇ ಏನ್ ಮಾಡ್ತಿದ್ರಾ ಅಂತ ನಮ್ಮನ್ನೇ ಮಾತಾಡ್ಸಿರ್, ನಾವ್ ಸದಿ ಮಾಷ್ಟ್ರ್ ಅಂತ್ ಗೊತ್ತಾದ್ಕೂಡ್ಲೆ, ಕೈಲಿದ್ ಇಸ್ಪೀಟ್ ಎಲ್ಲಾ ಕೆಳ್ಗ್ ಹಾಕಿ ರಸ್ತಿಲ್ ವಾಹನದ್ ಬೆಳಕಿದ್ ಕಾಡ್ ಪ್ರಾಣಿ ಪಿಳಿಪಿಳಿ ಕಾಂತಾ ಎಂತ ಮಾಡುಕ್ ಗೊತ್ತಾಗ್ದೆ ನಿಂತಾಂಗ್ ಕೂತ್ಕಂಡ್ ಪಿಳಿಪಿಳಿ ಕಾಂತ್! ನಾವ್ ಕಳ್ರಾಂಗ್ ಇದ್ದದ್, ಅವ್ರ್ ಬಂದಾಗ್ಳಿಗ್ ನಮಸ್ಕಾರ ಮಾಡಿ ಭಯಭಕ್ತಿ ತೋರ್ಸ್ದಿದ್ದದ್, ನಮ್ ಕಳ್ನಾಟ ನೋಡಿ ಅವ್ರ್ ಕೆಳ್ಗ್ ಬಿದ್ ಇಸ್ಪೀಟ್ ಕಂಡ್ ಕೆಂಡಾಮಂಡಲ ಆದ್ರ್, ನಮ್ ಅಪ್ಪ ಅಮ್ಮನ್ ಎದ್ರೇ ನಮ್ಗ್ ಸರೀ ಬಯ್ದ್ರ್! "ಮಕ್ಳ್ ಇಸ್ಪೀಟ್ ಆಡ್ಲಿಕ್ ಕೂಡ್ದ್, ಮುಂದ್ ಬದ್ಕ್ ಒಳ್ಳೆದಾಗುವುದಿಲ್ಲ" ಅಂತ ತಾಕೀತ್ ಮಾಡಿರ್. ನಾವ್ ಮಿಣ್ಣಗೆ ಇಸ್ಪೀಟ್ ಜೋಡ್ಸಿ ಒಳ್ಗಿಟ್ ಒಬ್ಬೊಬ್ರೆ ಉಪ್ಪರಿ ಮೇಲ್ ಜಾರಿದ್, ನಮ್ ಓದು ಕೋಣಿಗ್, ಅಲ್ ಕೂತ್ಕಂಡ್ ಒಬ್ರಿಗ್ ಒಬ್ರ್ ಹಲ್ ಚಿಲೀತಾ ಇತ್! ಈ ಮಾಷ್ಟ್ರ್ ರಿಟೈರ್ ಆದ್ ಮೇಲೂ ಮನಿಗ್ ಬಂದ್ ಬಯ್ಯು ತಾಕತ್ ಇಪ್ಪೋರ್ ಅಂಬ ನಗ್ನ ಸತ್ಯಕ್, ನಮ್ಗ್ ಬಯ್ದದ್ಕಿಂತ ಅವರ್ ಬಯ್ದದ್ ನಮ್ ಅಪ್ಪ ಅಮ್ಮನಿಗೂ ತಾಗ್ತಲೇ ಅಂಬ ವೈಚಿತ್ರ್ಯಕ್ಕೆ!

ಅಂಗ್ಡಿ ಕೆಲ್ಸ ಮಾಡಿದ್ ಮೇಲ್ ಹಗುರ ಆಪುಕೆ ನಂಗ್ ಇಸ್ಪೀಟ್ ಆಟ ಬೇಕಿತ್, ಕತ್ತಿ, ಎಳ್ಗತ್ತಿ, ಸೆಟ್ ಆಟ ಹೀಂಗ್. ಅದ್ ಆಡುದ್ ತಪ್ ಅಂತ್ ನಮ್ಗ್ ಸದಿ ಮಾಷ್ಟ್ರ್ ಬಯ್ದ್ ಮೇಲೂ ಅನ್ಸ್ಲಿಲ್ಲ, (ಬಹುಷ: ಸದಿ ಮಾಷ್ಟ್ರ್ ಕಾಲ್ದಲ್ ಇಸ್ಪೀಟ್ ಆಡಿಯವ್ರ್ ಜೂಜಾಡಿ ಕಳ್ಕಂಡದ್ದೇ ಜಾಸ್ತಿ) ನಮ್ಮ ಅಪ್ಪ ಅಮ್ಮನೂ ಎಂದೂ ಅದ್ ತಪ್ ಅಂತ್ ಕಂಡವ್ರಲ್ಲ, ಹಾಂಗಾಯ್ ಅವ್ರ್ ಬಯ್ದ್ ಮೇಲೂ ನಮ್ಗ್ ಎಂತದೂ ಹೇಳಿಯವ್ರಲ್ಲ, ಸದಿ ಮಾಷ್ಟ್ರ್ ಹೋದ್ ಮೇಲೂ ಇದ್ರ್ ಬಗ್ ಅವ್ರದ್ ಮಾತಿಲ್ಲ, ಪರ ಆಗ್ಲಿ ವಿರುದ್ಧ ಆಗ್ಲಿ, ಮಕ್ಳಿಗ್ ಬುದ್ಧಿ ಬಪ್ಪು ಮಾತ್ ನಮ್ಗಿಂತ ಅವ್ರ್ ಮೇಷ್ಟ್ರಿಗ್ ಗೊತ್, ಅವ್ರ್ ಬಯ್ದಿದ್ ನಮ್ ಮಕ್ಳ್ ಒಳ್ಳೇದಕ್ಕೇ ಅಂಬ್ ಶರಣಾಗತಿ ಮನೋಭಾವ ಅವ್ರದ್! ನಾವಾ, ಇಸ್ಪೀಟ್ ಆಡುದ್ ಬಿಡ್ಲಿಲ್ಲ, ಹಾಂಗ್ ಸದಿ ಮಾಷ್ಟ್ರ್ ಬತ್ತಿದ್ರ್ ಅಂದ್ಕೂಡ್ಲೇ ಎಲ್ಲಾ ಪಟಪಟ ಸೇರ್ಸಿ ಒಳ್ಗಿಟ್, ಅವ್ರನ್ ಎದ್ರುಗುಂಬಿ ನಮ್ಸ್ಕಾರ ಮಾಡಿ ಅಂಗ್ಡಿ ಸಾಮಾನ್ ಕೊಡುಕ್ ಹೋತಿತ್, ಒಳ್ಳೇವ್ರಾಗಿ ಕಾಣ್ಬೇಕಲ್ಲ, ನಮ್ ಮೆಚ್ಚಿನ್ ಗುರುಗಳ್ ಎದ್ರ್!

ನಾವ್ ಎರ್ಡನೇ ಕ್ಲಾಸಲ್ ಇಪ್ಪಾಗ ಸದಿ ಮಾಷ್ಟ್ರ್ ರಿಟೈರ್ ಆದ್ರ್, ಒಂದ್ ಆರ್ ತಿಂಗ್ಳಲ್ಲೇ ನಮ್ ಮಹಾಬಲ್ ಮಾಷ್ಟ್ರ್ (ನಂಗ್ ಎರಡನೇ ಕ್ಲಾಸಿಲ್ ಇದ್ರ್, ಅವ್ರ ಕಥಿನೂ ಮುಂದ್ ಬತ್) ಕೂಡಾ ರಿಟೈರ್ ಆದ್ರ್! ಅವ್ರಿಬ್ರಿಗೂ ಸೇರಿ ನಮ್ ಶಾಲಿಲ್ ಸನ್ಮಾನ ಮಾಡಿರ್, ಮಾಷ್ಟ್ರ್, ಮಕ್ಳ್, ಮಕ್ಳ್ ಅಪ್ಪ ಅಮ್ಮ (ಅವ್ರಿಗೂ ಮಾಷ್ಟ್ರ್ ಆಯಿದ್ರ್ ಇವ್ರಿಬ್ರೂ) ಎಲ್ಲ ಕಣ್ಣೀರ್ ಹಾಕಿದ್! ಮಕ್ಳಿಗ್ ಮತ್ ಹೆತ್ತವ್ರಿಗ್ ತಮ್ ಬದುಕಲ್ ಅತೀ ಪ್ರೀತಿಸಿದ್ ಮಾಷ್ಟ್ರ್ ರೆಟೈರ್ ಆದ್ ನೋವ್ ಇದ್ರೆ, ಮಾಷ್ಟ್ರಿಗ್ ಅವರ್ ಪಾಠಕ್ ಸ್ಫೂರ್ತಿ ಕೋಡೋ ಹಿರಿಯರ್ ಇನ್ ಶಾಲಿಲ್ ಇಲ್ಲ ಅಂಬಗೇ, ಕಡೀಗ್ ಒಬ್ರ ಮರ್ಕಿದ್ ಗಾಳಿ ಎಲ್ಲರಿಗೂ ತಾಗಿ ಒಂದ್ ರೀತಿ ಎಲ್ಲರೂ ಭಾರೀ ನೋವ್ ಅನುಭವಿಸಿದ್, ಸನ್ಮಾನಗೊಂಡವರೂ ಸೇರಿ, ಹಾಂಗಿತ್ ಕಾಣಿ ನಮ್ ಶಾಲಿ ಬದ್ಕ್! ಇಂಥ ನೋವಲ್ಲೂ ಮಹಾಬಲ ಮಾಷ್ಟ್ರ ಎಂದಿನ್ ಗಾಂಭೀರ್ಯ ಮತ್ ಸ್ನೇಹದಲ್ ಮಾತಾಡಿರ್, ಸದಿ ಮಾಷ್ಟ್ರ್ ಸಲಿಗೆಯಲ್ ಮಾತಾಡಿ ಎಲ್ಲರಿಗ್ ನಗಿ ತರ್ಸಿಯೇ ಕೂತ್ಕಂಡ್ರ್, ಸದಿ ಮಾಷ್ಟ್ರ್ ಇದ್ದಲ್ ನಗಿ ಇಲ್ಲ ಅಂದ್ರ್ ದೇವ್ರಿಗ್ ಕಷ್ಟ!


----ಇನ್ನೂ ಇದೆ!

Tuesday, April 12, 2016

ಪರಶುರಾಮ ಸೃಷ್ಟಿ ಕಥನಗಳ ನಿತ್ಯೋತ್ಸವ - ಪಾ.ನ.ಉ. ೦೦೦೭ - ಸದಿ ಮಾಸ್ತ್ರ ಕಥಿ - ಭಾಗ ೧





Original post: https://www.facebook.com/notes/nataraja-upadhya/%E0%B2%B8%E0%B2%A6%E0%B2%BF-%E0%B2%AE%E0%B2%BE%E0%B2%B8%E0%B3%8D%E0%B2%A4%E0%B3%8D%E0%B2%B0-%E0%B2%95%E0%B2%A5%E0%B2%BF-%E0%B2%AD%E0%B2%BE%E0%B2%97-%E0%B3%A7/10154700229502738

Photo courtesy: Sri Surendra Upadhya, S/O Mr. Subraya Upadhya (The very hero of this serial)
ಸದಿ ಮಾಸ್ತ್ರ್ (ಶ್ರೀಮಾನ್ ಸುಬ್ರಾಯ ಉಪಾಧ್ಯರು) ನಮ್ ಪಾರಂಪಳ್ಳಿ ಪಡುಕೆರಿ ಗುಡ್ಡಿ ಶಾಲಿಲ್ ಒಂದ್ನೇ ಕ್ಲಾಸಲ್ ಮಾಸ್ಟ್ರ್ಇದ್ರ್, ನಾವ್ ಒಂದ್ನೇ ಕ್ಲಾಸ್ ಬಿಟ್ ಕೂಡ್ಲೇ ರಿಟೈರ್ ಆದ್ರ್, ಅಂದ್ರ್ ಆವಾಗ ಅವ್ರಿಗ್ ೫೯ ವರ್ಷ, ಯಾಕ್ ಹೇಳ್ದೆ ಅಂದ್ರೆ, ನಮ್ಗ್ ಅವ್ರ್ ೧೮ರ ಯುವಕನೇ ಇದ್ರ್!
ಶಾಲಿಯವ್ರಿಗೂ ಇವರ್ ಉಮೇದ್ ಗೊತ್ತಿತ್, ಹಾಂಗಾಯ್ ಒಂದ್ನೇ ಕ್ಲಾಸಿಗೇ ಹಾಕಿದ್ರ್. ಆಗಿನ್ ಕಾಲದಲ್ (ಸುಮಾರು ೧೯೭೦) ಶಾಲಿಗ್ ಮಕ್ಳ್ ಬಪ್ಪಂಗ್ ಮಾಡುದೇ ಕಷ್ಟ ಇತ್! ನಮ್ ಒಂದ್ನೇ ಕ್ಲಾಸಲ್ ಸುಮಾರ್ ೪೦ರ ಮೇಲೇ ಮಕ್ಳ್ ಇತ್, ನಾವ್ ಏಳ್ನೇ ಕ್ಲಾಸ್ ಬಪ್ಪತಿಗೆ ೧೨-೧೫ ಮಾತ್ರ ಉಳ್ದೀರ್, ಉಳ್ದವ್ರೆಲ್ಲಾ ಫೈಲಾಗಿ ಒಂದೊಂದೇ ಕ್ಲಾಸಲ್ ಹಿಂದ್ ಬಿದ್ರ್ ಇಲ್ಲಾ ಹೆಚ್ಚಿನವ್ರ್ ಶಾಲಿಯೇ ಬಿಟ್ರ್.
ಈ ಒಂದ್ನೇ ಕ್ಲಾಸಲ್ ಶಾಲಿ ಬಿಟ್ಟವರ್ ಕಮ್ಮಿ, ಯಾಕೆ೦ದ್ರೆ, ಸದಿ ಮಾಸ್ತ್ರ್ ಪಾಠ ಮಾಡುದೇ ಅಷ್ಟ್ ಗಮ್ಮತ್! ೪೦ ಮಕ್ಕಳ್ ೧೦ ಅಡಿ ಅಗಲ್ದ್ ಉದ್ದದ್ ಕೋಣೇಲ್ ಕೂತ್ಕಂಡ್ರೆ, ಹಿಂದಿನ ಬೆಂಚ್ ಸುಮಾರ್ ೨೫ ಅಡಿ ಹಿಂದ್ ಇರತ್, ನನ್ನನ್ ಶಾಲಿಗ್ ಸೇರ್ಸಿದ್ ೬ ತಿಂಗಳ್ ತಡ, ಹಾಂಗಾಯ್ ನಂಗೆ ಹಿಂದಿನ ಬೆಂಚ್, ನನ್ ಜೊತಿಗ್ ಕೂತವ್ರಲ್ಲಾ ಶಾಲಿ ತಡ ಸೇರಿಯರ್ರೇ, ಸೀನಂಗ್ ೮ ವರ್ಷ ಆಯಿತ್, ಅವ ನನ್ ಪಕ್ಕ, ಭಾರೀ ಗಲಾಟಿ ಗಮ್ಮತ್ ಮಾಡ್ತಿದ್ದ!
ಸದಿ ಮಾಸ್ತ್ರ್ ಎಲ್ಲಾ ಪಾಠನೂ ಲಾಯಕ್ ಮಾಡ್ತಿದ್ರ್! ಅ ಆ ಬರ್ಸುದ್, ಪಠ್ಯ ಪುಸ್ತಕದ್ ಪಾಠ, ಲೆಕ್ಕ, ವೃತ್ತಿ (craft), ಹಾಡ್, ಕಥಿ ಹೇಳುದ್, ನೃತ್ಯ ಹೀಂಗೆ ಸುಮಾರ್ ಬಗಿ.
ನಾ ಕೋಟೇಶ್ವರದಲ್ ಅಜ್ಜನ್ ಮನಿಲ್ ೨-೩ ವರ್ಷ ಬಾಲ್ವಾಡಿಗ್ ಹೋಯ್ದೆ, ಹಾಂಗಾಯ್ ನಂಗ್ ಅ ಆ, ನೂರರವರಿಗಿನ್ ಲೆಕ್ಕ ಎಲ್ಲ ಬತ್ತಿತ್! ಮಾಷ್ಟ್ರ್ ಅ ಆ ಬರದ್ವರಿಗ್ ಕೈ ಹಿಡ್ದ್ ಬರ್ಸಿ ಹೇಳ್ಸ್ತಿದ್ರ್! ನೂರರವರೆಗೆ ಅಂಕಿ ಹೇಳ್ಸ್ತಿದ್ರ್!
ಪಠ್ಯ ಪುಸ್ತಕದಲ್ ಹಾಡಿನ್ ಪಾಠ ಇದ್ರ್ ಅವರ್ ಮೇಜಲ್ ಕೂತದ್ದೇ ಇಲ್ಲ! ಬದಿಗ್ ನಿತ್ಕಂಡ್ ಕುಣ್ಕಂಡೇ ಪಾಠ, "ಅಜ್ಜನ ಕೋಲಿದು..." ಕೋಲ್ ಹಿಡ್ಕಂಡೇ ಕುಣ್ತ, ಗಮ್ಮತ್ತೇ ಗಮ್ಮತ್, ಮಕ್ಕಳೂ ಹಾಂಗೆ, ಕುಣ್ದೇ ಹಾಡ್ ಹೇಳ್ಕ್, ನಾಚ್ಕಿ ಮಾಡು ಸಣ್ ಮಕ್ಳಿಗೆ ಹೆದ್ರಿಸಿ ಏಳಿಸಿ ಕುಣ್ಸಿ ಅವರ್ ಕಣ್ ಅರಳ್ಸುದ್!
ಇನ್ನೊಂದ್ ಗಮ್ಮತ್ತಿನ್ ಹಾಡು, ತುತ್ತೂರಿ ಹಾಡ್, "ಬಣ್ಣದ ತಗಡಿನ ತುತ್ತೂರಿ, ಕಾಸಿಗೆ ಕೊಂಡನು ಕಸ್ತೂರಿ..", ಎಲ್ಲಾ ಮಕ್ಕಳಿಗ್ ಕುಣ್ದ್ ಕುಣ್ದ್ ಸುಸ್ತ್! ಕೊನೆಗ್ ಅವ ತುತ್ತೂರಿ ನೀರಿಗ್ ಬಿದ್ದದ್ ಹೆಕ್ಕಂಡ್ ಸರಿ ಸ್ವರ ಬರ್ದೇ ಇಪ್ಪುದ್ ನಮ್ ಅನುಭವಕ್ಕೂ ಬಂದದ್ದೇ! "ಒಂದೂ ಎರಡು, ಬಾಳೆಲೆ ಹರಡು", ನಾವ್ ದಿನ ಎರಡ್ ಕೈ ಅಗ್ಲ ಮಾಡಿ ಹರಡಿ ಉಂಡದ್ದೇ ಉಂಡದ್! ಎಲೆ ಮುದುರೆತ್ತಿ ಕಿಟ್ಕಿಲ್ ಬಿಸಾಡಿದ್ದೇ ಬಿಸಾಡಿದ್!
ಮತ್ ಹತ್ರದ್ ಕ್ಲಾಸ್ನಿವರ್ ಹ್ಯಾಂಗ್ ಪಾಠ ಮಾಡ್ರೋ ಗೊತ್ತಿಲ್ಲ, ನಮ್ ಗಮ್ಮತ್ತಿನ್ ಗಲಾಟಿಲ್, ಹಾಂಗಾಯ್ ನಮ್ ಕ್ಲಾಸ್ ಒಂದ್ ಹೊಂಡದ್ ರೂಮಲ್ ಇತ್ತ್, ಬೇರೆ ಕ್ಲಾಸಿನವರ್ ಇಣುಕುದ್ ಕಮ್ಮಿ ಆಪುಕೆ!
ಪಾಠ ಪುಸ್ತಕದ್ ಪದ್ಯ ಎಲ್ ಸಾಕಾತ್, ಅವರ್ ಸರಕಿದ್ ಇನ್ನೂ ಏನೇನೋ ಹಾಡು, ಚಿಟ್ಟೆ ಹಾಡು, ನಮ್ಮನ್ನೇ ಚಿಟ್ಟೆ ಮಾಡಿ ನಲಿಸುವುದ್!
"ನಾನು ಒಬ್ಬ ಟೊಪ್ಪಿ ವ್ಯಾಪಾರಿ", ಈ ಹಾಡ್ ಶನಿವಾರಕ್ ಮೀಸಲ್. ಶನಿವಾರ ಅರ್ಧ ದಿನ ರಜಾದ್ ಗಮ್ಮತ್ತಿಗಿಂತ್ ಈ ಹಾಡ್ ಸುಮಾರ್ ಅರ್ಧ್ ಗಂಟಿ ಕುಣಿದ್ ಕುಣಿದ್ ಗಮ್ಮತ್ತಿದ್ ಸುಸ್ತ್! ಕ್ಲಾಸ್ ಒಳ್ಗೇ ದೊಡ್ಡ್ ಆಲದ್ ಮರ, ನೂರಾರ್ ಮಂಗ, ಟೊಪ್ಪಿ ಎಲ್ಲ ನಮ್ಗ್ ಕಾಣ್ಸುದ್, ಮಾಸ್ಟ್ರೇ ಟೊಪ್ಪಿ ಯಾಪಾರಿ ಆಯ್ ಅನ್ಸುದ್!
ಇಡೀ ವರ್ಷ ಮಾಸ್ಟ್ರ್ ಮತ್ ಮಕ್ಕಳ್ ಎಲ್ಲರೂ ಮಂಗ ಆಯಿ ಗಮ್ಮತ್ ಮಾಡಿದ್ದೇ ಮಾಡಿದ್.
ಕಥಿ ಸಮಯದಲ್ಲೂ ಹಾಂಗೆ, ನಾಟ್ಕ ಮಾಡಿಯೇ ಕಥಿ. ಕಥಿ ಹೇಳುಕ್ ಒಂದ್ ಪಟ ಇರ್ತಿತ್, ಅದ್ ಕಂಡ್ರೆ ಕಥಿ ಎಂತ ಗೊತ್ತಾತ್! ನರಿ ದ್ರಾಕ್ಷಿ ತಿಂಬುಕ್ ಹೋಯ್ ಸಿಗ್ದೇ ಹುಳಿ ಅಂದದ್, ಕಾಗಿ ಹೂಜಿಲ್ ಇಪ್ ನೀರ್ ಕಲ್ ಹಾಕಿ ಹಾಕಿ ಮೇಲ್ ಬಪ್ಪಾಂಗ್ ಮಾಡಿ ಕುಡ್ದ್ ಸುಮ್ನೇ ಹೋದ್ದೇ ಅಲ್ಲ, ಕಾ ಕಾ ಕಾ ಅಂತ್ ಹೇಳಿ ಹೋದ್! ಅವ್ರ್ ಹೇಳಿ ಕೊಟ್ ಕಥಿ ನಾವೂ ಹೇಳ್ಕ್, ಅವರ್ ಮಾಡಿದ್ ನಾಟ್ಕ, ಕುಣ್ತ, ಅಭಿನಯ ಮಾಡಿಯೇ ಹೇಳ್ಕ್! ಒಬ್ಬೊಬ್ಬರ್ ಅಭಿನಯ ನೋಡುದೇ ಗಮ್ಮತ್! ಕಥಿ ಕೊನೇ ವಾಕ್ಯ, ಅಭಿನಯ ಮಾಡ್ತಾ ಅವರ್ ಅವರ್ ಪ್ಲೇಸಿಗ್ ಓಡ್ಕಂಡ್ ಹೋಪುದ್ ಇನ್ನೂ ಗಮ್ಮತ್!
ಇದ್ ಸಾಲ ಅಂತ ಅವ್ರ ಸರಕಿದ್ ಸುಮಾರ್ ಕಥಿ, ಕೆಲವ್ದ್ ಎಲ್ಲ ಪುರಾಣದ್ ಘನ ಗಂಭೀರ, ನಮ್ಗ್ ಹೊಸ ಲೋಕವೇ ನಮ್ಮೆದ್ರ್!
ಲೆಕ್ಕದ್ ಪಾಠ ಬಂದ್ರೂ ಗಮ್ಮತ್ತೇ! ಎಲ್ಲಾ ಕಡ್ಡಿ ಇಟ್ಕಂಡೇ ಲೆಕ್ಕ! ೨ + ೨ ಅಂದ್ರೆ ಎಷ್ಟ್? ೨ ಕಡ್ಡಿ ೨ ಕಡ್ಡಿ ಒಟ್ಟಾಕಿ ಪುನ ಲೆಕ್ಕ ಹಾಕಿರೆ ನಾಕ್, ಎಲ್ಲಾ ಲೆಕ್ಕ ಸುಲಭದಲ್ ಕಲ್ತಕಂಡ್ರ್! ಕಡ್ಡಿ ಇಟ್ಕಂಡೇ ಮಗ್ಗಿ ಹೇಳ್ಕೊಟ್ರ್!
ನಮ್ಗ್ ಲೆಕ್ಕ ಬಂದಿತಾ ಇಲ್ಲಾ ಗೊತ್ತಾಪುಕೆ ಬಾಯ್ಪರೀಕ್ಷೆ ಮಾಡ್ಸ್ತಿದ್ರ್, ಅವರ್ ಕೊಟ್ಟ್ ಲೆಕ್ಕಕ್ ಉತ್ರ ನಾವ್ ಸ್ಲೇಟಲ್ ಬರುದ್, ಕಡಿಗ್ ಅವ್ರ್ ಮಾಡಿ ತೋರ್ಸುದ್, ಇಲ್ಲ ಒಬ್ರನ್ ಕರ್ಸಿ ಮಾಡ್ಸಿ ತೋರ್ಸುದ್, ಕಡಿಗ್ ಕೇಂಬುದ್ ಯಾರೆಲ್ಲ ಸರಿ ಮಾಡಿದ್ರಿ, ಕೈಯೆತ್ತಿ ಅಂದ್! ನಾವ್ ಮಾಡಿದ್ ಪಕ್ಕದವ್ನಿಗ್ ಆಮೇಲ್ ತೋರ್ಸ್ಕ್, ನಾವ್ ಸುಳ್ ಹೇಳಿದ್ರೆ ಸಿಕ್ಕಾಕಂಡ್ ಸುಳ್ ಹೇಳಿದ್ದಕೆ ಒಂದ್ ಪೆಟ್, ಹಾಂಗಾಯ್ ಸುಳ್ ಹೇಳುದೇ ಅಪ್ರೂಪ ಆಯ್ತ್!
ಇದೇ ರೀತಿ ಉಕ್ತ ಲೇಖನ, ಅವ್ರ್ ಹೇಳಿದ್ ಶಬ್ದ ಬರಿಬೇಕ್, ಕಡಿಗ್ ಒಬ್ಬ ಬೋರ್ಡ್ ಮೇಲ್ ಬಂದ್ ಬರುದ್, ಅವ ತಪ್ ಮಾಡಿರೆ ಇನ್ನೊಬ್ಬ ಬಂದ್ ಅದನ್ ಸರಿ ಮಾಡುದ್, ಕಡಿಗೆ ಸರಿ ಬರ್ದವ್ರ್ ಕೈ ಎತ್ತುದ್, ಪಕ್ಕ ಕೂತವ ಸುಳ್ ಹೇಳ್ದಾಂಗ್ ಕಾಯು ಯಮರಾಯ ಇದ್ದೇ ಇರ್ತ್ನಲ್ಲ!
ಹೊರಗೆ ಆಟಕ್ ಬಿಟ್ಟಾಗ್ಲಿಗೂ ಅವ್ರ್ ನಮ್ ಜೊತಿ ಬಂದ್ ಆಡ್ಸುದ್. ನಾವ್ ಹೆಚ್ ಆಡ್ತಿದ್, ಎಲ್ಲರನ್ ಸುತ್ತ ಮಾಡ್ಸಿ ಕೂಡ್ಸಿ, ಒಬ್ಬ ಸುತ್ತಲು ಓಡ್ತಾ ಇರ್ಕ್, ಯಾರ ಬೆನ್ನ ಹಿಂದ್ ಟೊಪ್ಪಿ ಇಡುದ್, ಅವ ಪುನ ಬಪ್ಪುದೊಳ್ಗೆ ಕೂತವ ಟೊಪ್ಪಿ ಹಾಕಿದ್ ತಕಂಡ್ ಒಡ್ಕ್, ಇಲ್ಲಾ ಬೆರ್ಸ್ಕಂಡ್ ಬಂದ್ ಹೊಡೆದಾಂಗ್ ಮಾಡ್ತಾ ಹೋಪುದ್!
ಮಧ್ಯಾಹ್ನ ನಾವೆಲ್ಲ ಗುಡ್ಡಿ ಮೇಲಿಂದ್ ಮನಿಗೆ ಊಟಕ್ ಹೋಯ್ ಬಪ್ಪೋರ್, ಬಪ್ಪುವಾಗ ಒಂದೂವರಿ ಆಯಿ ಇರತ್, ಗುಡ್ಡಿ ಬಿಸೀ ಬಿಸೀ, ನಮ್ಗ್ ಚಪ್ಲಿ ಇಲ್ಲ, ಕಾಲಿಡುಕ್ ಇಲ್ಲ, ಗೆಂಡದ್ ಸೇವಿಗಿಂತ್ ಬಿಸಿ, ನಾವ್ "ಅಯ್ ಅಯ್ ಅಯ್" ಅಂತ್ ಒಂದೊಂದ್ ಕಾಲಿಗ್ ಮಂತ್ರ ಹೇಳ್ತ ಕುಣ್ಕಂಡ್ ಹೋಯ್ ನೆರಳಲ್ ನಿಂತ್ ಮದ್ಲ್ ಕಾಲ್ ಪಾದ ಕಾಂಬುದ್, ಬೆಂಕಿಯಲ್ ಬದ್ನಿಕಾಯ್ ಸುಟ್ ಇಟ್ಟಂಗ್ ಅನ್ಸುದ್, ಪಾದ ಟೊಮ್ಯಾಟೊ ಹಣ್ಂಗ್ ಕೆಂಪ್, ನಿನ್ ಕಾಲಿಗಿಂತ್ ನನ್ ಕಾಲ್ ಕೆಂಪ್ ಅಂಬುದ್, ಕೆಲವ್ರ್ ಮರ್ಕಂಡೇ ಶಾಲಿ ಸೇರುದ್!
ಒಂದ್ ದಿನವೂ ಮಧ್ಯಾಹ್ನದ್ ಮೇಲ್ ನಾವ್ ಕ್ಲಾಸಲ್ ನಿದ್ದಿ ಮಾಡಿದ್ದೇ ಇಲ್ಲ, ಮಾಡುಕ್ ಬಿಟ್ರ್ ಅಲ್ದ, ಒಂದ್ ಚೂರೂ ಪುರ್ಸೊತ್ ಕೊಡದೇ ಆಟ, ಪಾಠ, ಹಾಡ್, ವೃತ್ತಿ, ನೃತ್ಯ, ಲೆಕ್ಕ, ಕಥಿ, ಉಕ್ತ ಲೇಖನ....ಇಡೀ ವರ್ಷ ಅಂಬುದ್ ಒಂದ್ ಗಮ್ಮತ್ತಿನ್ ಸಮ್ಮೇಳನ ಇದ್ದಾಂಗ್ ಇದ್ ಹೋಯ್ತ್!
ಶಾಲಿಗ್ ರಜ ಬಂದ್ ಮತ್ತ್ ಶಾಲಿಗ್ ಹೋಪತಿಗ್ ಗಮ್ಮತ್, ಇವತ್ ಮತ್ ಮಾಸ್ತ್ರ್ ಸಿಕ್ತ್ರ್ ಅಂತ್! ಅವರ್ ಕ್ಲಾಸ್ ಒಳಗ್ ಬಪ್ಪತಿಗ್ ನಿತ್ಕಂತಿತ್, ಹೆದ್ರಿಕಿಗಲ್, ಗೌರವಕ್ಕ್, ಅವರ್ ನಮ್ಮತ್ರ ಗೌರವ ಕಸ್ಕಣ್ಣ್ಲಿಲ್ಲ, ನಾವೇ ಕೊಡ್ತ್, ಖುಶೀಲೇ! ಅವ್ರದ್ ಹೆದ್ರಿಕೆ ಇರ್ಲಿಲೇ, ಆದ್ರೆ ಅವರ್ ಇಪ್ಪ್ಕೋಯ್ ತಪ್ ಮಾಡು ಹೆದ್ರಿಕೆ ಜನ್ಮಾಂತರ ಆಗೋಯ್ತ್!
ಒಂದ್ ದಿನ ಮಧ್ಯಾಹ್ನ ಶಾಲಿಯಲ್ಲೇ ಮಾಸ್ಟ್ರಿಗ್ ಬೇರೆ ಕೆಲ್ಸ ಇತ್, ಒಂದ್ ಗಂಟಿ ಯಾರೂ ಮಾತಾಡ್ದಂಗ್ ಕಣ್ಕಂಬುಕೆ ನನ್ ಹತ್ರ ಹೇಳಿದ್ರ್, ನಾನ್ ಮೇಜತ್ರ ನಿಂತ್ ಹದ್ದಿನಾಗ್ ಎಲ್ಲರನ್ ಕಾಂತಾ ಹೋಪುದ್, ಯಾರಾದ್ರು ಪಿಟ್ಕ್ ಅಂದ್ರ್ ಹೆಸ್ರ್ ಬರ್ಕಂಬ್ದ್, "ಹಾಂ! ನೀ ಮಾತಾಡ್ಯೇ" ಅಂತ್ ಅವ್ನಿಗ್ ಸೂಚನೆ ಕೊಟ್ಟೇ, ಹೆಸ್ರ್ ಸ್ಲೇಟಲ್ ಬರ್ಕಂಬ್ದ್, ಅದ್ರಲ್ ಅಬ್ದುಲ್ ಮುಣೀರ್, ಬಾಬ, ಸೀನ ಹೀಂಗೆ ಹಿಂದಿನ್ ಬೆಂಚಲ್ ನನ್ ಜೊತಿಗ್ ಕೂತವ್ರ್ ಹೆಸ್ರೇ ಜಾಸ್ತಿ ಇತ್. ಈ ಸ್ಲೇಟಲ್ ಹೆಸ್ರ್ ಬಂದವ್ರಿಗ್ ಒಂದೊಂದ್ ಪೆಟ್ ಮಾಸ್ತ್ರ್ ಬಂದ್ ಮೇಲ್ ಇಪ್ಪುದ್ ಖಂಡಿತವೇ!
ಅಬ್ದುಲ್ ಮುನೀರ್ ಮೀನ್ ಯಾಪಾರದ್ ಮನಿಯವ ಅಂತ ಕಾಂತ್, ಅವ ಬಂದ್ ನಂಗ್ ಹೇಳ್ದ, "ನನ್ನ್ ಹೆಸ್ರ್ ತೆಗೆದ್ ಹಾಕ್, ನಾನ್ ನಿನ್ನ್ ಪಕ್ಕವೇ ಕೂತ್ಕಂಬವ, ನಾವ್ ಸ್ನೇಹಿತ್ರಲ್ಲವಾ"! ಇಲ್ಲಾ, ಆತಿಲ್ಲಾ ಅಂದೆ. ಅವ ಘನಾದ್ ಎರಡ್ ಗೋಯ್ಬೀಜ ಕೊಡ್ತೆ ಅಂದ, ನಮ್ಮನಿಲ್ ಗೋಯ್ಹಾಡಿ ಇಲ್ಲಾ, ಈ ೨ ಗೋಯ್ಬೀಜ ಸಿಕ್ಕಿರೆ, ಮಣ್ಣಲ್ ಗೋಯ್ಬೀಜದ್ ಜೂಜ್ ಆಡಿ ಇಪ್ಪತ್ ಮಾಡು ಧೈರ್ಯ ಇದ್ದಿತ್, ತಕಂಡೆ, ಅವ್ನ್ ಹೆಸ್ರ್ ಹೊಡ್ದಾಕಿಯೆ!
ಮಾಸ್ಟ್ರ್ ಬಂದ್ರ್, ಸ್ಲೇಟ್ ತೋರ್ಸಿದೆ, ಹೆಸ್ರ್ ಇದ್ದವ್ರನ್ನೆಲ್ಲಾ ನಿಲ್ಸಿದ್ರ್, ಅಲ್ಲಿಗ್ ನನ್ ಕೆಲ್ಸ ಮುಗಿತ್!
ನಾ ಹಾಂಗ್ ಎಣ್ಸದ್! ಈ ಹಿಂದಿನ್ ಬೆಂಚಿನವ್ರ್ ಕಂಪ್ಲೈಂಟ್ ಮಾಡಿರ್, ನಾ ಗೋಯ್ಬೀಜ ತಕಂಡ್ ಅಬ್ದುಲ್ ಮುನೀರ್ ಹೆಸ್ರ್ ಹೊಡೆದ್ ಹಾಕಿದೆ ಎಂದ್! ಹೌದಾ ಅಂತ್ ಅವ್ನ್ ಕೇಂಡ್ರ್, ಅವ ಇಲ್ಲಾ ಅಂದ, ನನ್ ಕೇಂಡ್ರ್, ನಂಗ್ ಸುಳ್ ಹೇಳುಕ್ ಬತ್ತಿಲ್ಲ, ಹೌದ್ ಅಂದೆ ಕಣ್ಣೀರ್ ಹಾಕಂಡ್ ಮುಖ ಕೆಳ್ಗ್ ಮಾಡ್ಕಂಡ್. ಇಬ್ರನ್ನೂ ಮೇಜ್ ಹತ್ರ ಕರ್ಸಿ ಕಿವಿ ಹಿಂಡೀರ್, ನನ್ನ ಹತ್ರ ಅವ್ನ್ ಗೋಯ್ಬೀಜ ವಾಪಾಸ್ ಕೊಡ್ಸಿರ್, ನಮ್ಮಿಬ್ಬ ಹತ್ರನೂ ಇಡೀ ಕ್ಲಾಸಿಗ್ "ನಾ ಲಂಚ ಕೊಟ್ಟದ್ ತಪ್ಪಾಯ್ತ್", "ನಾ ಲಂಚ ತಕಂಡದ್ ತಪ್ಪಾಯ್ತ್" ಅಂತ್ ಹೇಳ್ಸಿ ಕಳ್ಸಿರ್, ಲಂಚ ಅಂದ್ರೆ ಎಂತ ಗೊತ್ತಿಲ್ಲದ್ ನಮ್ಗ್ ಅದ್ರ್ ಪಾಠ ಮಾಡಿ ಅದ್ ಎಷ್ಟ್ ಕೆಟ್ಟದ್ ಅಂತ ಅರ್ಥ ಮಾಡಿ ಹೇಳೀರ್! ನಂಗ್ ಅದ್ ಅರ್ಥ ಆದ್ ಮೇಲ್ ಭಾರೀ ನಾಚ್ಕಿ ಆಯ್ತ್, ಇನ್ ಜನ್ಮದಾಗ್ ಲಂಚ ತಕಂಡ್ದಿದ್ದಾಗ್ ಮಾಡಿರ್!
ನಾ ಮು೦ದ್ ಇಂಜಿನೀಯರ್ ಓದುಕ್ ಹೋದಾಗ್ಲಿಗ್ "ಸಿವಿಲ್ ಇಂಜಿನಿಯರ್" ಆಪು ಆಸಕ್ತಿ ಇತ್, ಆದ್ರ್ ಆ ಇಂಜಿನಿಯರ್ ಆದ್ರ್ ಗವರ್ನ್ಮೆಂಟ್ ಲಂಚ ತಕಂಕಾತ್, ತಕಂಡಿದಿದ್ರ್ ಬಿಡುದಿಲ್ಲ ಅಂಬ್ ಹೆದ್ರಿಕಿಲ್ ಅದ್ ಬಿಟ್ ಇಲೆಕ್ಟ್ರಿಕಲ್ ತಕಂಡೆ, ಖಾಸಗಿ ಕೆಲ್ಸ ಸಿಕ್ಕತ್ ಅಂತ!
ಸದಿ ಮಾಸ್ತ್ರ ಪಾಠ ಎಲ್ಲಾ ಹೀಂಗ್ ಇರ್ತಿತ್, ಗಮ್ಮತ್ತಿಗೆ ಗಮ್ಮತ್, ಆದ್ರೆ ಪಾಠ ಮಾಡಿದ್ ಇಡೀ ಬದುಕಿಗ್! ಅವ್ರ್ ನಮ್ ಒಂದ್ನೇ ಕ್ಲಾಸಿಗ್ ಮಾತ್ರ ಗಮ್ಮತ್ತಿಲ್ ಕಾಂಬುದ್ ಎಣ್ಸ್ಕಂಡದ್! ಅವರ್ ರಿಟೈರ್ ಆದ್ ಮೇಲ್ ನಮ್ಮನಿ ಪಕ್ಕವೇ ಇಪ್ಕೋಯ್ ಕಂಡದ್, ಬರೇ ಗಮ್ಮತ್ತಲ್ಲೇ ಆದ್ರ್ ನಿಯತ್ತಲ್ಲೇ ಇದ್ ಎಲ್ಲರನ್ ರಂಜಿಸಿದವ್ರ್! ಅವರ್ ಕಥಿ ಸುಮಾರ್ ಇತ್ ಹೇಳುಕೆ!

ಪರಶುರಾಮ ಸೃಷ್ಟಿ ಕಥನಗಳ ನಿತ್ಯೋತ್ಸವ - ಪಾ.ನ.ಉ. 000೬ - ನಾವ್ ಯಕ್ಷಗಾನ ಬಯಲಾಟ ಆಡಿದ್ ಕಥಿ - ಭಾಗ ೨



ನಾವ್ ಯಕ್ಷಗಾನ ಬಯಲಾಟ ಆಡಿದ್ ಕಥಿ - ಭಾಗ ೨ ( ಇಲ್ಲಿಗೆ ಮುಗಿಯಿತು)

ಮಂದರ್ತಿ ಮೇಳದ್ ಆಟ ಆದ್ ಮೇಲ್, ನಮ್ ಕೆಮಿಲ್ ಇಪ್ಪು ಚೆಂಡಿ ಶಬ್ದ ಹೋದ್ರೂ, ತಲಿಯೊಳ್ಗ್ ಯಕ್ಷಗಾನ ನಡುದ್ ನಿಲ್ಲೇ ಇಲ್ಲ! ಬೇಸ್ಗಿ ರಜ ಮುಗ್ದ್, ನಾವ್ ಮೂರನೇ ಕ್ಲಾಸ್ ಸೇರಿದ್ ಮೇಲ್ ಎಲ್ರನ್ನ್ ಉದ್ದ ಪ್ರಕಾರ ಬೆಂಚ್ಲ್ ಕೂಡ್ಸಿದ್ ಮ್ಯಾಲ್, ಒಂದ್ ಪಠ್ಯ ಪುಸ್ತಕದ್ ಬದ್ಲಿಗ್ ನಾಲ್ಕ್ ಆಯಿ (ಕನ್ನಡ, ಗಣಿತ, ವಿಜ್ನಾನ, ಸಮಾಜ), ನಮ್ ಪುಸ್ತಕದ್ ಬೇರೆಯವ್ರ್ ಪುಸ್ತಕದ್ ವಾಸ್ನಿ ತಕಂಡ್ ಹ್ಯಾಂಗ್ ಬೇರ್ಬೇರೆ ಪುಸ್ತಕದ್ ವಾಸ್ನಿ ಬದ್ಲಾಯಿತ್ ಅಂದ್ ಕಣ್ಕಂಡ್, ನಮ್ಮ ಹೊಸ ಟೀಚರಿಗೆ ಹೊಂದ್ಕಂಡ್ ಮೇಲ್, ನಮಗ್ ಮಾತಿಗ್ ಉಳ್ದ್ ಈ ಯಕ್ಷಗಾನ ಆಟದ್ದೇ.

ಶಾಲಿಂದ್ ಮನಿಗ್ ಬಪ್ಪತಿಗೆ, ನಾನೂ ಗಣೇಶ ಆಟದ್ ಬಗ್ ಮಾತಾಡುದು. ಗಣೇಶ ಭಾರೀ ಲಹರಿ ಮನ್ಷ ಮತ್ತ್ ನನ್ಗಿಂತ ಒಳ್ಳೆಯವ್ನ್. ಅವನ್ ಸುತ್ತ ತೆಂಕಿನ ಕೇರಿ ಮಕ್ಳ್ ಮತ್ ಅವ್ರ್ ಬಡಗಿನ್ ಕೇರಿ ಮಕ್ಳ್ ಸ್ನೇಹಿತ್ರ್ ಎಲ್ಲ ಸೇರಿ ಒಂದ್ ಹತ್-ಹದ್ನೈದ್ ಜನದ್ ಹಿಂಡ್. ಗಣೇಶಂಗ್ ಉಮೇದ ಬಂದ್ ಒಂದ್ ಭಾಗ್ವತಿಗೆ ಮಾಡುದ್. ಅದ್ ಮುಗ್ದ್ ಕೂಡ್ಲೆ ಒಬ್ಬ ಶಾಲಿ ಚೀಲನ್ ತಲಿಗ್ ಹಿಂದ್ ಬಪ್ಪಾಂಗ್ ನೇತಾಕ್ಕಂಡ್, "ಪಂ ಪಂ, ತಮ್ ತಮ್, ತುಮ್ ತುಮ್, ಗುಡುಂ ಭಡಂ" ಅಂತ ಎರಡೂ ಕೈ ಗಾಳಿಲ್ ಆಡ್ಸಿ ಮದ್ಲಿ ಬಡದ್ರೆ, ಇನ್ನೊಬ್ಬ "ರಂಭಟ ರಂಭಟ ರಂ, ರಂಭಟ ರಂಭಟ ರಂ" ಅಂತ್ ಗಾಳಿಲೇ ಚೆಂಡಿ ಬಾರ್ಸುದ್. ಇನ್ನ್ ಕೆಲವ್ರ್ ಈ ಹಿಮ್ಮೇಳಕ್ ಕುಣಿದ್, ಯುದ್ದಕ್ ಬಾ ಅಂದ್ ಹೇಳಿ ಸುತ್ತ್ ಹಾಕಿ ಯುದ್ಧ ಮಾಡಿ, ಕಡಿಗೆ ಕೆಲಸರಿ ಹೊಯ್ಂಗಿ ಗುಡ್ಡಿಲ್ ಗಮ್ಮತ್ತಿಗ್ ಹೊರಳಾಡಿ ಉರ್ಡ್ಕಂಬದ್!

ಹೀಂಗ್ ದಿನಾ ಸಾಯ್ಕಾಂಲ, ಶಾಲಿಂದ್ ಮನಿಗ್ ಹೋಪತಿಗ್ ಒಂದೊಂದ್ ದಿನ ಒಂದೊಂದ್ ಆಟದ್ ಸನ್ನಿವೇಶ ಆತಿತ್, ಆದ್ರ್ ಎಲ್ಲರಿಗ್ ಅತಿ ಇಷ್ಟವಾದ್ ಸನ್ನಿವೇಶ, ರಕ್ತಚೆಂಗ ಮತ್ ಅವನ್ ಕೊಲ್ಲು ರುದ್ರಕೋಪ, ಮದ್ಲ್ ರಕ್ತಚೆಂಗ ಬಂದ್ ಒಡ್ಡೋಲಗ ಕೊಟ್ ಒರ್ಲುದ್,ಕಡಿಗ್ ರುದ್ರಕೋಪ ಬಂದ್ ಒರ್ಲಿ, ಕಾದಾಡಿ ರಕ್ತಚೆಂಗ ಸಾಯುದು, ಅವ ಸುಲಭದಲ್ ಸಾಯ್ದಿದ್ರೆ, ಹೊಯಿಂಗಿಯಲ್ಲಿ ಇಬ್ರೂ ಉರುಡ್ಕಂಡ್, ಮತ್ ಬೇಕಾರ್ ಪುನ: ಯುದ್ಧ ಮಾಡುದ್. ಕೆಲಸರಿ, ರುದ್ರಕೋಪ ಮಾಡಿಯವ ಹೇಳ್ಕ್, ಮಾರಾಯ, ನೀ ರಾಕ್ಷಸ, ನೀ ಸೋಲ್ಕ್!, ಅದ್ಕ್ ರಕ್ತಚೆಂಗ ತಮಾಷಿ ಮಾಡುದ್, ನೀ ಸೋಲ್ಸ್ಕ್, ನಾ ಸೋಲ್ಕ್", ಇಷ್ಟತಿಗ್ ಆಟ ಹೋಯ್ ಉರುಡ್ಕಂಬದೇ ಆಟ ಆಪು ಸುರುವಾತ್, ಗಣೇಶ ಇನ್ನೊಂದ್ ಪದ ಎತ್ತಿದ್ ಮ್ಯಾಲೇನ್ ಉರುಡುದ್ ನಿಂತ್, ನಮ್ ಯಕ್ಷಗಾನದ್ ಆಟ ಮುಂದರಿತ್, ಉರ್ಡ್ಕಂಬವ್ರ್ ಮದ್ಲಿ ಚೆಂಡಿ ಶಬ್ದಕ್ ತಮ್ಮಾಟ ನಿಲ್ಸ್ಕೇ!  ನಾ ಗಣೇಶಂಗ್ ಎತ್ತಿ ಕೊಡುದ್, ಈಗ ಈ ಸನ್ನಿವೇಶ ಮಾಡ್ವಾ ಅಂತ್!

ಆಗಷ್ಟ್ ಅರ್ಧ ಆಯ್ ಮಳಿ ಕಮ್ಮಿ ಆಯಿತ್. ಗಣೇಶನೇ ಒಂದ್ ದಿನ ಕೇಂಡ, ನಾವೇ ಆಟ ಮಾಡ್ವ ಅಂತ. ಎಲ್ಲರೂ ಹಿಂದ್ಮುಂದ್ ಕಾಣ್ದೇ ಹೂಂ  ಅಂದ್ರ್. ಗಣೇಶನ್ ಮನಿ ಹಿಂದ್ ಚಿಕ್ಕಮ್ ದೇವ್ರ್ ಮನಿ ಪಕ್ಕದ್ ಗುಡ್ಡಿಲ್ ಮಾಡುದ್ ಅಂತೇಳಿ. ರಂಗಸ್ಥಳ, ಚೌಕಿ ನಾನೇ ಕಟ್ತೆ ಅಂದ ಗಣೇಶ, ನಾ ಮಂಟಪದವ್ರ್ ಅಲ್ದಾ, ಕಿರೀಟ, ಎದಿ ಪಟ್ಟಿ, ಕೈ ಕಾಲ್ ಪಟ್ಟಿ ಎಲ್ಲ ನಾ ಮಾಡ್ತೆ ಅಂದೆ. ಪ್ರಸಂಗ ನಾವ್ ಕಂಡದ್, ಇಷ್ಟ್ ದಿನ ಹೊಯಿಂಗಿ ಗುಡ್ಡಿಲ್ ಹೊರ್ಳಾಡಿದ್ದೆ! ಬಡಗಿನ್ ಕೇರಿಲ್ ನಾನಲ್ದೇ ಮನಾರ, ವಾಸ, ಅರ್ವಿಂದ, ದಿನೇಶ ಸಿಕ್ಕಿರೆ, ತೆಂಕಿನ್ ಕೇರಿಲ್ ಗಣೇಶನ್ ಜೊತಿಗೆ ಅನಂತ, ನಾರಾಯಣ, ಮೂರ್ತಿ, ಸುರೇಶ, ರಾಘವೇಂದ್ರ, ಶ್ಯಾಮ ಹೀಂಗ್ ನಮ್ಮ್ಯಾಳಕ್ ಜನ ಸಾಕ್ ಅಂತ್ ಗೊತ್ತಾಯ್ತ್. ಯಾರ್ಯಾರ್ ಏನೇನ್ ಪಾರ್ಟ್ ಅಂತನೂ ನಿರ್ಧಾರ ಆಯ್ತ್.

ನನ್ನನ್ ಮೂರ್ ವರ್ಷ ಅಜ್ಜನ್ ಮನಿಲ್ ಬಿಟ್ಟ್ ನೋವಿಗ್ ನಮ್ಮಮ್ಮ ನಂಗ್ ಸಲ್ಪ ಜಾಸ್ತಿಯೇ ಕಡ್ಬ್, ತುಪ್ಪ, ಮೊಸ್ರ್, ಬೆಣ್ಣಿ ಹಾಪುಕೋಯೋ ಏನೋ, ಹೆಚ್ಚಾಕಿದ್ ಜಗಳ ಮಾಡುಕಾಗಾ ಅಂತ್ ಅಷ್ಟೂ ಹೊಟ್ಟಿ ನೋವ್ ಬಂದ್ರೂ ತಿಂದ್ ಖಾಲಿ ಮಾಡ್ಕೋಯ್, ನಾ ಒರ್ಲುದೂ ಗಟ್ಟಿ ಇಪ್ಪುಕೋಯ್, ನಾನೇ ರಕ್ತಚೆಂಗಕ್ ಸರಿಯಾದವ ಅಂತ್ ಎಲ್ಲರೂ ಒಪ್ಪಿರ್. ಗಣೇಶ ಎಲ್ಲರಿಗೂ ಭಾಗ್ವತ, ಮತ್ ಯಾರಿಗೂ ಬ್ಯಾಡ್ದಿದ್ ಪಾತ್ರ ಅವ್ನಿಗ್, ರಕ್ತಚೆಂಗನ್ ತಂಗಿ ರಕ್ತಕೇಷಿ ಪಾತ್ರ ಅವ ಮಾಡುದ್. ಬೇರೆ ಉಳಿದವ್ರ್ ಯಾವ ಯಾವ ವ್ಯಾಷ ಮಾಡಿರ್ ಅಂಬುದ್ ನನ್ ರಕ್ತಚೆಂಗನ್ ಅವ್ತಾರದಲ್ ನೆನ್ಪಿಲ್ಲ!

ನಂಗ್ ಮನಿಲ್ ಕಿರೀಟ ಮಾಡುಕ್ ಮನಾರನೂ ಕೈಹಾಕ್ದ, ಅವ ಅವ್ನಿಗ್ ಇಷ್ಟ ಆದ್ ನಾ ಮಡುಕ್ ಬಿಟ್ರ್ ಸರಿ, ಇದೇ ಮಾಡ್, ಹೀಂಗೇ ಮಾಡ್ ಅಂತ್ ಹೇಳ್ದಿದ್ರ್ ಸರಿ, ಅವ ಅದ್ರಲ್ ಮುಳುಗಿಯವ, ನನನ್ಗಿಂತ್ ಹೆಚ್ಚಿನ್ ಆಸಕ್ತಿಲ್ ಮಾಡ್ದ, ನಂಗ್ ಕೆಲ್ಸ ಆರ್ ಸರಿ, ಸುಮಾರ್ ಇತ್ತಲೇ ಮಾಡುಕೆ. ಅವ ರಟ್ ಮೇಲ್ ಕಿರೀಟದ್ ಚಿತ್ರ ಬಿಡ್ಸಿ, ರಟ್ ಕತ್ತರ್ಸಿ, ಜರಿ ಕತ್ತರ್ಸಿ, ಅಂಟ್ಸಿ ಮಾಡುವತಿಗೆ, ನಾ ಎದಿ ಪಟ್ಟಿ, ಮುಂಗೈ ಪಟ್ಟಿ, ಮೇಲ್ಕೈ ಪಟ್ಟಿ, ಸೊಂಟ ಪಟ್ಟಿ, ಕಾಲ್ಪಟ್ಟಿ ಮಾಡಿ ಮಾಡಿ ಹಾಕ್ಯೇ, ನನ್ ರಕ್ತಚೆಂಗನ್ ಕಿರೀಟ ಎಲ್ಲರಿಗಿಂತ್ ದೊಡ್ಡದ್ ನಾನೇ ಮಾಡ್ಕಂಡೆ. ನಮ್ಮನಿ ಅಂಗಡಿ ಮನಿ, ರದ್ದಿಗ್ ಹಾಕಿದ್ ಪುಸ್ತಕದ್ ರಟ್, ಸಾಮಾನ್ ತಂದದ್ ಪೆಟ್ಟಿಗಿದ್ ರಟ್ ಎಲ್ಲಾ ಸಿಕ್ತ್, ಸಾಕಾಯ್ತ್. ನಮ್ ಅಂಗ್ಡಿಲೇ ಚಿನ್ನದ್ ಬಣ್ಣದ್ ಕಾಗದದ್ ಮತ್ ಪ್ಲಾಸ್ಟಿಕ್ ಜರಿ ಎರಡೂ ಇತ್, ಅದನ್ನೇ ಹಾಕಿದ್. ಮತ್ ಪಕ್ಕದ್ಮನಿ ಮುಂಡಾಸ್ರಾಯ್ರ್ (ಶ್ರೀಮಾನ್ ಕೃಷ್ಣ ಉಪಾಧ್ಯರು) ಮತ್ ಅವರ್ ಮಕ್ಳ್ ಇನ್ನೂ ಮಂಟಪದ್ ಕೆಲ್ಸ ಮಾಡ್ತಿದ್ರ್, ಎದ್ದದ್ ಬಿದ್ದದ್ ಜರಿ ಎಲ್ಲಾ ಅವ್ರ್ ಮನಿ ಅರ್ವಿಂದ ಕೊಟ್ಟ. ಕಿರೀಟಕ್ಕ್ ಗೊಂಡಿ ಮಾಡಿ ಆಬದಿ ಈಬದಿ ಹಾಕ್ತ್. ಎರ್ಡ್ ಮೂರ್ ಚಿಡಿ ನೂಲ್, ಸುತ್ತಲಿ ನಾರ್ ಎಲ್ಲ ಕಿರೀಟಕ್ ಪಟ್ಟಿಗ್ ಕಟ್ಟಿ, ನಾವ್ ಕಟ್ಕಂಡ್ ಕಾಂತ್, ಕೆಲವ್ ಕಿರೀಟ ಮತ್ ಪಟ್ಟಿ ತೆಳ್ಳಗಿನ್ ರಟ್ ಆಪ್ಕೋಯ್ ಕಟ್ಟಿದ್ ಹಗ್ಗವೇ ಎಳ್ಂಡ್ ಬಂದ್ ಹಾಳಾಯ್ತ್, ರಟ್ ದಪ್ಪ ಹಾಕ್ ಅಂತ್ ಗೊತ್ತಾಯ್, ಹಿಂದಿಂದ್ ಇನ್ನೊಂದ್ ರಟ್ ಅಂಟ್ಸಿ ಕತ್ತರ್ಸತ್! ಎಲ್ಲಾ ಮುಗ್ದ್ ನಾವ್ ಅಷ್ಟೂ ಕಿರೀಟ, ಎದಿ ಪಟ್ಟಿ ಹರಡಿದಾಗ್ ಒಂದ್ ಮೇಳವೇ ನಮ್ಮಲ್ ಬಂದ್ ಬಿದ್ದಾಂಗ್ ಇತ್. ನಮ್ಗ್ ಬೇಕಾಪ್ ವ್ಯಾಷಗಳನ್ ಮೀರಿ ಆಟಕ್ ಬಪ್ಪು ಮಕ್ಕಳಿಗೆಲ್ಲಾ ಒಂದ್ ಸೆಟ್ ವ್ಯಾಷದ್ ಸಾಮಾನ್ ಮಾಡಿ ಇಡ್ಕ್ ಅಂಬಷ್ಟ್ ಬುದ್ಧಿವಂತ್ರ್ ನಾವ್ ಅಣ್ಣತಮ್ಮ ಇದ್ವಿ!

ನಂಗ್ ಇವೆಲ್ಲಾ ಮಾಡ್ತಾ ಉಮೇದ ಜಾಸ್ತಿ ಆಯಿ, ಮದ್ಲಿ ಮತ್ ಚೆಂಡಿನೂ ಮಾಡಿಯೇ, ನಮ್ಮಣ್ಣಂದಿರ್ ಹ್ಯಾಂಗ್ ಮಾಡುದ್ ಅಂತ್ ತೋರ್ಸಿಕೊಟ್ಟಿದ್ರ್ ಮದ್ಲೇ! ಒಂದ್ ದೊಡ್ಡ್ ಡಬ್ಬಿ ತಕ್ಕಂಡ್, ಅರಾರೂಟ್ ಮೈಲ್ತುತ್ತ ಹಾಕಿದ್ ಅಂಟ್ ಮಾಡ್ಕಂಡ್, ಡಬ್ಬಿ ಮ್ಯಾಲ್ ತೆರ್ಕಂಡ್ ಇಪ್ಪು ಜಾಗಕ್ ಕಾಗದ ಅಂಟ್ಸ್ತಾ ಹೋಪುದ್, ಬಿಸ್ಲಲ್ ಒಣ್ಸುದ್, ಅಂಟ್ಸಿದ್ ಕಾಗದ ದಪ್ಪ ಆಯಿ ಆಯಿ, ಒಣಗಿದ್ ಮೇಲ್ ಎರಡ್ ಕೋಲ್ ತಕ್ಕಂಡ್ ಚೆಂಡಿ ಹಾಂಗ್ ಬಾರ್ಸಿದ್ರ್ ಹರುದಿಲ್ಲ, ಒಳ್ಳೇ ಕೇಂಬಾಂಗ್ ಶಬ್ದ!  ಹಾಂಗೆ, ಎರಡೂ ಕಡಿ ತೆರ್ಕಂಡ್ ಡಬ್ಬಕ್ ಕಾಗ್ದ ಹಚ್ತಾ ಹೋಯ್ ಒಣ್ಸಿರೆ ಮದ್ಲಿ ಆತ್. ಡಬ್ಬ ಎರಡೂ ಕಡಿ ತೆರ್ಕಂಡ್ ಇರುದಿಲ್ಲ, ಒಂದ್ ಕತ್ತಿ ಮತ್ ಕಲ್ ತಕ್ಕಂಡ್ ನಾವೇ ತೆರ್ಕಂಕ್ ಇಲ್ಲ ದೊಡ್ಡವ್ರ್ ಹತ್ರ್ ತೆರ್ಸಿ ತಕ್ಕಂಕ್!  ಕೆಲ ವ್ಯಾಷಕ್ ಮೀಸಿ ಬೇಕಲೆ, ಹಳೀ ಚೌರಿ ಇಲ್ಲಾ ಹುರಿಹಗ್ಗದಲ್ ಮೀಸಿ ಮಾಡಿ ಇಟ್ಕಂತ್.

ಆಟದ್ ದಿನ ಬಂತ್, ಬಹುಶ ಶಾಲಿಗ್ ರಜಾ ದಿನ. ಆಟಕ್ ತಯಾರಾಪುಕ್ ಇಡೀ ದಿನ ಬೇಕಾಯ್ತ್. ಅಮ್ಮನ್ ಹತ್ರ ಕೇಂಡ್ ಹಳಿ ಸೀರಿ, ಸೀರಿ ತುಂಡ್, ಅಪ್ಪಯ್ಯನ್ ದಿನದ್ ಪಂಚಿ ಹೀಂಗ್ ಎಲ್ಲಾ ಒಟ್ ಮಾಡಿ ನಾವ್ ಹೊತ್ಕಂಡ್ ಹೋಪು ಚೀಲದ್ ಮ್ಯಾಳದ್ ಪೆಟ್ಗಿಗ್ ಹಾಕ್ತ್. ಅಮ್ಮನ್ ಕನ್ನಡಿ, ಪೌಡರ್, ಕುಂಕುಮ, ಕಾಡ್ಗಿ, ಅಡ್ಗಿ ಮನಿ ಅರ್ಸಿನ, ತೆಂಗಿನ್ ಎಣ್ಣಿ, ವೇಷ ಹಾಕ್ಕಂಬ್ಕೆ ಹಿಡಿಕಡ್ಡಿ, ಕಡಿಗ್ ವೇಷ ವರ್ಸುಕ್ ಹಳಿಬಟ್ಟಿ ಎಲ್ಲಾ ತಕ್ಕಂಡ್ ಇಟ್ಕಂತ್.  ನಾವ್ ಮಾಡಿದ್ ಕಿರೀಟ ಪಟ್ಟಿ ಎಲ್ಲಾ ಹಾಳಾಗ್ದಿದ್ದ್ ಹಾಂಗ್ ಇನ್ನೊಂದ್ ಚೀಲಕ್ ಹಾಕ್ಕಂತ್, ನಮ್ಮ್ ಚೆಂಡಿ ಮದ್ಲಿನ್ ಮತ್ತೊಂದ್ ಚೀಲಕ್ ಹಾಕ್ಕಂತ್! ನಾವ್ ಬಡಾಕೇರಿ ಮಕ್ಳೆಲ್ಲಾ ನಾಕ್ ಗಂಟಿ ಹಾಂಗ್ ಮನಿಲ್ ಸಾಯಂಕಾಲದ್ ಹಾಲ್ ಕುಡ್ದ್ ಕೂಡ್ಲೇ ಎಲ್ಲ ಹಿಡ್ಕಂಡ್ ಓಡ್ತ್.

ನಾವ್ ಕಿಟ್ಟಪ್ಪ್ ನಾಯ್ಕ ಎಲ್ಲಪ್ಪ್ ನಾಯ್ಕರ್ ಕಲ್ ದಾಟಿ, ಚಿಕ್ಕಮ್ಮ ದೇವ್ರ್ ಮನಿ ಹಿಂದ್ ಬತ್, ಆಟದ್ ಗರ ಜೋರಾಗಿತ್. ಗಣೇಶ ಮತ್ ಅವ್ನ್ ತೆಂಕಿನ್ ಕೇರಿ ತಂಡದವ್ರ್ ಭಾರೀ ಕೆಲ್ಸ ಮಾಡಿದ್ರ್. ನಮ್ಗ್ ಮೊದ್ಲ್ ಕಣ್ಣಿಗ್ ಬಿದ್ದದ್, ಮಡ್ಲ್ ಎಲ್ಲಾ ಹಾಕಿ ಮಾಡಿದ್ ಹಳ್ಳಿಮನಿ, ಭಾರೀ ಲಾಯಕ್ಕಿತ್. ಅದ್ ಚೌಕಿಗೆ. ಅದ್ರ್ ಪಕ್ಕನೇ ನಾಕ್ ಕಂಬ ಕಟ್ಟಿ, ಮಾವಿನ್ ತುಂಡಿ ಕಟ್ಟಿದ್ ರಂಗಸ್ಥಳ, ಹಡ್ಮಂಚದ್ ಬದ್ಲಿಗ್, ಇಬ್ರ್ ಕೂತ್ಕಂಬ್ ಹಾಂಗಿದ್, ಮರದ್ ಗೆಲ್ ಕೋಲ್ ತುಂಡಲ್ ಮಾಡಿದ್ ಮಂಚ. ಎಲ್ಲಾ ಭಾರೀ ಜೋರಾಗಿತ್.

ನಾವ್ ಚೌಕಿಮನಿಲ್ ತಂದದ್ ಎಲ್ಲಾ ಹರ್ಡಿ, ಯಾವ ಯಾವ್ ವ್ಯಾಷದವ್ರಿಗ್ ಯಾವ್ ಕಿರೀಟ, ಪಟ್ಟಿಗ್ಳ್ ಅಂತ್ ಬೇರೆ ಬೇರೆ ಮಾಡಿ ಇಡ್ತ್, ಮದ್ಲಿ ಚೆಂಡಿ ಬಾರ್ಸುವವ್ರಿಗ್ ನಾವ್ ಮಾಡಿದ್ ಕೊಟ್ ಹ್ಯಾಂಗ್ ಬಾರ್ಸುದ್ ತೋರ್ಸಿ ಕೊಡ್ತ್. ಎಲ್ಲರೂ ಮುಖಕ್ ಬಣ್ಖ ಹಾಕುಕ್ ಕೂತ್ರ್, ಪೌಡರಿಗೆ ಎಣ್ಣಿ ಮತ್ ನೀರ್ ಮಿಕ್ಸ್ ಮಾಡಿ ಮುಖಕ್ ಬಳ್ಕಂತ್, ನೀರ್ ಒಣ್ಗಿದ್ ಹಾಂಗ್ ಮುಖ ಬೆಳ್ಳಗಾಯ್ತ್. ಅದ್ರ್ ಮೇಲ್ ಮತ್ ಅರ್ಸಿನ, ಕುಂಕುಮ ಸೇರ್ಸಿದ್ ಪೌಡರಿಗ್ ನೀರ್ ಹಾಕ್ಕಂಡ್ ನಮ್ ನಮ್ ಪಾತ್ರಕ್ ಬೇಕಾಪು ಬಣ್ಣ ನಮ್ ಕುಶಿ ಬಂದಾಂಗ್ ಹಚ್ಕಂತ್, ಒಬ್ಬ ಸರಿ ಮಾಡಿದ್ ನೋಡಿ ಇನ್ನೊಬ್ಬ ಮಾಡ್ಕಂಡ, ಗಣೇಶನಂತವ್ರ್ ಸಣ್ಣ್ ಮಕ್ಳಿಗ್ ವ್ಯಾಷ ಬರ್ದರ್. ಮೀಸಿ ಮಾತ್ರ ಅಂಟ್ ಹಾಕಿರೂ ನಮ್ ಬಾಯ್ ಮೇಲ್ ನಿಲ್ಲಲೇ ಇಲ್ಲ, ಕಡಿಗೆ ಸೋತ್, ಕಾಡ್ಗಿ ಮತ್ ಮಸಿಕೆಂಡದಲ್ಲೇ ಮೀಸಿ ಬರ್ಕಂಡದ್.

ಸ್ತ್ರೀವೇಷಕ್ ರಾಕ್ಷಸಿ ವೇಷದ್ ಗಣೇಶನ್ ಬಿಟ್ರೆ ಬೇರೆ ಯಾರೂ ರವಿಕಿ  ತಂದಿರ್ಲಿಲ್ಲ ಗಣೇಶ, ಪಕ್ಕದ್ಮನಿ ಯಾರೋ ಹುಡ್ಗೇರ್ದ್ ಬೇಡ್ಕಂಡ್ ತಂದಿದ್ದ!  ಉಳ್ದವರಿಗೆ ಬನಿಯನ್ ಒಳ್ಗೇ ಕಾಗದ ಉಂಡಿ ಉಂಡಿ ಮಾಡಿ ತುರ್ಕಿ ತುರ್ಕಿ ಮೊಲಿ ಮಾಡ್ತ್, ಅದ್ರ್ ಮೇಲ್ ಸೆರಗ್ ಬಂದ್ ಮ್ಯಾಲ್ ಲಾಯ್ಕ್ ಕಾಂತ್. ಪುರುಷವೇಷದವ್ರ್ ಒಂದೋ ಬಿಟ್ ಮೈ ಇಲ್ಲಾ ಬನಿಯನ್.

ಎಲ್ಲರ ವೇಷ ತಯಾರಾಪುತಿಗೆ ಐದೂ ವರಿ ಆಯಾತ್. ಆಟ ಮಾಡುದ್ ಹ್ಯಾಂಗ್ ಅಂತ್ ಶಾಲಿಂದ್ ಸಾಯಂಕಾಲ ಬತ್ತಾ ಪ್ರಾಕ್ಟೀಸ್ ಮಾಡಿದ್ ಇತ್ತಲೇ. ಗಣೇಶನೇ ಭಾಗ್ವತ. ಚೆಂಡಿ ಮತ್ ಮದ್ಲಿಯವ್ರಿಗೆ ಬಾರ್ಸುಕ್ ಒಂದ್ ವ್ಯವಸ್ತಿ ಇದ್ರೂ ಶಬ್ದಕ್ ಬಾಯಿಯೇ ಗಟ್ಟಿ, ಭಾಗವತ್ರ್ "ಗಜಮುಖದವನೇ" ಅಂತ ಹೇಳ್ತಾ ಸುರು ಮಾಡಿರ್. ಬಾಲಗೋಪಾಲ, ಸ್ತ್ರೀವೇಷ, ಒಡ್ಡೋಲಗ ಎಲ್ಲಾ ಹರ್ಕಿ ಬಲಿ ಬೇಗ್ ಬೇಗ್ ಆಯ್ತ, ಮಾಡಿಯವ್ರೆಲ್ಲಾ ಚೆರಿಗಿಭರ್ತಿಯವ್ರ್, ಹಾಂಗಾಯ್.

ನಂದ್ ರಕ್ತಚೆಂಗನ್ ಪ್ರವೇಶ, ನನ್ ಕುತ್ತಿಗಿ ಹಿಂದ್ ಒಂದ್ ಸೀರಿ ತುಂಡನ್ ಇಳ್ಸಿ ಬಿಟ್ಟಿದ್ನಲ್ಲ, ಒಂದ್ ಕೈಯಲ್ ಅದನ್ ಹಿಡ್ಕಂಡ್, ಇನ್ನೊಂದ್ ಕೈಯಲ್ ರಟ್ಟಿದ್ ಜರಿ ಇಪ್ಪು ಕತ್ತಿ ಹಿಟ್ಕಂಡ್ ಜಾಪಲ್ ಪ್ರವೇಶ ಮತ್ ಕುಣಿತ. ಇಲ್ ಹಿಮ್ಮೇಳ ಮತ್ ಮುಮ್ಮೇಳದ್ ಹೊಂದಾಣ್ಕಿ ಸಲ್ಪ ಬೇರೆ. ಭಾಗವತ್ರ್, ಚೆಂಡಿಯವ್ರ, ಮದ್ಲಿಯವ್ರ್ ಮತ್ ವ್ಯಾಷದವ್ರ್ ಎಲ್ಲರೂ ಅವ್ರಿಗೆ ಖುಷಿ ಬಂದಾಂಗ್ ಮಾಡುದ್, ಭಾಗವರ್ತ್ ಹೇಳ್ತ್ರ್, "ರಕ್ತಚೆಂಗನು ಬಂದನು, ಅತೀ ಕ್ರೂರನು, ಜಾಪಲಿ ನಿತ್ಕಂಡನು (ಕೂತ್ಕಂಡನು ಅಂಬುಕೆ ಅಲ್ ಕೂತ್ಕಂಬಕೆ ಸಿಂಹಾಸನ ಜಾಗ ಇಲ್ಲಲೇ), ಒಡ್ಡೋಲಗ ಕೊಟ್ಟನು", ಎಲ್ಲಾ ನಮ್ಗ್ ಅರ್ಥ ಆಪಾಂಗ್ ದಿನದ್ ಮಾತಲ್ಲೇ, ಅತ್ ಭಾಗವತ್ರ್ ಗಟ್ಟಿ ಸ್ವರದಲ್ ಹೇಳ್ತಾ ಇಪ್ಪತಿಗ್, ವ್ಯಾಷದವ್ ಅವಂದೇ ತಾಳ ಹೇಳ್ಕಂಡ್ ಕುಣುದ್, ಭಾಗವತ್ರ್ ಪದ್ಯಕ್ ಸರಿಯಾಯಿ ಅಭಿನಯ ಮಾಡ್ಕಂತ್ ತಲಿಗೇ ಹೋಯಿಲ್ಲ, ಕಥಿ ಮತ್ ಸನ್ನಿವೇಶಕ್ ಸರಿಯಾಯಿ ನಡೆ, ಅಭಿನಯ, ಜಾಪ್ ಅಷ್ಟೇ, ಆದ್ರ್ ಅದೇ ಭರ್ಜರಿ. ಇತ್ ಮದ್ಲಿ ಚೆಂಡಿಯವ್ರ್ ಅವ್ರ್ ವಾದ್ಯ ಬಡ್ಕಂತಾ ಬಪ್ಪು ಶಬ್ದ ಒಂದ್ ಆದ್ರೆ, ಬಾಯಲ್ ಮದ್ಲೇ ಕಲ್ತದ್ ಬರು ಶಬ್ದ ಬೇರೆ, ಆ ಶಬ್ದದ್ ಲಯ ನಡೆ ಎಲ್ಲಾ ಒಂದೆ, ಸಾಧಾರಣಾ ಎಲ್ಲಾ ಪದ್ಯಕ್ಕೂ! ಒಟ್ಟಲ್ ಎಲ್ಲರೂ ಒರ್ಲುದ್ ಸೇರಿ ಮೈಕಿಲ್ಲದೇ ಒಂದ್ ಮೈಲಿಗ್ ನಮ್ ಆಟ ಕೇಂಬಾಂಗ್ ಆಯ್ತ್, ಪದ್ಯ ಮುಕ್ತಾಯ ಹ್ಯಾಂಗಂದ್ರ್ ಮೊದ್ಲ್ ಭಾಗವತ್ರ್ ಒರ್ಲುದ್ ನಿಲ್ಸ್ತ್ರ್, ಕಡಿಗ್ ವೇಷಧಾರಿ ವರ್ಲ್ತಾ ಕುಣುದ್ ನಿಲ್ಸುದ್, ಕಡೀಗ್ ಚೆಂಡಿ ಮದ್ಲಿಯವ್ರ್ ನಿಲ್ಸಿರ್ ಮೇಲ್ ಹಾರ್ಮಣಿ ಮಾಣಿ "ಉಂಯ್ಯಾ ಉಂಯ್ಯಾ" ಅಂಬುದ್ ಕೊನೇಗ್ ನಿಲ್ಸುದ್, ಪಾತ್ರಧಾರಿದ್ ಸಂಭಾಷಣೆ ಶುರು. ಮುಂದಿನ್ ಪದ್ಯದ್ ಎತ್ಗಡಿ ಪಾತ್ರಧಾರಿಯಾ ಮಾಡ್ತ, ಉದಾಹರಣಿಗ್, "ಯಾರದು ಅಲ್ಲಿ, ನಾರದ್ರು ಬರುವಂತಿದೆ ಅಲ್ಲವೇ", ಅಂದಾಗ್ಳಿಗೆ, ಗಣೇಶನೇ ನಾರದ ಮಾಡ್ಕಂಡ್ ನಿತ್ತವನ್ ದೂಡ್ತಾ, ಅವ "ನಾರಾಯಣ ನಾರಾಯಣ" ಅಂತ ಬಪ್ಪತಿಗೆ, ಭಾಗವತ್ರ್ ಸುರು ಮಾಡ್ತ್ರ್, "ಜಯ ನಾರಾಯಣ, ಜಯ ನಾರಾಯಣ".. ಹೀಂಗ್.

ಪಾಪ, ಆಟ ಕಾಣ್ದಿದ್, ಆಟ ಮಾಡುಕ್ ಬಾರ್ದಿದ್ ಸಣ್ಣ ಮಕ್ಕಳ್ ರಂಗಸ್ಥಳಕ್ ಬಂದ್ ತಪ್ ಮಾಡಿರೆ ಇಲ್ಲ ಎಂತ ಮಾಡುಕ್ ಹೇಳುಕ್ ಗೊತ್ತಾಗ್ದೇ ನಿಂತ್ರ್,  ಮೊದ್ಲ್ ಮೊದ್ಲ್ ಭಾಗ್ವತನಾಗಿ ಗಣೇಶನೇ ಹೇಳುದ್ ಏನ್ ಹ್ಯಾಂಗ್ ಮಾಡ್ಕ್ ಅಂತ್, ಕಡಿಕಡಿಗ್ ಎದ್ರ್ ವ್ಯಾಷ ಹಾಕ್ಕಂಡ್ ನನ್ನಂತವ್ರೇ ಹೇಳುದ್, ಹಾಂಗಲ್ಲ, ಹೀಂಗ್ ಹೇಳ್, ಅದ್ ಕಡಿಗೆ, ಈಗ ಈ ಸನ್ನಿವೇಶ ಇತ್ಯಾದಿ. ಈ ರೀತಿ ಆಟದ್ ಒಳ್ಗ್ ಹೋಯ್ ಪಾತ್ರ ಮಾಡುದ್, ಜೊತಿಗೇ ಆಟದ್ ಹೊರ್ಗ್ ಬಂದ್ ನಿರ್ದೇಶನ ಮಾಡುದ್, ತಪ್ಪಾದ್ ಪುನ: ರಿಟೇಕ್ ಅಂಬಾಂಗ್ ಪುನ: ಮಾಡುದ್ ಇವೆಲ್ಲ ಏನೂ ಆಭಾಸ ಆಯ್ಲೇ ಇಲ್ಲ, ಕಾರಣ, ಆಟ ಮಾಡೋರ್ ಬಿಟ್ರೆ, ಮಿಣ್ಣಾಗ್ ಕಾಂಬು ಇನ್ನೂ ಶಾಲಿಗ್ ಸೇರ್ದ್ ಚಳ್ಳಿಪಿಳ್ಳಿಗಳನ್ ಬಿಟ್ರೆ  ನಮ್ಮಾಟ ಕಾಂಬುಕೆ ಬ್ಯಾರೆ ಯಾರೂ ಇರ್ಲಿಲ್ಲ!

ಗಣೇಶ ರಕ್ತಕೇಶಿ ಆಯಿ ರಂಗಸ್ಥಳಕ್ ಬಂದ್ಮೇಲೆ ಅವಂದೇ ಭಾಗವತ್ಗಿ ಮತ್ ಕುಣ್ತ ಆಪ್ಕೋಯ್ ಸಲ್ಪ ಎರ್ಡೂ ಸರಿಹೊಂದಿ ಲಾಯಕ್ ಕಾಂತಿತ್. ನಾನೂ ಅವನೂ ಸೇರಿ ರಂಗಸ್ಥಳದಲ್ ಮಾಡಿದ್, ಒಬ್ರಿಂದ್ ಒಬ್ರಿಗ್ ಲಹರಿ ಜಾಸ್ತಿ ಆಯ್, "ಆಶು" ಸ್ಫುರಿಸಿ ಬೇಕಾಗಿಂತ್ ಜಾಸ್ತಿನೇ ಮಾಡ್ತ್, ಕಾಂಬು ಉಳ್ದವ್ರಿಗಿಂತ್ ನಾವೇ ಹೆಚ್ ಗಮ್ಮತ್ ತಕ್ಕಂತ್. ನಂದ್ ಕತ್ತಿ ಬೀಸಿದ್ ಜಾಸ್ತಿ ಆದ್ದೋ, ರಟ್ಟಿನ್ ಬಲ ಸಾಕಾಗ್ದೇ ಹೋದ್ದೋ, ಕತ್ತಿ ಹಿಡಿ ಇಪ್ಪಲ್ಲೇ ಕತ್ತಿ ಬಗ್ಗಿ ಹೋಯ್ತ್, ನಾ ಬಿಡಲ್ಲೇ, ಕತ್ತಿ ಬಗ್ಗಿ ಹೋದಲ್ಲೇ ಹಿಡಿಕೂಡಾ ಹಿಡ್ಕಂಡ್ ಕತ್ತಿ ತುಂಡಾಯಲ್ಲೇ ಅಂತ್ ಮತ್ತಷ್ಟ್ ಬೀಸಿ ಬೀಸಿ ತೋರ್ಸಿಯೇ!

ಕಥಿ ರಕ್ತಚೆಂಗ ಸಾಯು ಹೊತ್ತಿಗ್ ಸೂರ್ಯ ಮುಳುಗ್ಯ. ನಮ್ಗೂ, ರಕ್ತಚೆಂಗ ಸತ್, ಮಗ ಅಮ್ಮ ಒಟ್ಟಾದ್ ಮೇಲ್ ಕತಿ ಹೆಚ್ ಇರ್ಲಿಲ್ಲ, ರುದ್ರಕೋಪ ಸಾಧಾರಣಕ್ ಗಟ್ಟಿ ಇದ್ರೂ, ಹೇಳಿಕೊಡುಕ್ ಭಾಗವತ್ರ್ ಇದ್ರೂ, ಚಿತ್ರಾಕ್ಷಿ ಹಾಕಿಯವ ಸಣ್ಣ್ ಮಾಣಿ, ಹೆಚ್ ಉಮೇದಿ ಇರ್ಲಿಲ್ಲ, ಈ ಶ್ಯಾಳಿ ಮಾಡುಕ್, ರಂಗಸ್ಥಳಕ್ ಬರೂಕೇ ಅವ್ನಿಗೇ ನಾಚ್ಕಿ. ರುದ್ರಕೋಪನೇ ಇಬ್ಬ್ರಿಗೂ ಸೇರಿ ಸಲ್ಪ ಶಾಳಿ ಮಾಡ್ಯ, ಕೂಡ್ಲೇ ಇಬ್ರಿಗೂ ಮದಿ, ಬಟ್ಲ್, ಎಣ್ಣಿ, ಬತ್ತಿ, ಬೆಂಕಿಪೆಟ್ಗಿ ತಂದದ್ ಇದ್ದಿತ್, ಒಂದ್ ಮಂಗಳಾರತಿ ತಯಾರ್ ಆಯ್ತ್, ಇಬ್ರೂ ಹಾರ ಹಾಕ್ಕಂಡ್ರ್, ಯಾರೋ ಇಬ್ರ್ ಬಂದ್ ಆರ್ತಿ ಮಾಡಿರ್, ಭಾಗ್ವತ್ರ್ ಮಂಗಳ ಹೇಳಿರ್, ಎಲ್ಲರೂ ಸೇರಿ ದಕ್ಕಿತೋ ದಕ್ಕಿತ್ ಅಂತ್ ಕೂಗಿರ್, ಕೊನೆಗ್ ಒಂದಿಬ್ರಿಗ್ ಬಲೀಂದ್ರನ್ ದೀಪಾವಳಿಗ್ ಕರದ್ ನೆನಪಾಯ್ ನರಿ ಊಳಿಡುದೂ ಮಾಡಿರ್, ನಮ್ದ್ ಆಟ ಅಲ್ಲಿಗ್ ಮುಗಿತ್.

ನಂಗ್ ಈಗ ಅನ್ಸುದ್, ನಾವ್ ಯಾರೂ ಶಾಲಿಂದ್ ಬತ್ತಾ ಒಂದಿನವೂ ಚಿತ್ರಾಕ್ಷಿ ಪರಿಣಯದ್ ಅಜ್ಜಿ ಬಪ್ಪುದ್, ಚಿತ್ರಾಕ್ಷಿನ್ ಕದ್ಕಂಡ್ ಹೊತ್ಕಂಡ್ ರುದ್ರಕೋಪನಲ್ ಹೋಪುದ್ ಎಲ್ಲಾ ಮಾಡ್ಲೇ ಇಲ್ಲ, ನಾನಾರೂ ನಿದ್ರಿ ಮಾಡಿದ್ದೆ, ಉಳಿದವ್ರ್ ಯಾಕ್ ಅದನ್ ಎತ್ಲಿಲ್ಲ ಅಂತ. ಬಹುಶ: ಎಲ್ಲರೂ ಒಟ್ಟಿಗೇ ಒಬ್ರಾದ್ ಮೇಲ್ ಒಬ್ರ್ ತಲಿಮಂಡಿ ಕೆಳ್ಗ್ ಮಾಡ್ಕಂಡ್ ನಿದ್ರಿ ಮಾಡಿ ಈ ಸನ್ನಿವೇಶ ಸರಿಯಾಯಿ ನೋಡಿದವ್ರೇ ಇಲ್ಲ ನಮ್ ಮ್ಯಾಳ್ದಾಗ್ ಅಂತ್ ಕಾಣತ್!

ಆದ್ರೂ ನಮ್ಮ ಆಟ ಮುಗುಕೂ ಕತ್ಲಿ ಆಪುಕೂ ಸರಿ ಆಯ್ತ್. ನಾವ್ ಮಾಡಿದ್ ಆಟ ಎಷ್ಟ್ ಲಾಯಕ್ ಆಯಿತ್ತಂದ್ರ್, ಇಡೀ ಜನ್ಮಕ್ ಅದ್ ಸಾಕಾಪಷ್ಟಿತ್. ನಾವ್ ಮತ್ ಈ ರೀತಿ ವಿಜೃಂಭಣಿದ್ ಆಟ ಈ ರೀತಿ ಸೇರಿ ಇಷ್ಟ್ ದೊಡ್ಡ್ ಮತ್ ಮಾಡ್ಲಿಲ್ಲ, ನಾನ್ ಮನಿಗ್ ವಾಪಾಸ್ ತರಲೇ ಬೇಕಾದ್ ಸಾಮಾನ್ ಬಿಟ್ರೆ ಮತ್ತೆಲ್ಲ ಅಲ್ಲೇ ಬಿಟ್ಟೆ, ಕಿರೀಟ, ಪಟ್ಟಿ, ಮದ್ಲಿ, ಚೆಂಡಿ ಎಲ್ಲಾ, ನಾವ್ ಮಾಡಿದ್ ಆಟ ಅಷ್ಟ್ ತೃಪ್ತಿ ಕೊಟ್ಟಿತ್ ಅಂಬುಕ್ ಅದೇ ಸಾಕ್ಷಿ. ಬಹುಶ: ತೆಂಕಿನ್ ಕೇರಿ ಮಕ್ಳ್, ರಂಗಸ್ಥಳ ಮತ್ ಚೌಕಿನ್ ಒಂದ್ ವಾರ ಇಟ್ಕಂಡ್, ಈ ಸಾಮಾನ್ ಎಲ್ಲ ಉಪಯೋಗ್ಸ್ಕಂಡ್ ಸಣ್ಣಾಟ ಮಾಡಿರ್ಕ್, ದೊಡ್ಡವ್ರ್, "ಸಾಕ್, ಕಟ್ಟಿದ್ ಎಲ್ಲಾ ಅಳೀನಿ" ಅಂತ್ ಹೇಳುಲೊರೆಗೆ!

ಆಟ ಮಾಡಿದ್ ಮೇಲ್, ನಂಗ್ ಗೊತ್ತಾದ್, ಒರ್ಲಿ ಒರ್ಲಿ, ಬಾಯ್ ಒಣ್ಗಿ ಹೋಯ್ತ್, ಕೊಣ್ಡ್ ಕೊಣ್ದ್ ಕೈ ಕಾಲ್ ಬತ್ತಿ ಹೋಯಿತ್. ಎಲ್ಲರೂ ವ್ಯಾಷ ಕಳ್ಚಿ, ತಂದ್ ಹಳೀ ಬಟ್ಟಿಲ್ ಮುಖ ವರ್ಸ್ಕಂತ್, ನಮ್ಗ್ ಗೊತ್ತೇ ಇರ್ಲಿಲ್ಲ, ಮೊದ್ಲ್ ತೆಂಗಿನ್ ಎಣ್ಣಿಲ್ ಎಲ್ಲಾ ತಿಕ್ಕಂಕ್ ಅಂತ್, ಎಲ್ಲಾ ಬಣ್ಣ ಒಟ್ಟಾಯ್, ಅದ್ಕೆ ಹುಬ್ಬಿದ್, ಹುಂಡಿದ್, ಮೀಸಿದ್, ಕಾಡಿಗಿ ಕಪ್ ಒಟ್ಟಾಯ್, ಎಲ್ಲರ್ ಮುಖವೂ ಕಾಂಬುಕೆ ಗುಡ್ಡಿ ಹೆಗ್ಣ ಆಯ್ ಕಾಂತ್, ಅದ್ರಲ್ ಖುಶಿಲ್ ಮಿರಿಮಿರಿ ಮಿಂಚು ಕಣ್ ಎದ್ ಕಾಂತ್, ಅಲ್ದೇ ಏನೋ ಭಾರೀ ಸಾಧಿಸಿದ್ ಹಲ್ಚಿಲು ಬಾಯ್, ಇನ್ನೊಬ್ಬನ್ ವ್ಯಾಸದ್ ಅವಸ್ತಿ ಕಂಡ್ ಅದ್ರ್ ಮೇಲ್ ಇನ್ನಂದ್ ನಗಿ ಎಲ್ಲಾ ಸೇರಿ ಏನ್ ಚೆಂದ ಅಂತ್ರಿ, ಎಲ್ಲಾ ಮುಗ್ಸ್ಕಂಡ್ ನಾವ್ ಮನಿಗ್ ಬಂದ್ಮೇಲ್, ನಮ್ ಮುಖದ್ ಚೆಂದ ಕಂಡ್ ನಾವ್ ಸಕ್ಕತ್ ಗಮ್ಮತ್ ಮಾಡಿದ್ ಗೊತ್ತಾತಿತ್. ನಾವ್ ಮತ್ ಮನಿಲ್ ತೆಂಗಿನೆಣ್ಣಿ ಹಾಕ್ಕಂಡ್ ತಿಕ್ಕಂಡ್, ಒಂದ್ ನಾಲ್ಕ್ ಸರಿ ಸೋಪ್ ಹಾಕ್ಕಂಡ್ ತೊಳ್ಕಂಡ್ ಮತ್ ಮದ್ಲಿನ್ ಮನ್ಸ್ರ್ ಆಯ್ತ್!

ನಮ್ಮದ್ ಆಟ ಮುಗ್ದ್ ಮೇಲ್, ಎಲ್ಲರ್ಗೂ ಸೇರ್ಸಿ ಹೆಚ್ ಒರ್ಲಿದ್ ನಮ್ ಭಾಗ್ವತ ಗಣೇಶರಿಗ್ ಸ್ವರ ಕೈಕೊಟ್ ಬಿದ್ ಹೋಯ್ತ್. ಆ ಬಿದ್ ಹೋದ್ ಸ್ವರದಲ್ಲೇ ಶಾಲಿಂದ್ ಬತ್ತಾ ನಮ್ ಆಟದ್ ಮಾತಾಡಿ, ಸ್ವರ ಮತ್ ಮೇಲ್ ಬಪ್ಪುಕ್ ಇನ್ನೂ ಎರ್ಡ್ ದಿನ ಜಾಸ್ತಿ ತಕ್ಕಂತ್.

ಈ ಆಟದಲ್, ನಾನೂ ಗಣೇಶ ಭಾರೀ ಗಳಸ್ಯ ಕಂಠಸ್ಯ ಆಯ್ತ್. ಅವ ಒಳ್ಳೆಯವ, ಲಹರಿಯವ ಮತ್ ಹೆಚ್ಚಿನ್ ಪ್ರತಿಭೆಯವ. ನಾನ್ ಅವ್ನಿಗಿಂತ್ ಚೂರ್ ಬುದ್ಧಿವಂತ, ಅವನ್ ಹೇಂಗ್ ಉಪಯೋಗ್ಸ್ಕಂಬದ್ ನಂಗ್ ಗೊತ್ತಾಯ್ತ್. ನಾನೂ ಅವ್ನೂ ವಿನೋದಾವಳಿಯಲ್ ಒಳ್ಳೇ ತಂಡ ಆಯ್ತ್, ಛದ್ಮವೇಷದಲ್ ಒಬ್ಬೊಬ್ರೇ ಇದ್ದಾಗ್ ಪೈಪೋಟಿ, ಹೈಸ್ಕೂಲ್ ಸೇರಿ ಮೇಲ್ ತಂಡವಾಯ್ ಛದ್ಮವೇಷ ಮಾಡುಕ್ ಆದ್ ಮೇಲ್ ನಮ್ ಜೋಡಿ ಸೆಕೆಂಡ್ ಪಿಯುಸಿವರೆಗೂ ವಿಜೃಂಭಿಸಿ ಮೆರಿತ್, ಅದ್ರ್ ಕಥಿಯೇ ಬ್ಯಾರೆ ಮಾಡಿ ಹೇಳುವಷ್ಟಿತ್.

ಒಟ್ನಲ್, ನಾವ್ ಆಟ ಕಂಡ್ ಗಮ್ಮತ್ ಮಾಡಿದ್ದಕ್ಕಿಂತ್ ಜಾಸ್ತಿ ಆಟ ಮಾಡಿ ತಕ್ಕಂತ್. ಕಾರ್ಣ ಇಷ್ಟೇ, ಇದಕ್ ನಾವ್ ಮಾಡಿದ್ ಕಲ್ಪನಿ, ಪಟ್ ಪರಿಶ್ರಮ, ತಕ್ಕಂಡ್ ಲಹರಿ, ಆಡಿದ್ ಅನುಭವ ಅಷ್ಟ್ ಆಳದ್.  ಕಾಂಬುದ್ರಲ್ ಎಷ್ಟೇ ಗಮ್ಮತ್ ಸಿಕ್ಕಿರೂ, ಮಾಡುದ್ರಲ್ ನಂದ್ ಇದ್ದದ್ ಪೂರ್ಣ ಹಾಕಿ ಮನ್ಸ್ ಮೀರಿ ಮಾಡಿರೆ, ನಾವ್ ಮಾಡುದ್ ಹ್ಯಾಂಗೇ ಇರ್ಲಿ, ಸಿಕ್ಕುದ್ ಯಜ್ನಫಲಕ್ ಮೀರಿದ್ದೇ!

ಈ ಆಟದ್ ಅನುಭವ ನಮ್ ಮುಂದಿನ್ ಬದ್ಕಿನ್ ವ್ಯಾಷಕ್ ಬೇರೆ ಬೇರೆ ಲಯ, ರಾಗ, ಮಟ್ಟ್, ಗತಿ, ಬಣ್ಣ, ಲಹರಿ, ಅರ್ಥ ಎಲ್ಲಾ ಸೇರ್ಸ್ತ್ ಅಂತ ಹೇಳುವ ಅವಶ್ಶಿಯೇ ಇಲ್ಲ!

 

 

 

- ಮುಕ್ತಾಯ